یعقوب 3 - کتاب مقدس به زبان گیلکی - گویش شرقی

زوبؤنِ بلا

¹ می برارؤن، نبی که خیلی از شمه أن خدا کلام معلم بونِ دنبال دبین، چونکی دوئنین أمه معلیمونِ به، داوری سختترَ بنه.

² چونکی أمه خیلی راهون میئن خطا کوئنیم. اگه ینفر خو گب زئن میئن خطا نکونی، کامیلِ آدم ایسّه و تینه خو تمؤمِ تَن جلو بگیری.

³ اگر أمه، اسبون دهنِ سر دهنه دودیم، اوشونه أمه فرمونبر چاکؤنیم و تینیم اوشون تمام تنِ هرطرف که بخوایم ببریم.

⁴ کشتیونه بینین: هر چند کی اوشن پیله ان و تند باد اوشونه تکون دئنه، ولی یکته کوشتای سوکون، تینه ای پیله کشتی هرطرف که ناخدا بخوای ببری.

⁵ پس هیطورم، زبون یکته کوشتای عضوِ، با ای حال پیله پیله ادعاأن دَئنه. یکته کوشتای جرقه تینه یکته پیله جنگلِ آتش بزنی.

⁶ زبونم آتش ایسّه؛ یکته دنیا نادرستی. یکته از أمه اعضای بدن که تموم وجود آدمیِ کثیفَ کوئنه و اونه همه زیندگیِ آتش زِئنه آتشی که جهنم اونه بلادا!

⁷ آدمی، همه جور جانور و پرنده و خزنده و دریا میئن جونورِ رامَ کوئنه و بوده دئنه،

⁸ ولی هیچ آدمی منئه زوبؤنِ رامَ کونی. زبون شرور و سرکش ایسه و کشنده زهر جی پوره!

⁹ اَمه زوبؤنِ أمره خداوند و پئره مبارک دوخبنیم و هو زوبؤنِ أمره آدمونی که خدا مورسون خلق بوبؤئنِ، لعنت کوئنیم.

¹⁰ یکته دهنِ جی ، هم برکت بیرون هنه هم لعنت! می برارون، خوروم نیه ایطو ببی.

¹¹ مگه بنه یکته چشمَه جی هم شیرین آؤ بیرون بای هم شور آؤ؟

¹² می برارون، مگه بنه انجیل دار زیتون بئری؟ یا رز دار، انجیل هَدی؟ هیطورم شور چشمه منئه شیرین آؤ بیرون بدی.

آسمونی حکمت

¹³ شیمه میئن کی عاقل و حکیم ایسّه؟ بوگذارین او خو خوروم زیندیگی أمره نیشون بدی، او اعمالی که فروتنی امره ایسه و حکمتَ جی سرچیشمه گینه.

¹⁴ ولی اگه شیمه دیل میئن زرخ حسودی و خودخواهی دَئنین، خودتونِ نگیرین و ضد حقیقت گب نزنین.

¹⁵ ایجور حکمت آسمونَ جی نئنه، بلکه زمینی و نفسانی و شیطونی ایسّه.

¹⁶ چون هرجا که حسودی و خودخواهی بمونی، اؤره بلوا و همه جور زشتِ کردوکار هنه.

¹⁷ ولی او حکمتی که آسمون جی ایسّه، اول پاک ایسّه، بازین صلح آمیز و آروم و نصیحت گوشکونه، و خوروم ثمرات و رحمت جی پوره، و فرق نائن و دورویی جی دور ایسه!

¹⁸ صالحی، محصولی ایسّه که صلح و صفا میئن و صلح جو آدمون دست أمره بکاشته بنه.