یوحنا 9 - کتاب مقدس به زبان گیلکی - گویش شرقی

عیسی یکته کورِ مادرزادِ شفا دِئنه

¹ عیسی راه میئن شؤدبو که یکته کورِ مادرزادِ بدِه.

² شاگردؤن اونای بپورسئن: «اوستاد، کی گوناه بوده که ایی مردکای کور بدونیا بومه؟ خودُش گوناه بوده یا اونه پئر و مئر؟»

³ عیسی جواب بدا: «نه ایی مردکه گناه بوده و نه اونه پئر و مَئر؛ بلکه ایطوری بوبُو تا خدا کارؤن اونه میئن آشکار ببی.

⁴ تا روز ایسّه، بأء می سرا داکه کارؤن انجوم بدیم؛ شؤ نزدیک بؤدره که هیشکس اونه میئن منئه کار بکونی.

⁵ تا زمؤنی که دونیا میئن ایسَم، دونیا نور ایسّم.»

⁶ عیسی ایی چیزؤنِ بوته و زمین سر فیلی فوده، گِل چاگوده و اونه او مردکه چیشمون سر بمألسه.

⁷ و او مردکاکه بوته: «بشو سیْلوآم حوضِ میئن بوشُور.( سیْلوآم یعنی سرادا )» پس او کورِ مردکای بوشو و بوشوسته و اوراجی بینا وگرسه.

⁸ همسایه أن و اوشؤنی که قبلاً اونِ گدايی موقع بدِه بُوئن، بپورسِئن: «مگه ایی هو مردکای نییه که نیشت و گدايی گود؟»

⁹ بعضی أن گوتَن: «هونه.» بعضی دیگه أم گوتَن: «هونه مورسؤنِ.» ولی خودوش هیطو گوت: «مو هو مرداکم.»

¹⁰ پس اونای بپورسِئن: «چوطو تی چیشمؤن بازَ بوُ؟»

¹¹ او جواب بدا: «یکه مرداک به ایسم عیسی، اَنی گِل چاگوده و​می چیشمون سر بمالسه و بوته: ”بشو سیْلوآم حوضِ میئن و بوشُور.“ پس بوشوم و بوشوستم و بینا بوبوم.»

¹² اوشؤن او مردکای بپورسئن: «او کورَه ایسَه؟» جواب بدا: «نودؤنم.»

¹³ پس او مردکاکه که قبلاً کور بو، فریسی أن فرقه عالمونِ ورجه بأردَن.

¹⁴ او روز که عیسی گِل چاگوده و اونه چیشمونِ وأگوده، مقدس شنبه بو.

¹⁵ پس فریسی أن هنده اونای بپورسِئن که چوطو بینا بوبؤ. جواب بدا: «می چیشمونِ سر گِل بمالسه و بوشوستم و الؤن اینَم.»

¹⁶ پس یسری از فریسی أن بوُتن: «ایی مردکای خدا طرف جَی نییه. چونکه مقدس شنبه قانونِ عمل نوکوئنه، ولی بقیه بوُتن: «چوطو یکته گوناهکار آدم، تینه ایجور نیشونه و معجزه أنِ انجوم بدای؟» و اوشونِ میئن اختلاف دکته.

¹⁷ پس یبار ده او کورِ مرداکای بپورسئن: «تو خودت اونه باره چی گونی؟ چونکه او تی چیشمونِ واگوده.» او بوته: «او یکته پیغمبرِ.»

¹⁸ یهودی أنِ پیله ترون باور نداشتن که او کور بو و بینا بوبُو. تا اونکه اونی که خو بیناییی بدست بارده بو پئر و مئرِ دوخُندن.

¹⁹ و اوشونای بپورسِئن: «ایی شیمه ریکاکَه، هونی که گونین کور بزاسه بوبؤ؟ پس چوطو الؤن تینه بَینی؟»

²⁰ او مردکاکه پئر و مَئر جواب بدئن: «دؤنیم که اَمِه ریکَه و اینم دؤنیم که کور بزاسّه بوبؤ.

²¹ اَما نودؤنیم که الؤن چوطؤ اینه و نودؤنیم کی اونه چیشمونِ وأگوده. خوشَ جی بپورسین. او دِه پیلّه بوبؤ و خودش تینه خوشِ باره گب بزنی.»

²² او مردکاکه پئر و مَئر هینه وَسه ایطوری گوتَن که یهودیِ أنَ جی ترسه أین. چونکه یهودیِ أن پیشتر همدیگر أمره توافق بُوده بوئن هرکس اعتراف بکونی عیسی هو مسیح موعود ایسّه، اونه عبادتگاهَ جی بیرونَ کونن.

²³ هینه واسه بو که اونه پئر و مَئر بوُتن: «او دِه پیلّه بوبؤ؛ خوشاجی بپورسین.»

²⁴ پس یبار دِه او مردکاکه که قبلاً کور بو، دوخُندَن و اونه بوُتن: «جلالِ به خدا بدی! أمه دؤنیم که او یکته گوناهکارِ مردکۀ.»

²⁵ جواب بدا: «نودوؤنم که او گوناهکار ایسّه یا نه. فقط یه چیزه دؤنم و او اینه که کور بوم و الؤن اینَم.»

²⁶ فریسی أن او مردکاکای بپورسِئن: «تی أمره چی بوده؟ چوطو تی چیشمونِ واگوده؟»

²⁷ او مردکای جواب بدا: «مو که شمره بوُتم، ولی شمه گوش نکونین؛ چرِء خوائنین دومرته بشتؤئین؟ مگه شَمَرَم خوائنین اونه شاگرد ببین؟»

²⁸ اوشؤن اونه فُحش بدَئن و بوُتن: «تو اونه شاگردی! أمه موسای پیغمبر شاگردیم.

²⁹ اَمه دؤنیم خدا موسی اَمره گب بزه. ولی نودؤنیم ایی مرداک کورَ جی بومَه.»

³⁰ او مردکه اوشؤن جواب بده: «تعجّبیه! شمه نودؤنین کورَ جی بومَه، با ایی حال او می چیشمونِ وأگوده.

³¹ اَمه دؤنیم که خدا گوناهکارون دعا نشتؤنه، ولی اگه ینفر خداپرست ببی و اونه خوأسته‌ انجوم بدای، خدا اونه دعا أیشتؤنه.

³² از اول دونیا تا الؤن بشتؤسه نوبوُ کسی یکته کورِ مادرزاد چیشمون وأ کونی.

³³ اگه ایی مردکای خدا طرفای نبو، کاری منیس بکونی.»

³⁴ ایشون اونه جواب بدئن: «تو سرتاپا گوناه میئن بدونیا بومای. الؤن اَمرهم درس دأدری؟» پس اونه بیرون تؤدَن.

³⁵ وختی عیسی بشتؤسه که او مردکه بیرون تؤدَن، اونه پیدا گوده و اونای بپورسه: انسون ریکه ایمؤن دَئنی؟

³⁶ او جواب بدا: « آقا، بگو کی ایسّه تا اونه ایمؤن بأرم.»

³⁷ عیسی اونه بوته: «تو اونه بدِ​ی! او هوني ایسّه که الؤن تی اَمره گب زِئدره.»

³⁸ بوته: «آقا، ایمؤن دَئنم!» و اونه پرستش بوده.

³⁹ عیسی بوته: «مو ایی دونیا میئن بومَئم تا داوری بکونم که کورؤن بینا بوبؤئن و بیناأن کورَ بؤئن.»

⁴⁰ بعضی از فریسی أن که اونه ورجه ایسابون هیطوکه اینه بشتؤسَن، بپورسئن: اَمَرَم کوریم؟»

⁴¹ عیسی ایشؤنه بوته: «اگر کور بین، تقصیری نداشتین؛ ولی الؤن گونین که اینین، تقصیرکار باقی مؤنین.»