یوحنا 21 - کتاب مقدس به زبان گیلکی - گویش شرقی

عیسی آشکارا بؤنِ خو هفت ته شاگردؤن به

¹ بعدِ ایی اتفاقون، عیسی یه بار ده تیبریه دریا کنار ورجه که هو دریای جلیل ایسّه، خوشِ، شاگردؤن بِه آشکارَ گوده. او خوشِ ایطوری آشکارَ گوده:

² شمعونِ پطرس، تومای نامدار به دوقلو، نتنائیل که قانای جلیل شی بو، زبدی ریکه أن، و دوته از شاگردؤن دیگه همدیگر أمره ایسابُوئن.

³ شمعون پطرس اوشون بوته: «مو شوئد​رم ماهی بگیرم.» اوشؤن بوُتن: «أمَرَم تی اَمره هنیم.» پس بیرون بوشؤئن و نو سواره بوئن. امّا او شؤ هیچی نیتَن.

⁴ صوبه دم، عیسی دریا کنار ایسابو؛ امّا شاگردؤن نفهمسن که عیسی ایسّه.

⁵ او اوشونه بوته: «زأکؤن، هیچی خوردنِ بِه ندئنین؟» جواب بدئن: «نه!»

⁶ بوته: «سالیِ تؤداین نوِ راست طرف که گینین.» اوشؤن هی کارِ بودَن و فراوونیِ ماهی جَی منیسَن سالیِ نو میئن هکشن.

⁷ شاگردی که عیسی اونه دوست داشت، پطرس بوته: «خداوند ایسّه!» شمعون پطرس هیطو که بشتوؤسه او خداوند ایسّه، خوشِ رختِ خوشِ دور فیبیته – چونکه ماهی گیتنِ وسه خو رختِ بکنده بو- و خوش دریا میئن تؤوده.

⁸ امّا بقیه شاگردؤن نو اَمره بومئن، در حالی که سالیِ ای که ماهی جَی پور بو خوشؤنِ اَمره هکشه دبون. چونکه اوشون خشکی أمره دوروبرِ صدمتر فاصله داشتن.

⁹ وختی دریاکنارِ برسئن، بدِئن که یکته آتش زغال اَمره بل بیته ایسّه و ماهی​هم اونه سر هنّه، و نونَم هَنّه بو.

¹⁰ عیسی ایشؤنه بوته: « چنته او ماهی​أنی که الؤن بِیتین، بأرین.»

¹¹ شمعون پطرس، نو میئن بوشؤ و سالیِ خشکی میئن هکشه. سالی، پیله ماهی أنَ جی پورا گوده بو، صد و پنجاه و سه ته ماهی. با اونکه ماهی أن خیلی زیاد بوئن، سالی پارَه نوُبؤ بو.

¹² عیسی ایشؤنِ بوته: «بأین صوبونه بوخورین.» شاگردون هیتّه جرأت نؤدَن اونای بپورسن «تو کی ایسّی؟» چونکه دونَسَن او خداوند ایسّه.

¹³ عیسی جلو بومَه و نون و ماهیِ ویته و اوشونِ هَده.

¹⁴ ایی سومین بار بو که عیسی زنده بوبو پس مرده أنِ جَی، خودوشِ شاگردؤنِ بِه آشکارَ گود.

عیسی گب زِئن پطرس اَمره

¹⁵ صُبونه بوخورده پس، عیسی شمعونِ پطرسای بپورسه: «شمعون، یونا ریکه، مه بیشتر از ایشون دوست دئنی؟ شمعون پطروس جواب بدا: «بله آقا؛ تو دؤنی که تَه دوست دَئنم!» عیسی اونه بوته: «می برّه​أنِ غذا بدی.»

¹⁶ دوّمین بار عیسی اونای بپورسه: «شمعون، یونا ریکه، مه دوست دئنی؟» جواب بده: «بله آقا؛ دؤئنی که تَه دوست دَئنم.» عیسی بوته: «می گوسندونِ چوپؤنی بکون.»

¹⁷ سُومی بار اونه بوته: «شمعون، یونا ریکه، مه دوست دَئنی؟» پطرس اورهَ جی که عیسی سه بار اونای بپورسه که مه دوست دَئنی، ناراحتَ بوُ و جواب بدا: «آقا؛ تو همه چی خبرِ دئنی؛ تو دؤئنی که تَه دوست دَئنم.» عیسی بوته: «می گوسندونِ غذا هَدی.

¹⁸ راست، راستِ، تَه گونم، زمؤنی که جوونتر بی، تی کمر دوَسّی و هر جا که خوأستی شوی؛ امّا وختی که پیرَ بی، تی دستؤنِ بازَ كوئنی و ینفر دیگه تی کمرِ دَودنه، اوره که نخؤانی، تَه بِئنه.»

¹⁹ عیسی ایی گبِ بزه تا پطروس بودونی که چوطو مینه و خو موردنِ اَمره خدا جلال دِئنه. بازین عیسی اونه بوته: «می دومبال بیه.»

²⁰ هووخت پطرس وگرسه و بدِه که او شاگردی که عیسی اونه دوست داشت، اوشؤنِ دومبالسر أَمَئدَره. او هونی بو که شام موقع عیسی سینه سر تکیه بدا بو و بپورسه بو که: «آقا، کی​ایسه که تَه دشمن دست هدِئنه؟»

²¹ وختی پطرس اونه بدِه، عیسی جَی بپورسه: «آقا، پس او چی بنه؟»

²² عیسی اونه بوته: «اگه بخوأم او تا می وَگرسن موقع بَیسی، به تو چی؟ تو می دومبال بیه!»

²³ پس ایی گب برارون میئن دکته که او شاگرد نمینه. با ایی حال عیسی پطرس نوته که او شاگرد نمینه، بلکه بوته: «اگه بخوام او تا می وگرسن موقع بَیسی، به تو چی؟»

²⁴ ایی هو شاگرده که ایی چیزؤنِ بِه گوایی دِئنه، و ایشؤنِ بنویشته و اَمه دؤنیم که اونه گوایی راست ایسّه.

سرآخر

²⁵ عیسی خیلی کارؤن دیگرم بوُده، که اگه یکته - یکته بنویشته بوبُوبی، فکر نوکؤنَم حتّی تموم دونیا کتابونم اونه بنویشته أنِ جا بداشتبی.