یعقوب 5 - کتاب مقدس به زبان گیلکی - گویش شرقیهشدار دارا آدمؤنِ به 1 اما شمه، ای دارا آدمؤن، گریه و شیون بکونین، چونکه مصیبتون شیمه ریفاه ایسَه. 2 شیمه مال مینال بپیسه و شیمه رختونَ بید بزه! 3 شیمه طلا و نقره میرون بزه، و اوشونِ میرون شیمه ضید گواهی دئنه و هوتو آتش مورسؤن شیمه تن گوشت خوئنه. شمه تا آخری روزؤن میئن مال مینال جومَه گودین! 4 الؤن او کارگرونِ مزد که شیمه زمینون سر درو بودن، و شمه فریبکاری أمره اوشونِ مزد هنداین، شیمه ضید فریاد زئنن و دروکارون فریاد خداوند لشگرونِ گوشِ برسه. 5 شمه زمین سر، ناز و نعمت و عیش و نوش میئن زیندگی بودین، و شیمه دیلؤن کشتار روزِ به، پروارَ گودین! 6 شمه او صالح آدمِ، محکوم بودین و بکوشتین. او شیمه جلو مقاومت نوده. صبر، مصیبتِ میئن 7 پس ای برارؤن، تا او روزی که خداوند اَنه صبر بکونین. بَینین که چوطو کیشاورز، ریفا ایسنه تا زمین خوش با ارزش محصولِ جؤر بأره؛ چوطو صبر کوئنه تا پاییز و بهاری بارؤن بباری زمین سر. 8 پس شمه هم صبور ببین و شیمه دیل قُرص ببی، چونکه أمه خداوندِ اَمَئن نزدیک ایسّه! 9 برارؤن، همدیگر ضد شکایت و غرغر نکونین ، تا شیمه به هم داوری نبی، چونکه ’داور‘ در پشت ایسَه. 10 برارؤن، او پیغمبرونِ جی که خداوند ایسمِ امره گب زِئن، مصیبت و صبر درسِ یاد بگیرین. 11 اما خوش به حال اوشونی که صبر و تحمل بودن. شمه ایوب صبر و تحمل باره بشتؤسین، و دوئنین که سرآخر خداوند اونه أمره چی بوده، چونکه خداوند بی حد و حساب مهربون و بخشنده ایسه. 12 می برارون، ولی مهمتر از همه، قسّم نوخؤرین؛ نه آسمونَ، نه زمینَ، و نه هیچی دیگه، ولی بگذارین شیمه ’بله‘ هو بله ببی و شیمه ’نه‘ هو نه، نبی که محکوم ببین. دعا ایمون امره 13 شمه میئن کی ایسه که عذاب کشنه؟ بوگذارین دعا بکونی. شمه میئن کی ایسه که خوشحاله؟ بوگذارین حمد و ثنا سرودَ بوخوئنی. 14 شمه میئن کی ایسه که ناخوش ببی ؟ بوگذارین کلیسا شیخونِ دخوئنی و اوشون اینه به دوعا بکونن و خداوند ایسم امره اونه روغن اجی مسح بکونن. 15 ایمون امره دعا گودن، ناخوش نجات دئنه و خداوند اونه ویرسؤنبِئنه و اگه او ادم گناه بوده بی ببخشه بنه. 16 پس همدیگر ورجه شیمه گناهونِ اعتراف بکونین و همدیگرِ به دعا بکنین تا شفا هگیرین. صالح آدم دعا ، پیله قوت أمره عمل کوئنه. 17 ایلیا پیغمبر یکته آدم، أمه مورسؤن بو، ولی وقتی تموم خودوش وجود أمره دعا بوده که بارون نباری، سُه سال و نیم بارون زمین سر نبارسه؛ 18 و هو موقع که هنده دعا بوده، آسمونَ جی بارون ببارسه و زمین خوش محصول به بار بأرده. 19 می برارون، اگه یه نفر شیمه میئن حقیقت جی دورَ بی و یک نفر دیگه اونه وگردوئنی 20 ای آدم بودوئنی هر کس که یکته گناه کارِ گمراهی جی وگردوئنی اونه جونِ مرگ جی نجات بده و خیلی گناهون بپوشونه. |
@ 2024 Korpu Company