عبرأنیأن 7 - کتاب مقدس به زبان گیلکی - گویش شرقی

کهانت مِلْکیصِدِق

¹ چون ای ملکیصدق، سالیم شهر پادشاه و خدای متعال کاهین بو. او ابراهیمه که پادشاهونه شکست بدأبو بدئه و اونه برکت بدا

² و ابراهیم هرچی جی که دأشت اونه ده یک پیشکش بوده. اون نؤم معنی اول «صالحی پادشاه» و بأزون «سالیم پادشاه» یعنی «صلح و سلامتی پادشاه» ایسه.

³ ای ملکیصدق پئر و مَئر ندأنه، نه این شجره نومه معلومه و نه این زندگی اولته روزون و آخری روزون، ولی خدا ریکه مورسؤن تا ابد کاهین مؤنه.

⁴ بینین که او چنی پیله آدم بو که ابراهیم، اسراییل مردوم پئر، غنیمتون جی اونه ده یک هدَه!

⁵ و بنا به موسی شریعت حکم، لاوی زاکون که کاهن بُونابُون، خأسی یهود مردوم جی که ایشؤنه برارن ده یک هگیرن، هر چند که اوشؤنم ابراهیم نسل جی ایسن.

⁶ اما ای ملکیصدیق که اوشؤن نسل جی نئه، ابراهیم جی ده یک هَیته، و ابراهیمه که وعده ئان صاحیب بو برکت بدا .

⁷ و بی شک، اونی که برکت دئنه، اون جی که برکت گینه پیله تره.

⁸ اِئره جی، اوشؤنی که از بین شؤن شی ایسن ده یک هگینن، اما اؤره جی یک نفر ایسأ که ده یک هیته و اون باره گواهی بدأ بوبؤ که زنده ایسه.

⁹ حتی تینیم بوگویم لاوی خودش، که ده یک هَیت، بواسیطه ابراهیم ده یک هدَه.

¹⁰ چون او زمت که ملکیصدق ابراهیمه بدئه بو، لاوی ألئه دونیا نمأبو.

عیسی در مقایسه با مِلْکیصِدِق

¹¹ ایسه اگه کاملأبؤن، لاوی کاهینؤن مقؤم أجی انجوم بیته بی، د چی احتیاجی بو که یکته د کاهین، ملکیصدق موقؤم جی بأی، عوض ای که هارون مقوم جی ببی؟ چونکه لاوی کهانت دوره مئن، شریعت، یهود مردومه هدأ بوبو.

¹² چونکه اگر کهانت خدمت عوضابی، ناچارا شریعت قانونم عوضابنه.

¹³ چون او کسی که ای چیزون اون باره بوته بوبؤ، یکته د طایفه شئه که او طایفه جی هرگز کسی قوربؤنگه مئن خدمت نوده بو؛

¹⁴ چونکه معلومه امئه خداوند، یهودا نسل جی بو و موسی او طایفه جی کهانت باره هیچی نوته.

¹⁵ ای اؤره آشکارتر بنه که وقتی یکته د کاهین ملکیصدق مورسؤن بای،

¹⁶ او نه شریعتِ او حکم جی که اون نسله مربوط بنه، بلکه او زندگی قوت جی که از بین نشنه کاهین بنه.

¹⁷ چونکه اون باره زبور کیتاب مئن ایطؤ شهادت بدا بوبو: «تو تا ابد کاهن ایسی، ملکیصدق موقوم مئن.»

¹⁸ چون یک طرف جی او اولته حکم این واسی که ضعیف و بیفایده بو دیمه بنأ بوبؤ،

¹⁹ چره که شریعت هیچیِ کامیلأنوده. اما او طرف جی یکته بهتر امیده أمره بشناسؤنئه که بواسیطه او، خدا نزدیکأبیم.

²⁰ و ای بی قسم نبو، چون اوشونی که پیشتر کاهین بؤن، بی او که قسم بوخؤرن کاهین بوبون.

²¹ اما اون کاهینَ بؤن، قسم همرأ بو، وقتیکی خدا اونه بوته: «خداوند قسم بوخورده و اون نظر ونگردنه تو تا ابد کاهن ایسی.»

²² هی، عیسی یکته بهتر عهد ضامین کؤنه.

²³ قدیمی کاهینؤنِ تعداد خیلی زیاد بو، چونکه مرگ نوگذأشت خوشؤن خدمته دومباله بدئن.

²⁴ اما عیسی تا ابد کاهینه، چون تا ابد زیندهَ،

²⁵ پس عیسی تینه اوشؤنیِ که بواسیطه او، خدا نزدیکابنن، کاملا نجات بدی، چونکه او همیشک زینده ایسه تا اوشؤن ئبه شفاعت بوکونه.

²⁶ چونکی راس راسه ای بجا بو که امه ای جور پیله کاهن بداریم، که مقدس، بی گوناه، بی عیب، گوناهکارون جی سیوا، و جلال بیته آسمؤنؤن جی جؤرتر ببی.

²⁷ او بقیه کاهینون جور احتیاج ندئنه هر روز اول خوشه گُناهؤن واسه و بأزون مردوم گُناهؤن واسه قربؤنی بکونی، چونکه یک دفأ همیشک ئبه اینه انجوم بدأ، او زمت که خوشه قربؤنی بوده.

²⁸ چون شریعت، آدمونه اوشون ضعفون مئن، پیله کاهین بؤن ئبه تعیین کؤنه، ولی او قسم کلمه ئان که شریعت پسی بمأ، او ریکهَ تعیین بوده که تا ابد کامل بوبؤ.