متّی 1 - کتاب مقدس به زبان گیلکی - گویش شرقی

عیسی مسیح شجره‌نؤمه

¹ عیسی مسیح شجره‌نؤمه، داوود ریکه، ابراهیم ریکه:

² ابراهیم، اسحاق پِئر بو، اسحاق، یعقوب پئر بو و یعقوب، یهودا و اونه برارونِ پئر بو.

³ یهودا، فِرِص و زِراح پئر بو و اوشونِ مَئر ایسم تامار بو. فرِص، حِصرون پئر و حِصرون، رام پئر بو،

⁴ رام، عَمّیناداب پئر، عَمّیناداب، نَحشونِ پئر و نَحشون، سَلمونِ پئر بو.

⁵ سَلمون، بوعَزِ پئر بو. بوعَز مَئر ایسم، راحاب بو، و بوعَز، عوبیدِ پئر بو و عوبیدِ مَئر ایسم، روت بو، عوبید، یَسا پئر بو.

⁶ و یَسا، داوود پادشاه پئر بو، داوود، سلیمانِ پئر بو، سلیمانِ مئر، پیشتر اوریا زناک بو.

⁷ سلیمان، رِحُبعامِ پئر، و رِحُبعام، اَبیّا پئر، و اَبیّا، آسا پئر بو.

⁸ آسا، یَهوشافاط پئر، یَهوشافاط، یورام پئر، و یورام، عُزّیا پئر بو.

⁹ عُزّیا، یوتام پئر، یوتام، آحاز پئر، و آحاز، حِزِقیا پئر بو.

¹⁰ حِزِقیا، مَنَسی پئر، مَنَسی، آمون پئر، و آمون، یوشیا پئر بو.

¹¹ یوشیا، یِکُنیا و اونه برارون پئر که ایی زمون میئن یهودیِ أن، بابِل سو تبعید بوبوئن.

¹² بعدِ یهودی أنِ تبعید بابِل سو: یِکُنیا، شِئَلْتیئیلِ پئر و شِئَلْتیئیل، زروبابِل پئر بو.

¹³ زروبابِل، اَبیهود پئر، اَبیهود، اِلیاقْیم پئر، و اِلیاقْیم، عازورِ پئر بو.

¹⁴ عازور، صادوقِ پئر، صادوق، اَخیمِ پئر، و اَخیم، اِلیودِ پئر بو.

¹⁵ اِلیود، اِلعازارِ پئر، اِلعازار، مَتّانِ پئر، و مَتّان، یعقوبِ پئر بو.

¹⁶ یعقوب، یوسفِ پئر، و یوسف، مریم مرد بو، که عیسی نامدار به مسیح مریمَ جی بزاسّه بوبؤ.

¹⁷ پس تموم نسلؤن، ابراهیمَ جی تا داوود، سرجمع چهارده نسل و داوودَ جی تا زمؤنِ یهودی أنِ تبعید بابِل سو چهارده نسل، و تبعید زمؤنای تا مسیح، چهارده نسل بُوئن.

عیسی مسیح بدنیا اَمئن

¹⁸ عیسی مسیح بدنیا اَمَئن ایطوری بوبؤ: وختیکه مریم، عیسی مئر، یوسف نامزد بو، پیشتر از اونکه همدیگرِ برسَن، معلوم بوبُو که مریم روح‌القدسَ جی شوکومدار ایسّه.

¹⁹ اورا جی که اونه مرداک یوسف، یکته صالح مرداک بو و نخواس که مریم سر، ایسم بدنؤمی بنای، بخواسّه که خلوتی اوناجی سیوا ببی.

²⁰ امّا وختی یوسف ایی فکرونِ میئن دبو، یدفاری خداوندِ یکته فرشته، اونه خوء نما بوبؤ و بوته: «ای یوسف، داوود ریکه، تی زنِ گیتنَ جی مریم، واهیمه ندار، چون اوچیزی که اونه شوکمِ مِیئن هنّه، روح​القدسَ جی ایسّه.

²¹ مریم یکته ریکه زَئنه که، تو اونه ایسم عیسی نِئنی. چونکه او خو قوم اوشونِ گوناهؤنَ جی نجات دِئنه.»

²² ایشون همه اتفاق دکته تا اوچیزی​که خداوند، اِشعیای پیغمبر زُبؤن أمره بوته بو، حقیقت پیدا کونی که:

²³ « باکره شُوکُم دارَ بُو، یکته ریکای زَئنه و اونه ایسم عِمانوئیل نِئنه» که یعنی، خدا امه اَمره ایسّه.

²⁴ هیطوکه یوسف خوؤ آی ویریسا، اوچیزی که خداوند فرشته اونه دستور بَدأبو، انجؤم بده و خو زن مریم بیته.

²⁵ امّا مریم أمره نخوته تا او خو ریکه بزاسّه و یوسف اونه ایسمِ عیسی بنه.