لوقا 13 - کتاب مقدس به زبان گیلکی - گویش شرقیتوبه بکونین یا هلاکَ بین 1 هو زمون میئن، بعضی أن که اوره ایسابون، جلیلِئناجی عیسی أمره گب بزِئن که پیلاتُس اوشون جوری بکوشته بو که اوشون خون، خوشونِ قربانی انِ خونِ امره قاطی بوبؤ بو. 2 عیسی بوته: «گَمؤن کوئنین او جلیلی انی که به ایی روز دکتن، جلیل بقیه مردومونَ جی گنُاهکارتر بوئن؟ 3 شمره گونَم که ایطوری نیه. بَلکه اَگه توبه نکونین، شمرم همته هَلاکَ بنین. 4 یا گُمون کوئنین او هجده نفر که سْیلوآم بُرج اوشون سَر فگرسه و بکوشته بوبؤن، دیگر مردومؤنِ اورشلیمَ جی گُناهکارتَر بوئن؟ 5 شمره گونَم که ایطوری نیه. بَلکه اَگه توبه نکونین، شمرم همته هلاکَ بنین.» 6 بازین ایی حیکایت بأرده: «یکته مَرداک خوشِ انگورباغ میئن یکته انجیل دار بکاشته بو. هیطو که خواس دارِ بارَ بچینی، هیچّی اونه سَر نیاته. 7 پَس خوشِ باغبونِ بُوته: ”سُه سال ایسّه که ایی دار بارِ چیئِن به هنم امّا هیچّی گیر نابِئنم. اونه ببین، چره خاک هَدَرَ شی؟“ 8 امّا باغبون جواب بَدَه: ” آقا، بدار یه سال دیگرم بومؤنی. اونه دورِ کبِئنَم و اونه کُود دِئنم. 9 اَگه سال دیگه بار بارده که هیچّی؛ اَگه نارده اونه ببین.“» علیل زنأکِ شفا 10 یکته از مقدس شنبه روزؤن، عیسی یهودی أنِ عبادتگاه میئن مردوم آموت. 11 اوره زناکی ایسابو که یکته روح اونه هیجده سال علیل بوده بو. هچیمسه بو و هیچ جوره منیس راست بیسی. 12 وختی که عیسی زناک بدِه، اونه دوخونده و بوته: «زناک، تی معلولیتای خلاصَ بوی!» 13 بازین زناک سر دَس بنا و او یدفاری راست بیسه خُدا ستایش بوده. 14 امّا عبادتگاه پیلتر، از اوره که عیسی شنبه میئن شفا بَدَه بو، برزخ بؤ و مَردم بوته: «شش روز کار گودنِ به دئنین. او روزؤن میئن باین و شفا هگیرین، نه شنبه میئن.» 15 عیسای خُداوند بوته: «ای دوروئون! هیّته از شمه شَنبه میئن شیمه گاو یا الاغِ گئچه مئنای بازا نوکُئنه تا آو دئنِ به بیرون بَبَره؟ 16 نباستی ایی زناکم که ابراهیم لاکو ایسّه و شیطؤن هجده سال اونه اسیر بوده بو، شنبه میئن ایی گرفتاری جی سرادائن؟» 17 وختی عیسی ایی چیزونِ بوته، اینه مخالفون همته شرمنده بوبؤن، امّا جمعیت همته اونه پیله کارونای شاد بوئن. خردل دنه حیکایت و خمیرمایه حیکایت 18 هووخت عیسی بوته: «خُدا پادشایی چیهِ مؤنه؟ و اونه بوگوم چی مورسؤن ایسّه؟ 19 خردل دنه مورسون که یکته مَرداک اونه ویته و خوشِ باغ میئن بکاشته. او دنه سبزَ بو و یکته دار بوبوُ، جوری که آسمؤن پرنده أن بومئن و اونه خالؤنِ میئن فَک بساتَن.» 20 هَنده بوته: «خُدا پادشایی بوگوم چی مورسؤن ایسه؟ 21 هیطو خمیرمایه مورسونی ایسّه که یکته زناک ویته و سُه ته کیسه آرد امره قاطی بوده تا خمیر قشنگ واج بومه.» تَنگ در 22 عیسی اورشلیم راه میئن، شهرون و دهاتون سو شو و مردوم آموت. 23 ایی میئنه، یه نفر اونای بپورسه: «آقا، مردومونی که نجات پیدا کوئنَن کم ایسّن؟» ایشونه بوته: 24 «تقلّا بکونین تا تَنگ درای دیرون بشین، چونکه شمره گونَم، خیلی ان اونه دومبالن تا دیرون بوشُن، امّا منّئن. 25 وختیکه صابخونه ویریسی و درِ دَوَدی، بیرون ایسنین، درِ کُوتبِئنین و گونین: ”آقا، در امه به بازَ کون!“ امّا او جواب دِئنه، شَمرَه نشناسنم نودؤنَم کوره شی ایسّین.“ 26 اوموقع شمه گونین: ”اَمه تی أمره بُخوردیم و وودوشتیم و تو اَمره أمه کوچه أن میئن آموتی.“ 27 امّا او گونه: ”شَمره نشناسنم؛ نودؤنَم کوره شی ایسّین. ای شرورون می جَی دورَ بین!“ 28 هوموقع اوره ونگ زِئنین و شیمه گَازِ گازَ سر سوئنین، چونکه ابراهیم و اسحاق و یعقوب و همۀ پیغمبرونِ، خُدا پادشایی میئن اینین، امّا خودِتونِ بیرون دینین. 29 مَردم، شرق و غرب و شمال و جنوبای هَنن و خُدا پادشایی سفره سر نیشَنن. 30 بله، ایسَئن بعضی أن که آخر ایسّن، اول بنن و بعضی أم اوّلن که آخر بنن.» عیسی ماتم اورشلیم واسه 31 هو زمونِ میئن، چَن نفر از فرَیسیون فرقه عالِمون عیسی ورجه بومئن و بوتَن: «اِرای بشو یجای دیگه، چونکه هیرودیس خوائنه تَه بکوشی.» 32 عیسی بوته: «بشین و او شالِ بگین: ”ایمروز و فردا دیوؤنِ بیرون کوئنم و مَردمَ شفا دِئنَم، و سوم روز میئن می کارِ به آخر رسونبِئنَم. 33 با ایحال ایمروز و فردا و پَس‌فردا باید می راهِ بوشوم، چونکه ممکن نیِه، یکته پیغمبر اورشلیم بیرون بکوشته ببی.“ 34 ای اورشلیم، ای اورشلیم، ای که پیغمبرؤنِ کوشنی و رسولونی که تی سو سرا دا بننِ سنگسارَ کوئنی! چَن بار خواسَّم کولوشکن مورسؤن که خوشِ چیره کؤنِ خوشِ بال و پرِ جیر جومَه کوئنه، تی زاکؤنِ جومَه کونَم، امّا نخواسّی! 35 بَین، شیمه خونه ویلا گوده بومونسه مؤنه. و شمره گونَم که دِه مَه نَینین تا او روز که بوگوین: ”مُبارک ایسّه اونی که خُداوند ایسم امره هنه.“» |
@ 2024 Korpu Company