یوحنا 7 - کتاب مقدس به زبان گیلکی - گویش شرقی

عیسی عیدِ خیمه أن به شنه

¹ بازین عیسی چندوخت جلیل ولایت میئن گردَس. او نخواسّ یهودیه ولایت میئن بیسی، چونکه یهودی أن اونه کشتن دومبال بوئن.

² عیدِ خیمه​أن که یهودی أنِ یکته عید بو، نزدیک بوُ،

³ پس عیسی برأرؤن اونه بوُتن: «اِره نیس و بشو یهودیه، تا تی شاگردؤنم کارؤنی که کوئنیِ، بَینَن،

⁴ چون هر کی خوأئنه بشناخته ببی، خلوتی میئن کار نوکُوئنه. تو که ایی کارؤن کؤئنی، تَه دونیا نیشون بدی.»

⁵ چونکه حتی اونه برأرؤنَم اونه ایمؤن نأرده بُوئن.

⁶ عیسی اؤشونِ بوته: «حلِه می وخت نرسه، ولی شیمه بِه هر وختی مناسب ایسّه.

⁷ دونیا منئه شمرای متنفر ببی، امّا می جَی متنفره، چونکه مو گوایی دِئنم که اونه کارؤن، بَد ایسّه.

⁸ شمه عیدِ به بشین. مو الون ایی عیدِ نأنَم، چونکه می وخت حلِه کامیل نرسه.»

⁹ عیسی اینه بوته و جلیل میئن بیسه.

¹⁰ ولی بعدِ اونکه اونه بَرأرؤن عید وسه بوشؤئن، خودشم بوشو، ولی نه آشکارا، بلکه خفا میئن.

¹¹ یهودی أن، عیدِ موقع اونه دومبال گشتن و پورسِئن: «او مردکه کورا ایسا؟»

¹² و مردم میئن عیسی باره خیلی میسمیره بو. بعضی​أن گوتَن: «یکته خوروم مرداکِ» اما یسری دیگرم گوتَن «نه، بلکه مردمِ گمراهَ کوئنه.»

¹³ ولی چونکه یهودی أنَ جی واهیمه داشتن، هیشکس اونای آشکارا گب نزی.

¹⁴ وختی که نیصف عید بوگذشته بو، عیسی معبد صاراکی مِیئن بومَه و بنا بوده مردومِ آموتَن.

¹⁵ یهودی أن ماتَ بوئن و بپورسِئن: «ایی مردکای که هرگی دین درس یاد نَیته، چطو تینه ایجور علم بدأری؟»

¹⁶ پس عیسی اوشونه جواب بده: «ایی چیزونی که شمره آموجنِئنَم، می جَی نییه، بلکه اونای ایسّه که مه سرا دا.

¹⁷ اگه کسی خوائنه که خدا اراده‌ انجوم بدای، اونه که فَهمنه که ایی تعلیمؤن خدا جَی ایسه یا اونکه مو می جَی گونم.

¹⁸ اونی که خوشَ جی گونه، خوشِ جلالِ دومبالِ، امّا اونی که خوأنه خوشِ سرا دائن کسِ جلال بدای، راست گونه و اونه میئن هیچ دروغی ننأ.

¹⁹ مگه موسای پیغمبر، شریعتِ شمره هَنده؟ با ایی حال هيچكدوم از شمه اونه عمل نوکُوئنه. چرِء اینه دومبالین که مه بکوشین؟»

²⁰ مردم جواب بدئن: «تو دیو بزه ایسّی، کی​ایسه که تی کشتنِ دومبال ببی؟»

²¹ عیسی اوشؤنِ جواب بده: «مو یکته کار بودَم و شمه همته او کارای حیرونَ بوین.

²² موسی خَتَنه گودنِ حکم شمره هدَه -البته ایی موسی طرفای نبو، بلکه اجداد قوم جی بو- و هینه واسه شمه ریکاکونِ مقدس شنبه روز میئنم ختنه کؤنین.

²³ اگه یکته آدم مقدس شنبه روز میئن ختنه بنه تا موسی شریعت زیر پا بنه نبی، پس چرِء اینه وسه که تمؤم یکته آدم جؤنِ گینِ مقدس شنبه روز میئن سلامتی ببخشِئم برزخَ بوئین؟

²⁴ ظاهیرَ جی قضاوت نکونین، بلکه به حق قضاوت بکونین.»

مگه بنه او مسیح ببی؟

²⁵ بعضی از اورشلیم مردوم بوُتن: «مگه ایی هونی نیه که اونه کوشتنِ دومبال ایسَّن؟

²⁶ بینین چوطو آشکارا گب زئنه و اونه هیچی نگونَن! بنه که پیله ترونِ قوم واقعا بفَهمسن که ایی، هو مسیح موعود ایسّه؟

²⁷ اَمه دؤنیم که ایی مردکه کورای بومَه، ولی وختی که مسیح موعود ظهور بکونی، هیشکس نودؤنه که کورای بومَه.»

²⁸ هووخت عیسی آموتن موقع معبدِ میئن، پیله صدا أمره بوته: «مه شنأسنین و دؤنین که کورای بومَئم، ولی مو مِه به نومَئم، اونی که مه سرا دا، حقّ ایسّه، و شمه اونه نشنأسنین.

²⁹ امّا مو اونه شنأسنم، چونکه مو اونه طرفَ جی بومَئم و او مه سرا دا.»

³⁰ پس اوشون اینه دومبال بوئن که عیسی، دستگیرَ کونَن، ولی هیشکس اونه دست درازی نؤده، چونکه حلِه اونه وخت نرسه بو.

³¹ با ایی حال خیلی از او جماعت، عیسی ایمؤن بأردن. اوشؤن گوتَن که: «مگه وختی مسیح موعود بائ، ایی مردکه جی بیشتر نیشونه و معجزه انجوم دِئنه؟»

³² فریسی فرقه عالمون گوش برسه که مردم عیسی باره ایجور گبونِ زِئدرن، پس کاهنون سرون و فریسی أن، معبدِ نیگهبونؤنِ سرا دَئن تا اونه بگیرَن.

³³ هووخت عیسی بوته: «اَنی دِه شیمه اَمره ایسَم، و بازین می سرا دا کسِ ورجه شنَم.

³⁴ می دومبال گردنین، امّا منئِین مه بیاجین، و او جایی که مو ایسَم، شمه منیئن بأین.»

³⁵ پس یهودی أن همدیگره گوتَن که: «ایی مردکه کوره خوأنه بشی که أمه منیئم اونه بیاجیم؟ خوأئنه یهودی أن ورجه که یونانی أنِ میئن پخشَ بوئن بشی و یونانی أن باموجی؟

³⁶ اونه منظور چی بو که بوته «”می دومبال گردنین، ولی مَه منئین بیاجین؛ و او جایی که مو ایسَم، شمه منیئن بأین“؟»

روخونه ای که زندگی آؤِ هدِئنه

³⁷ آخری روز که عیدِ مهمترین روز بو، عیسی بیسَه و پیله صدا أمره فریاد بزه: «هر کس تشنَه ایسه، می ورجه بائ و وودوشی.

³⁸ هر کس مَه ایمؤن بأره، هوطو که مقدس کیتابون گونن، اونه دیل مئنای، آؤی که زندگی هدِئنه، روخونه مورسؤن راه دکِئنه.»

³⁹ عیسی ایی گبِ روح القدس باره بوته، که کسؤنی که اونه ایمؤن بأرَن، اونه هگینن. چونکه روح القدس حلِه ببخشه نوُبو بو، هینه وسه که عیسی حلِه جلال هینته بو.

⁴⁰ بعضی از مردوم ایی گبؤن أیشتؤسنه أمره گوتَن که، «راست راستِ ایی مردکه هو پیغمبری ایسّه که موسی وعده بده بو هنه.»

⁴¹ دیگرؤن گوتَن: «مسیح موعود ایسّه.» امّا یه دسته دیگه بپورسِئن که: «مگه مسیح جلیلَ ولایتَ جی هنه؟

⁴² مگه مقدس کیتابؤنِ میئن نوته که مسیح داوود پادشاه نسل ایسّه و بِیت‌لِحِم جی، دهاتی که داوود اون میئن زندگی گود، ظهور کوئنِه؟»

⁴³ پس عیسی وسه مردمِ میئن اختلاف دکته.

⁴⁴ یسری أن خواسّن اونه بگیرن، امّا هیشکس اونِ دست درازی نؤده.

⁴⁵ بازین معبد نیگهبؤنؤن، وَگرسن کاهنؤن سرؤن و فریسی أن ورجه. ایشون، معبد نیگهبونونای بپورسِئن: «چرِء عیسی نأردین؟»

⁴⁶ نیگَهبونؤن جواب بدئن: «تا الؤن ایی مردکه مورسؤن هیشکس گب نزه!»

⁴⁷ فریسی أن بوُتن: «مگه شَمَرَم گول بخوردین؟

⁴⁸ مگه پیله ترون قوم یا فریسی أنَ جی کسی ایسأ که اونه ایمؤن بارده بی؟

⁴⁹ ولی ایی جماعت که هیچی شریعتای نودؤنَن، ملعون ایسَّن.»

⁵⁰ نیقودیموس، که پیشتر عیسی ورجه بوشوبو و یکته از فریسی أن بو، بوته:

⁵¹ مگه امه شریعت، کسیه محکوم کؤنه بدون اونکه اوّل گبی اوناجی بشتؤئی و بفهمی که چی بوده؟»

⁵² اوشون جواب بدَئن: «مگر تنم جلیلِ ولایت شی ایسّی؟ بگرد و بَین که هیچ پیغمبری جلیلای نومَه.»

⁵³ بازین هرکس بوشؤ خوشِ خونه.