یعقوب 2 - کتاب مقدس به زبان گیلکی - گویش شرقی

فرق نیئن گوناهِ

¹ می برارؤن، شمه که امی خداوند عیسی مسیح، او خداوند جلالِ ایمون دانین، نباید آدمون میئن فرق بَنین.

² چون اگه ینفر طلایی انگشتر و قشنگ رختِ أمره شیمه مجلیسِ میئن بای و یکته فقیر آدمم کهنه رختِ أمره داخِل بای،

³ اگر شمه اونی که قشنگِ رخت دوده دَئنه بیشتر تحویل بگیرین و اونه بوگوین: « بیه خوروم جیگاه سر بنیش، » ولی او فقیر آدمِ بوگوین: «هوره بیس!» و یا «اِره می پاأنِ جیر زمین سر بنیش،»

⁴ مگه شمه، شیمه میئن فرق نناین و شرور فیکرون أمره قضاوت نودین؟

⁵ عزیز برارؤن، گوش بدین! مگه خدا ایی دونیا ندارونِ انتخاب نوده تا ایمونِ میئن دولتمند بوبوئن و او پادشاهی به ارث ببورن که خدا اوشونی که اونه دوست دانن وعده هده؟

⁶ ولی شمه ، فقیر آدمه بی حرمتی بودین. مگه دارا آدمون نین که شمره ظلم کوئنن و شمره محکمه میئن بئنَن؟

⁷ مگه ایشون نین که او خوب ایسمِ که شیمه سر هَنهَ، کفر گونن؟

⁸ اگه شمه راست راسی شاهونه شریعتِ طبق مقدس نویشته اَن عمل بکونین که گونه: «تی همسایه تی جون مورسون دوست بدار» خوروم کار کوئنین.

⁹ ولی اگه فرق بنین، گناه بودین و شریعت، شمره تخصیر کار اینه و شمره محکوما کوئنه.

¹⁰ چونکه اگه یه نفر همه شریعت بجا باری ولی یکته از اوشون میئن کم کاری بکونی، تمام او شریعت میئن گناهکار ایسّه.

¹¹ چون، او خدایی که بوته: «زنا نکون،» هیطورم بوته: «قتل نکون.» تو اگه زنا نکونی ولی قتل بکونی، شریعتِ قانون بشکَنیی.

¹² پس او کسؤن مورسؤن گب بزنین و عمل بکونین که دؤئنَن عین شریعت آزادی، اوشؤن به داوری بنه

¹³ چونکه داوری اونه به که رحم نوده، بی رحم بنه. رحم، داوری سر حریفَ بنه!

ایمؤن بدون اعمال بمرده ایسه

¹⁴ می برارون، اگه یه نفر ادعا بکونی ایمؤن دئنه، ولی اعمال نداری، چی فایده ای دئنه؟ ایجور ایمؤن تینه اونه نجات بدی؟

¹⁵ اگر یکته برار یا خاخور، خوشه هر روزه خوراک و لیباس محتاج ببی

¹⁶ و یک نفر شمه جی ایشونِ بوگوی:«بشین به سلامت، گرم و سیر ببین،» ولی ایشون جسمِ خواسته ان برآورده نکونی چی فایده دَئنه؟

¹⁷ پس خالی ایمؤن اگر اعمال امره نَبی، بمورده ایسّه.

¹⁸ ولی امکؤن دَئنه یه نفر بگوی: «تو ایمؤن دئنی و منم اعمال دئنم!» تو تی ایمونِ بدونه اعمال، مه نیشون بدی و منم می ایمونِ می اعمال امره ته نشون دِئنم.

¹⁹ تو باور دئنی که خدا یکته ایسه. خوب کوئنی! حتی دیوونم هیجور باور دئنن و ترس جی پرکش گینن!

²⁰ ای نادون، خوائنی بدونی که چرِه ایمؤن بدون اعمال ثمر ندَئنه؟

²¹ مگه أمه جد، ابراهیم خو اعمالِ أمرهَ صالح بشمورده نوبو، هووخت که خو ریکه اسحاقِ قربونگاه به پیشکش بوده؟

²² اینی که اونه ایمؤن و اعمال باهم عمل گودن، و اونه ایمؤن، اونه اعمال أمره کامیلَ بو.

²³ و تورات او بنویشته حقیقت پیدا بوده که گونه: «ابراهیم خدا ایمون بأرده و ایی ابراهیمِ به صالحی بشمورده بوبؤ،» و ابراهیم خدا رفیق دوخنده ببو.

²⁴ اینین اعمال امره ایسه که آدمی صالح بشمرده بنه، نه فقط ایمؤن امره.

²⁵ هیطورم، مگه فاحشه راحاب خودشه اعمال أمره صالح بشمرده نوبؤ هووخت که قاصدون پناه بدا و اوشونه یکته ده راه جی سرادا؟

²⁶ هوطو که تن روحِ جی سیوا ببون، بمورده ایسه، ایمونم اعمالِ جی سیوا ببون، بمورده ایسّه.