یوحنا 18 - کتاب مقدس به زبان گیلکی - گویش شرقی

عیسی گینن

¹ عیسی ایی گبونِ بزه پس، خوشِ شاگردؤنِ اَمره اوطرف دره قِدْرون بوشو. اوره یکته باغ هنّه بو، عیسی و اونه شاگردؤن او باغ میئن بوشؤئن.

² یهودا، او کسی که عیسی خیانت بوده بو، او محل جا دؤنَس، چونکه عیسی و اونه شاگردؤن معمولا، اوره جومَه بوئن.

³ پس یهودا یکته دسته از سربازؤن و مامورؤن سرون کاهنؤن و فریسی أنِ فرقه عالمون ویته و اوره بومَه، اوشؤن فانوس و مشعل و شمشیر و کولاکت اَمره اوره برسِئن.

⁴ عیسی با اونکه دؤنس چی خا اونه سر بای، پیش بوشو و اوشونه بوته: «کی بِه گردنین؟»

⁵ اوشؤن جواب بدئن: «عیسای ناصری.» بوته: «مو ایسّم.» یهودا، اونی که عیسی خیانت بوده بو هم اوشونه اَمره ایسابو.

⁶ هیطوکه عیسی بوته: «مو ایسّم»، اوشؤن پساپسا بوشؤن و بگل بوخوردن.

⁷ عیسی یبار ده اوشؤنای بپورسه: «کی دومبال گردنین؟» اوشؤن بوتَن: «عیسای ناصری.»

⁸ عیسی جواب بدا: «شمره بوُتم که مو ایسّم. پس اگه می دومبال گردنین، بوگزارین ایشون بوشؤئن.»

⁹ عیسی اینه بوته تا اوچیزی که پیشتر بوته بو، حقیقت پیدا کؤنی که «هیتّه از اوشؤنی که مه ببخشی، از دست ندَئم.»

¹⁰ هووخت شمعون پطرس شمشیری که داشتِ هَکشِه و یکته ضربه، پیله کاهن خدمتکار بزِه و اونه راست گوشِ ببِئه. او خدمتکار ایسم مالخوس بو.

¹¹ عیسی پطرسِ بوته: «تی شمشیرِ غلاف کون! مگه نبأید او پیاله​ای که پئر مه هَدأ، وودوشَم؟»

¹² بازین سربازؤن، خوشؤنِ فرمانده و یهودی أن مامورؤن اَمره، عیسی بیتَن. اوشؤن عیسی دستِ دَوَسّن.

¹³ اول اونه حَنّا ورجه ببوردَن. چونکه حَنّا، قیافا زوپئر بو و قیافا هو سال، قومِ پیله کاهن بو.

¹⁴ قیافا هونی بو که یهودی أنِ سرونِ نصیحت گود و گوت که بهترِه، یه نفر قوم وسه بمیری.

پطروس عیسی حشا کوئنه

¹⁵ شمعون پطرس و یکته شاگرد دیگه عیسی دومبالسر راه دکتن. چون او شاگرد پیله کاهن آشنا بو، بوتونسه عیسی أمره پیله کاهِن خونه صاراکی میئن بشی.

¹⁶ ولی پطرس دَرِ پشت بیسأ. پس او شاگرد که پیله کاهِنِ آشنا بو، بیرون بوشو و یکته کلفَتِ اَمره که دربون بو، گب بزِه و پطرس دیرون ببورده.

¹⁷ هووخت او كُلفتی که دربؤن بو پطرسای بپورسه: «مگه تو او مرداکِ یکته از شاگردؤن نیی؟» پطرس جواب بدا: «نییَم!»

¹⁸ هوا سرد بو. خدمتکارؤن و مامورؤن یکته آتش، زغالِ اَمره چاگوده بون و اونه دور جومَه بوُبوئن و خوشؤن گرمَ کادبُوئن. پطرسم اوشؤن اَمره ایسأ بو و خوشِ گرمَ گود.

¹⁹ هووخت پیله کاهن عیسی جَی اونه شاگردؤن باره و اوچی أنی که اوشونه یاد بدابو بپورسه.

²⁰ عیسی جواب بدا: «مو ایی دونیا آدمؤنِ أمره آشکارا گب بزِئم و همیشه عبادتگاه و معبد میئن که یهودی أن اوره جومَه بوئن، آموتم و هیچی خلوتی میئن نوتَم.

²¹ چرِء می جَی پورسنی؟ اوشؤنی جَی بپورس که می گبؤن بشتؤسَن! اوشؤن دؤنَن که مو چی بوتم.»

²² وختی که عیسی اینه بوته، یکته از نیگَهبونؤن که اوره ایسأ بو، یکته چَک اونه دیمه بزه و بوته: «پیله کاهنِ ایطو جواب دِئنی؟»

²³ عیسی جواب بدا: «اگه اشتباه بوُتم، می اشتباه ثابت بکون؛ امّا اگر راست بوُتم چرِء مه زِئنی؟»

²⁴ بازین حَنّا اونه دست دوسّه، پیله کاهن قیافا ورجه سرا دا.

²⁵ هووخت که شمعون پطرس ایسأ بو و خوش گرم کأده بو، بعضی أن اونای بپورسئن: «مگه تو یکته از اونه شاگردؤن نی​ايی؟» او حشا بُوده و بوته: «نه! نییم.»

²⁶ یکته از پیله کاهن خدمتکارؤن که فامیلِ اونی بو که پطرس اونه گوش ببه بو، بوته: «مگه مو، تَه اونه اَمره باغ میئن ندِئم؟»

²⁷ پطرس هنده حَشا بُوده. هووخت تله بوخونده.

عیسی محاکمه پیلاتُس ورجه

²⁸ صوبه دم بو که عیسی، قیافا ورجه جی فرماندار کاخ میئن ببوردَن. اوشؤن خوشؤن، کاخ میئن نوشؤن که نجیسَ نوبؤئن تا بتؤنَن عید پِسَخ شامِ بوخورَن.

²⁹ پس پیلاتُس بیرون بومَه و اوشونای بپورسه: «ایی مرداکِ به چی جرمی متهمَ کأدرین؟»

³⁰ اوشؤن جواب بدئن و بوُتن: «اگه ایی مردکای شرورِ کارؤن نوده بو، اونه تی دست هندَئنَئبیم.»

³¹ پیلاتُس اوشونه بوته: «شمه خودتون اونه ببرین و عین شیمه شریعت حکم اونه محاکمه بکونین.» یهودیِ أن سرؤن بوُتن: «اَمه اجازه ندَئنیم هیشکسِ محکوم به موردَن بکونیم.»

³² هیطو بو که عیسی گب، خو چوطؤ موردنِ به که اونه ریفا ایسابو، حقیقت پیدا گوده.

³³ بازین پیلاتُس وگرسه کاخ مِیئن و عیسی دوخؤنده و اونه بوته: «تو یهودِی أنِ پادشاه ایسّی؟»

³⁴ عیسی جواب بدا: « اینه تو، تِه به گونی یا دیگرؤن می باره ایطو تَه بوتن؟»

³⁵ پیلاتُس جواب بدا: «مگه مو یهودی​یم؟ تی قوم و کاهنؤن سرؤن تَه می دست هَدَئن. چی بُودی​؟»

³⁶ عیسی جواب بدا: «می پادشاهی، ایی دونیا جَی نییه. اگه می پادشاهی ایی دونیا جَی بو، می خدمتکارؤن جنگ گودَن تا مو یهودی أن دستِ میئن دنکَئم. امّا می پادشاهی ایی دونیا جَی نییه.»

³⁷ بازین پیلاتُس عیسی جی بپورسه: «پس تو یکته پادشاه ایسّی؟» عیسی جواب بدا: «تو گونی که مو پادشاهم. مو هینه وَسه بزاسّه بوبؤم و هینه واسه ایی دونیا میئن بومئم تا حقیقت به گوایی بدِئم. هرکس حقیقتِ جی ایسّه، می گب گوش کؤئنه.»

³⁸ پیلاتُس بوته: «حقیقت چی​ایسه.» وختی پیلاتوس اینه بوته، هنده بوشو بیرون یهودیِ أن ورجه و اوشونه بوته: «مو هیچ دلیلی اونه محکوم گودنِ بِه نیاتّم.

³⁹ امّا شمه یکته دأب دئنین که پِسَخ عیدِ به یکته زندؤنیِ شیمه به آزادَ کونَم. خوانین که یهودِی أنِ پادشاه آزادَ کونم؟»

⁴⁰ اوشؤن دومرتِه دادِ أمره جواب بدَئن: «او مرداکِ نه! باراباس آزادَ کون!» باراباس یکته راهزن بو.