یوحنا 11 - کتاب مقدس به زبان گیلکی - گویش شرقی

ایلعازَرِ موردَن

¹ یکته مردکه بایسمِ ایلعازَر ناخوش بو. او بیت عَنْیا دهاتِ مردمؤن جی بو، هو دهاتی که مریم و اونه خاخور مارتا اوره زیندگی گودَن.

² مریم هو زنی بو که خداوندِ پائنه سر روغنی عطر فوده و خوشِ موؤنِ اَمره اونه خوشکَ گوده. اونه برأر ایلعازَر ناخوشَ بؤ بو.

³ پس ایلعازَر خاخورؤن، عیسی بِه پیغؤم سرا دَئن و بوُتن: «آقا، تی عزیز ریفق ناخوشِ.»

⁴ عیسی وختی ایی خبرِ بشتؤسه بوته: «ایی ناخوشی، موردَن اَمره تمنَه نبنه، بلکه خدا جلال وَسه ایسّه تا خدا ریکه بواسطه او، جلال پیدا کونی.»

⁵ عیسی مارتا و اونه​خاخور و ایلعازَرِ دوست داشت.

⁶ پس وختی بشتؤسه که ایلعازَر ناخوشِ، دو روز دیگرم اوجایی که ایسأ بو، بیسأ.

⁷ بازین خوشِ شاگردؤن بوته: «بأین هنده یهودیه ولایت بشیم.»

⁸ اونه شاگردؤن بوُتن: «اوستاد، خیلی نوگذشته که یهودی أن خواسَن تَه سنگسار بکونَن، تو هنده خؤانی اوره بشی؟»

⁹ عیسی جواب بدا: «مگه روز دوازده ساعت نییه؟ اونی که روز میئن راه بشی اینه پا هیچ جا گیر نوکوئنه تا بکّای، چونکه ایی دونیا نور اینه.

¹⁰ امّا اونی که شؤ میئن راه شنه کِئنه، چونکه خوشِ میئن نور ندَئنه.»

¹¹ عیسی بعدِ ایی گبؤن خو شاگردونِ بوته: «امه ریفق ایلعازَر خوته، امّا شَنم تا اونه بیدارَ کونم.»

¹² شاگردؤن اونه بوُتن: «آقا، اگه خوته، خوبَه بنه.»

¹³ عیسی ایلعازرِ موردنای گب زی، ولی اونه شاگردؤن فکر گودَن که عیسی منظور اینه که ایلعازر خوته تا استراحت بکونی.

¹⁴ هو زمون عیسی واضح اوشونه بوته: «ایلعازَر بمورده.

¹⁵ شيمه وَسه خوشحالم که اوره نِیسَه بوم، تا ایمؤن بأرین. امّا الؤن اونه ورجه بشیم.»

¹⁶ پس توما که اونه دوقلو گوتن، اوته شاگردؤن بوته: «باین أمَرَم بشیم و اونه أمره بمیریم.»

قیامت و زیندگی مو ایسّم

¹⁷ وختی عیسی، بیت عنیا دهات برسه، بفَهمسه که چهار روزِ که ایلعازَره مقبره میئن بنئن.

¹⁸ بیت عَنْیا، دوروبرِ سه کیلومتر اورشلیم أمره فاصله داشت.

¹⁹ خیلی از یهودی أن، اورشلیمای مریم و مارتا ورجه بومئبون تا اوشؤنِ برأرِ موردن واسه اوشونِ أمره همدردی بکونن.

²⁰ پس وختی که مارتا بشتؤسه عیسی أمَئدره، اونه پیشواز بوشو. امّا مریم خونه میئن بیسأ.

²¹ مارتا عیسی بوته: «آقا، اگه إرِه ایسأ​بی، می بَرأر نموردنابو.

²² امّا دؤئنم که الؤنم هر چی خدا جَی بخوأی، تَه هدِئنه.

²³ عیسی اونه بوته: «تی برأر دومرته زنده بنه.»

²⁴ مارتا اونه بوته: «دؤنم که قیامت روزِ میئن دومرته زنده بنه.»

²⁵ عیسی بوته: «قیامت و زیندگی مو ایسّم. اونی که مه ایمؤن بأره، حتّی اگه بمیره، هنده زنده بنه.

²⁶ و هر کس زنده ایسّه و مه ایمؤن دئنه، هرگی نمینه؛ اینه باور کؤئنی؟»

²⁷ مارتا بوته: «بله، آقا، مو ایمؤن بأردَم که تو مسیح موعود ایسی، خدا ریکه، اونی که باء ایی دونیا میئن بمابی.»

²⁸ وختی مارتا اینه بوته، بوشو خوشِ خاخور مریم دوخُونده. و خلوت میئن اونه بوته: «اوستاد إرِه ایسأ و تَه دوخُوبِئنه.»

²⁹ مریم وختی اینه بشتؤسه، تأتأدی ویریسا و عیسی ورجه بوشو.

³⁰ عیسی حلِه دهاتِ میئن نومَه بو، بلکه هوجایی ایسأ بو که مارتا اونه دئنِ به بوشو بو.

³¹ یهودی أنی که مریم أمره خونه میئن ایسأ بوئن و اونه أمره همدردی گودن، وختی بدِئن که مریم تأتأدی ویریسا و بیرون بوشو، اونه دومبالسر راه دکتن، فکر گودن که مقبره سر شؤدره تا اوره ونگ بزنی.

³² وختی مریم اوره برسه که عیسی ایسأ بو، اونه بدِه و اونه پاجیر بَکته و بوته: «آقا، اگه إرِه ایسأ​بی، می برأر نموردنابو.»

³³ وختی عیسی، مریم ونگ زئن و یهودی أنی که اونه أمره ایسابؤن بدِه، روحِ میئن خیلی ناراحت و پریشونَ بؤ.

³⁴ عیسی بپورسه: «ایلعازرِ کوره بنأین؟» اوشؤن بوتَن: «آقا، بیأ و بَین.»

³⁵ عیسی چیشمونای اَرسو بکالسه.

³⁶ بازین یهودی أن بوُتن: «بینین چنی اون دوستداشت.»

³⁷ ولی بعضی​أن بوُتن: «کسی که او كوره مردأک چیشمونِ وأگوده، منیس ایلعازَرِ موردنِ جلوئه بگیری؟»

عیسی ایلعازَر زنده کوئنه

³⁸ بازین عیسی، هنده خیلی پریشون بو، مقبره سر بومَه. مقبره، یکته غار بو که اونه دهنه سر یکته سنگ بَنه بوئن.

³⁹ عیسی بوته: «سنگ ویگیرین.» مارتا، او بمورده خاخور بوته: «آقا، الؤن ده بی کوئنه، چونکه چهار روزِ بمورده.»

⁴⁰ عیسی اونه بوته: «مگه تَه نوتَم که اگه ایمؤن بأری، خدا جلال اینی؟»

⁴¹ پس اوشؤن سنگ ویتَن. هوموقع عیسی آسمؤن نیگاه بُوده و بوته: «پِئر، تَه شکر کوئنَم که می صدا بشتؤسی.

⁴² مو دؤنَسم که همیشه می صدا ایشتؤنی. ولی اینه، اوشؤنی وَسه بوُتم که إرِه ایسَئن، تا ایمؤن بأرَن که تو مه سرا دا​ی.»

⁴³ عیسی اینه بوته و بازین پیله صدا اَمره دوخُونده: «ایلعازَر، بیرون بیه!»

⁴⁴ پس او مردکای که بمورده بو، دست و پا کفنِ میئن دوَسّه و یکته دستمال اونه دیم دور فیبیته، مقبره جی بیرون بومَه. عیسی اوشونه بوته: «اونه بازَ کونین و بوگزارین بشی.»

توطئه عیسی کشتنِ به

⁴⁵ پس خیلی از یهودی أنی که مریم دِئن وسه بومَئبون و کاری که عیسی اونه برارِ به بوده بو بدِئن، عیسی ایمؤن بأردن.

⁴⁶ ولی بعضی از اوشون، فریسی فرقه عالمون ورجه بوشوئن و اوشونه از اوچیزی که عیسی بُوده بو، واخُبَ گودن.

⁴⁷ پس کاهنؤن سرون و فریسی أن جلسه بیتَن ، بوتن: «چی بکونیم؟ نشونه أن و معجزات زیادی ایی مردکه جی انجوم بنه.

⁴⁸ اگه بوگذاریم هیطو پیش بشی، همه اونه ایمؤن أَبِئنَن و رومی أن هنن و امه عبادتگاه و امه قومِ، امه دست جَی هگینن.»

⁴⁹ امّا یکته از اوشؤن که اینه ایسم قیافا بو و او سال میئن پیله کاهن بو، اوشؤنِ بوته: «شمه هیچي ندؤنین.

⁵⁰ نفهمین که شیمه صلاح اینه که یه نفر مردومِ وَسه بمیری، تا اونکه تموم ملّت نابودَ بوئن.»

⁵¹ ایی گب قیافا جی نبو، بلکه وختی او سال میئن کاهن اَعظم بو، ایطوری نبّوت بُوده که عیسی ملت وَسه مینه،

⁵² نه فقط ملت وَسه، بلکه خدا همته زاکؤن وسه که پخش ایسّن، جومَه کونی و یکی بکونی.

⁵³ پس، از هو روز، عیسی کوشتنِ به توطئه بودَن.

⁵⁴ هینه وسه دِه عیسی آشکارا یهودی أن میئن شوئون أَمئن نود، بلکه اورای یکته شهر به ایسم اِفْرایم که بیابون نزدیکی بو بوشو و خوشِ شاگردؤن أمره اوره بیسأ.

⁵⁵ یهودی أن عید پِسَخ نزدیکه بوُ، خیلی أن، دورو اطرافَ جی شهر اورشلیم بوشؤئن تا قبل اینکه عیدِ پسخ شروع ببی رسم و رسومِ پاکی بجا بأرَن.

⁵⁶ اوشؤن عیسی دومبال گرسن و هوطو که معبدِ میئن ایسأ بوئن، همدیگرِ گوتَن: «چی فکر کوئنین؟ یعنی اصلا عید بِه نَئنه؟»

⁵⁷ ولی کاهنؤنِ سرؤن و فریسی أن دستور بَده بُوئن که اگر یه کس بودؤنه عیسی کوره ایسأ، باء خبر بَدای تا اونه بگیرَن.