لوقا 4 - کتاب مقدس به زبان گیلکی - گویش شرقی

عیسی امتحون گودن

¹ عیسی پور از روح القدس، اردن روخونه جَی وگرسه و روح، اونه بیابونِ میئن راهنمایی گود.

² اونه اوره ابلیس، چِهل روز امتحون بُوده. عیسی او روزؤنِ میئن هیچی نوخورده، وختی او مدتی که روزه داشت تمنه بو، اینه وشتَه بو.

³ ابلیس اونه بوته: «اگه تو خُدا ریکه ایسی، ایی سنگ بگو نون بَبی.»

⁴ عیسی جواب بَدَه: تورات میئن «بنویشته بوبوُ که ”آدمی که فقط نونِ امره زنده نیه.“»

⁵ بازین ابلیس اونه یکته بلندی سر ببُورده و هودَم تمام دنیا ممالک اونه نیشون بَدَه

⁶ و بوته: «مو همه ی ایی قدرت و ایختیار و اوشؤنه جا و جلال تَه هدِئنم، چونکه مَه بسپورده بوبوُ و مُختارم اونه هرکسی که بخوام هَدِم.

⁷ پس اگه مَه پرستش بکونی ایی همه، تی شی بنه.»

⁸ عیسی جواب بَدَه: «تورات میئن بنویشته بوبوُ، «”خداوندْ تی خُدا، بپرست و فقط اونه عبادت بکون.“»

⁹ ابلیس اونه، اورشلیم شهر و معبد گوف سر ببورده و بوته: «اگه خُدا ریکاکی، تَه اِرای جیر تَؤدی.

¹⁰ چونکه زبور میئن بنویشته بوبوُ: «”تی واسه خوشِ فرشته أن فرمون دِئنه تا تَه بپّان.

¹¹ و اوشون تَه خوشونِ دَستون سر دَئنن نبی که تی پَا یکته سنگ بَزنی.“»

¹² عیسی اونه جواب بَدَه: «تورات میئن بوته بوبؤ ”خداوندْ تی خُدا، امتحون نکون.“»

¹³ هیطو که ابلیس امتحونون تمنه بو، اونه تا یکته فرصت دیگه، ویلَه گوده.

شروع بوئنِ عیسی خدمت جلیل میئن

¹⁴ عیسی روح القدوس قُوت میئن جلیل ولایت وگرسه و اونه خبر، تمام او اطراف فیبیته.

¹⁵ عیسی یهودی أن عبادتگاهانِ میئن مردم آموت و همه اونای تعریف گودَن.

ناصره اهالی عیسی قبول نوکوئنن

¹⁶ پَس عیسی ناصره شهر که اونه میئن پیله بوبُو بو بومَه و یهودی أن مقدس شنبه میئن، بنا به خو عادت عبادگاه یهود میئن بوشؤ. و خو پَاسه بیسه تا خدا کلامِ بوخؤنی.

¹⁷ اِشعیای پیغمبر طومارِ اونه هَدَئن. هیطو که اونه بازا گوده، او قسمت بیاتّه که فرماسّ:

¹⁸ «خُداوند روح می سَر هَنّه، چونکه مَه مَسح بوده تا خوروم خبر ندارؤنِ بَدِم او مَه سرا دا تا آزادیِ اسیرؤن به اعلام بکونم کور چیشمؤنِ بینائیِ جار بزنم، ستم بکشه کؤنِ آزادَه کونَم،

¹⁹ و اعلام بکونم که او سال برسه که خداوند، مردم به لطف بکونی.»

²⁰ بازین عیسی طومارِ فیبیته و عبادتگاه خدمتکار بسپورده و بنیشته. همه عبادتگاه میئن اونه چیشم بُدوته بُن.

²¹ هوموقع ایطوری بنا به گب زئن بوده: «ایمرو ایی کلامِ بنویشته، وختی که اونه گوش کائده بین، عملی بوبوُ.»

²² همه عیسای تعریف گودن و از او فیضی که اینه کلام میئن دبو حیرونَ بوُبوئن و گوتَن: «مگه ایی یوسفِ ریکه نیه؟»

²³ عیسی ایشونه بوته: «حتم دئنم ایی حیکایت مِه به اَبنین که ”اَی طبیب تَه شفا بَدی! اوچیه که کفرناحوم شهر میئن بودی و امه بشتؤسیم، اِره، تی شهر میئن هم انجؤم بَدی.“‌»

²⁴ بازین بفرماسّه: «راست راستِ، شمره گونم که هیچ پیغمبری خوشِ شهر میئن قُبول نبنه.

²⁵ حَتم بدؤنین که ایلیا زمونِ میئن، وختی که آسمؤن سه سال و نیم دَوَسته بوبوُ و سراسر او ولایت پیله قحطی بومه، خیلی بیوه زناکون اسراییل میئن ایسّه بُن.

²⁶ امّا ایلیا هیشکس ورجه سرا دا نُبو بغیرِ یکته بیوه زناک، که صَرِفَه شهر صِیدون ولایت میئن ایسابو.

²⁷ اِلیشَع پیغمبر زمون هم اسراییل میئن خیلی أن جزام داشتن، ولی هیتّه از خوشونِ جزامای پاکا نُبوئن بغیر از نَعْمانِ سُریانی.»

²⁸ بازین همۀ اوشونی که عبادتگاه میئن ایسابُن، ایی گبؤن ایشتؤسنه امره ایشون غیضَیته.

²⁹ و ویریسئن، اونه شهر مئنای بیرون هکشِئن و کوه توک سر که شهر اونه سر بنا بوبوُ بو، بَبوردن تا اونه از اورای جیر تؤدَن.

³⁰ امّا عیسی ایشونه میئنای ردّ بؤ و بوشُو.

دیو بزِه مَرداک شفا

³¹ بازین عیسی کفر ناحوم سو، یکته از جلیلِ شهرون میئن، بُشو و شنبه روز میئن مَردم آموتنِ به دس بکارَ بؤ.

³² اوشون اونه آموتنِ أمره ماتَ بوئن، چونکه اونه گبون میئن قدرت هنّه بو.

³³ عبادتگاه میئن، یکته دیوبزه مَرداک ایسابو که پلید روح داشت. او مردکه ژگله اَمره بوته:

³⁴ «اَی عیسای ناصری، تو امه اَمره چی کار دئنی؟ بومای اَمَره سر به نیستا کونی؟ دؤنیم تو کیسی تو او قدوس خُدائی!»

³⁵ اما عیسی پلید روحَ تَشَر بزِه و بوته: «تام بزَن و او مرداک جی بیرون بیه!» یدفاری دیو، او مَرداک همکس چیشمون جلو به گِل بزه و بی اونکه اونه آسیب بزنی، اونای بیرون بومه.

³⁶ مَردم همه غاغه بؤئن و همدیگره گوتن: «ایی چوطو گُفتاری ایسّه؟ او قدرت و ایختیار امره پلید روحؤن فرمون دِئنه و اوشونم بیرون هَنن!»

³⁷ هیطو بو که اونه کارون خبر تمام او منطقه میئن فیبیته.

پطرسَ زومئرشفا و خیلی أن دیگه

³⁸ عیسی عبادتگای بیرون بومه و شعمون خونه سو بُشو. شَمعون زومئر خیلی تب داشت و ناخوش بو. پَس، عیسی جی بخواسّن اونه شفا بدای.

³⁹ عیسام اونه سر جؤر هچیمسه و تبِ تَشَر بزِه، و اونه تب قطعَ بو. او درجا ویرسا و مشغولِ مِیمؤن دأری بوبوُ.

⁴⁰ غروب دمی، مردم تمؤم خوشون کسؤنی که جورواجور ناخوشی داشتنِ، عیسی ورجه بأردن، عیسام تمام اوشون سر دَس بنه و همته شفا بَدَه.

⁴¹ دیوون هم خیلی ان جَی بیرون أمَئن و فریاد زئن و گوتَن: «تو خُدا ریکه ایسّی!» امّا عیسی اوشونه تَشَر زی و نوگذاشت گب بزَنن، چونکه دؤنَسن که مسیح موعود ایسّه.

عیسی موعظه گودن عبادتگاه میئن

⁴² صوبه دمؤن، عیسی یکته دوردکته جیگه بُشو. امّا مَردم اونه دومبال گشتن و چون او جایی که ایسّابو برسئن، تقلّا بودَن نوگذارَن اوشونه ورجای بشی.

⁴³ ولی عیسی اوشونه بوته: «مو باید خُدا پادشایی، ایی خوروم خبر دیگر شهرؤنِ به هم برسونم، چرِه که اینه به سرا دا بوبؤم.»

⁴⁴ پَس او موعظه گودنِ یهودیه عبادتگاأنِ میئن دومباله بده.