متّی 12 - کتاب مقدس به زبان گیلکی - گویش شرقی

عیسی مقدس شنبه روز صاب

¹ هوموقع، عیسی مقدس شنبه میئن گندم کله أنِ میئنای شوءدبو. اونه شاگردؤن وشته ای واسه شروع به چِئَنه گندم خوشهَ​أن و اوشونه خوردن بوُدن.

² فریسی فرقه عالمون هیطوکه اینه بدئِن، عیسی بوُتن: «نیگاه بکون تی شاگردؤن کاری کأدرن که مقدس شنبه میئن نباید گودَن.»

³ عیسی جواب بدا: «مگه نوخُندین که داوود چی بُوده، هوموقع که خودش و اونه یارؤن وشتَه بؤئن؟

⁴ چوطو خدا خونه میئن بوشؤ و خودش و اونه یارؤن مقدس نونِ بوخُوردَن که اونه خوردن داوود بِه و اونه یارؤنِ بِه روا نبو و فقط کاهینؤن اجازه داشتَن بوخورَن.

⁵ یا مگه توراتِ میئن نوخُندین که شنبه روزؤن، کاهینؤن، معبدِ میئن، شنبه حرمتِ نداشتَن ولی با ایی هَمه تقصیر کار نییَن؟

⁶ شمره گونم ینفر أِره ایسه که معبدَ جی پیل تره!

⁷ اگه ایی کلامِ معنی بفَهمسه​بین که گونه ”رحمت خوائنم، نه قُربؤنی“ ده تقصیر کارؤنِ محکومَ نوُدین.

⁸ چونکه انسونِ ریکه، مقدس شنبه روزِ صابه.»

شفای مرداکی که اینه دست لام بو

⁹ بازین عیسی اورای بوشو و اوشونه عبادتگاه میئن دیرون بومَه.

¹⁰ عبادتگاه میئن یکته مرداک ایسأ بو که اونه یکته دست لامَ بؤبوُ. عیسی جی بپورسِئن: «مقدس شنبه میئن، شفا دَئن روا ایسّه؟» اینه بوتَن تا یکته گزک اونه بهتون زئنِ به بیاجن.

¹¹ عیسی اوشونه بوته: «اگه ینفر از شمه یکته گوسند بداری و او گوسند شنبه روز چاه میئن بکّای، نشنه اونه نگینه و اونه چاهای بیرون نئبِنه؟

¹² الؤن، آدم چقدر با ارزشتر از گوسنده! پس خوبی گودن شنبه میئن روا ایسه.»

¹³ بازین او مرداکه بوته: «تی دستِ درازَ کون!» او خوشِ دستِ درازَ گوده و اونه دست، اوته دستِ مورسون سالمَ بوُ.

¹⁴ امّا فریسی ان بیرون بوشوُئن و همدیگرِ اَمرَه نقشه بکشِئن که چطو اونه بکوشَن.

خدا انتخاب بوبؤکه خدمتکار

¹⁵ وختی عیسی ایی جریونای واخُوبَ بو اورای بوشؤ. خیلی أن اونه دومبالسر بوشوُئن و عیسی اوشؤنِ هَمَه شفا بدا

¹⁶ و ایشؤنه قدغن بُوده تا اونه باره هیشکس أمره گب نزنن.

¹⁷ ایی ایتفاق دکته تا اشعیای پیغمبر گب به انجوم برسی که:

¹⁸ «اینه می خدمتکار که اونه سیوا بُودم، می عزیز که، می جؤن اونای راضیِ. مو می روحِ اونه سر نئنّم و او، عدالتِ قومؤن به اعلؤم کوئنه.

¹⁹ دعوا نوکؤئنه و فریاد نزِئنه؛ و هیشکس اونه صدا کوچه​أنِ میئن نشتوئنه.

²⁰ ترَک بوخورده لولَه نشکنِئنه. و نیمسوج فیتله‌ دنکوشُنبِئنه، تا عدالتِ به پیروزی برسؤنی.

²¹ همته قؤمون، اونه ایسم به امید دَئنن.

عیسی و بَعِلزِبول

²² بازین یکته دیو بزه مرداکِ که کور و لال بو اونه ورجه بأردن و عیسی اونه شفا بدا، طوری که تینَس بَینی و گب بزنی.

²³ او جماعت همه ماتَ بوئن و بوُتن: «یعنی امکؤن دئنه ایی مردکای هو مسیح موعود ببی که قرارِ داوود نسلَ جی بای؟»

²⁴ امّا وختی فریسی ان اینه بشتؤسَن، بوُتن: «او بعِلزبول یاری أمره که دیوؤنِ رئیس ایسّه، دیوؤنِ بیرونَ کؤئنه!»

²⁵ عیسی اوشونه فکرؤنِ بفهمسه و اوشونه بوته: «هر مملکتی که برضد خودش دسته دسته ببی، سربه نیستَ بنه، و هر شهر یا خونه​ای که بر ضدّ خودش دسته دسته ببی، فبنه.

²⁶ اگه شیطؤن، شیطؤنِ بیرونَ کونی، بر ضد خودش دسته دسته بنه؛ پس چوطو اونه حکومت پابرجا مؤنه؟

²⁷ و اگه مو بَعِلزِبول یاری أمره دیوؤنِ بیرونَ کوئنم، شیمه شاگردؤن کی یاری أمره اوشونه بیرونَ کؤئنن؟ پس اوشون، خوشؤن شیمه داورؤن بنن.

²⁸ امّا اگه مو بواسطه خدا روح دیوؤنِ بیرونَ کوئنم، پس خدا پادشاهی شیمه به بومَه دئنه.

²⁹ چوطو ینفر تینه یکته قوی مرداک خونه بشی و اونه مال و مینالِ بدوزی، مگه اونکه اوّل او مرداکِ دوَدی و بازین اونه خونه غارت بکونی.

³⁰ هر کی می اَمره نیه، می ضیدِ، و هر کی می اَمره جومَه نکوُنی، پاشنِئنه.

³¹ پس شمره گونم، هر گوناهی و کفری که آدم انجوم دئنه، ببخشه بنه. امّا هرکس روح‌القدس کفر بوگوی ببخشِه نبنه.

³² هر کس گبی ضد انسون ریکه بوگوی، ببخشه بنه. امّا هر کس ضد روح​القدس گب بزنی، نه ایی دونیا و نه او دنیا میئن ببخشه نبنه.

³³ «اگه خوروم بار خوانین، شیمه دار باید خوروم ببی، چونکه بدِ دار، بدِ بار ابِنه. دارِ اونه بارَجی شئنه شناختن.

³⁴ ای افعی​بزاسّه أن، چطو تینین خوروم گب بزنین وختی که بد ایسیّن؟ چونکه زبؤن از اوچیزی که دیل اونای پوره ، گب زِئنه.

³⁵ خوروم آدم، خو خوبِ صندوق دیلای، خوروم چی أن بار ابئنه و بد آدم خو بدِ صندوق دیلای بدی چی أن بار ابِئنه.

³⁶ شمره گونم که مردوم هر مفت گبی که به زبون أبِنَن، داوری روز میئن باید حیساب پس بدئن.

³⁷ چونکه شیمه گبؤن اَمره تبرئه بنین و شیمه گبؤن اَمره محکومَ بنین.

نیشونه ای عیساجی خواستن

³⁸ بازین یه عده از فریسی ان و تورات معلمون اونه بوُتن: «اوستاد، خوأئنیم یکته نیشونه تی جَی بَینیم.»

³⁹ عیسی جواب بدا: «نسلِ شرور و زناکار نیشؤنه خؤائنه! امّا نیشؤنه​ایی ایشون هدأ نبنه، بغیرِ یونس پیغمبرِ نیشونه.

⁴⁰ چونکه هوطوُ که یونس سه شبونه روز، یکته پیله ماهی‌ شوکُمِ میئن ایسأ بو، انسؤنِ ریکه ام سه شبونه روز زمینِ دیلِ میئن ایسَنه.

⁴¹ نینوا مردوم داوری روز میئن ایی نسل أمره ویریسنَن و اوشونه محکومَ کوئنن چرِء که اوشون یونس موعظه واسه توبه بوُدَن و اَلؤن ینفر اِره ایسا که، یونسَ جی پیل تره.

⁴² ملکه جنوب داوری روزِ میئن ایی نسل أمره ویریسنَه و اوشونه محکومَ کوئنِه، چونکه از اوطرف دنیا بومَه تا سلیمؤنِ حکمتِ بشتؤئی و اَلؤن ینفر إرِه ایسأ که، سلیمونای پیل تره.

⁴³ «زمونیکه پلید روح ینفرای بیرون هنه، خوشکِ و بی آؤ جاأن سو شنه تا یکته جا استراحت به بیاجی، امّا پیدا نوکُوئنه.

⁴⁴ پس گونه ”او خونه ای که اورای بومَئم، وگردنم.“ امّا هیطوکه اوره رسنه و خونه، خالی و ترتمیز اینه،

⁴⁵ شنه و هفتِ روحِ بدتر از خودشِ، أبِنه و هَمَته دیرون شنن و اوره نیشنن. سرآخر، عاقبت او آدم بدتر از اول بنه. ایی نسل شرورِ عاقبتم هیطو بنه.»

عیسی مَئر و برأرون

⁴⁶ هو موقع که عیسی مردومِ اَمره گب زئدبو، اونه مَئر و برأرون، بیرون ایسأ بُوئن و خواسَن اونه اَمره گب بزنن.

⁴⁷ پس یه نفر اونه بِه خبر بأرده که: «تی مَئر و برأرون، بیرون ایسَئن و خوائنَن تی اَمره گب بزنن.»

⁴⁸ جواب بدا: «می مَئر کی​ایسه؟ و می برأرون کی​ایسّن؟»

⁴⁹ بازین خو دست اَمره خوشِ شاگردؤن اِشاره بُوده و بوته: «می مَئر و برأرون ایشؤنَن!

⁵⁰ چونکه هر کس می پئرِ خوأسته که آسمؤنِ میئن ایسأ بجا بأری، می برأر و خاخور و می مئره.»