عبرأنیأن 5 - کتاب مقدس به زبان گیلکی - گویش شرقی

¹ چون هر پیله کاهینی که مردوم میئنای دوجین بنه، تعیین بنه تا او کارون مئن کی خدا ربط دأنه مردوم نماینده ببی، تا گوناأنِ وسه پیشکشؤن و قوربؤنی ئنی خدا به تقدیم بکونی.

² او تینه نادؤنؤن و گومرائان همأ نرمی جی رفتار بکونی، چونکه او خودش ضعف دأنه.

³ هینه واسه، او خأن خو گناأن ئبه قوربؤنی هدی، هوطؤ که مردوم ئبه هدئنه.

⁴ و هیچکس خودش مننئه ای کاهینی ایفتخاره خوشه بدی، بلکی ایی ایفتخار هچی او زمت که خدا اونه دوخوئنی اونه رسنه، هوطو که هارونه برسئه.

⁵ مسیح هم خودش خوشِ جؤر نبرده تا پیله کاهین ببی، بلکه تعیین بوبؤ بواسیطه او کسی که اونه بوته: «تو می ریکاکی؛ ایمروز مو تَه مولود بودم.»

⁶ هوطو که او یک جا د نی گونه: «تو تا ابد کاهن ایسی، مِلکیصدق موقؤم مئن.»

⁷ او روزون که عیسی جسم مئن دبو، گیریه ئان و أرسوؤن و پیله ژگله همرأ اون ورجه که تینس اونه مرگ جی نجات بدای، دعا و ایلتماس بوده و خو کامل اطاعت وسه، اونه دعا مستجاب بوبُو.

⁸ هر چند که پسر بو، او عذابون همأ که بکشئه، اطاعته یاد بِیته.

⁹ و او که کامیل بو، تمؤمِ اوشؤن ئبه که اونه ایطاعت کؤنن، ابدی نجات سرچشمه بو.

¹⁰ و خدا طرف جی اینتخاب بوبُو کی پیله کاهین ببی، ملکیصدق مقؤم مئن.

هشدار، ایمون جی وگرسن باره

¹¹ این باره خیلی چیزون دأنیم که بوگؤیم، اما اوشون گوتن سخته، چره که شیمه گوشؤن سنگینَ بُو.

¹² چون هرچند که شمه تا ایسه خأسی معلیم ببین، احتیاج دَئنین یک نفر خدا کلومه دومرته شمره باموجی. شمه هلِه شیر خأنین، نه سنگین غذا.

¹³ چون هرکس که شیرخور ایسه، صالحی کلؤم مئن هیچی اونه حلی نبنه، چونکه هلِه زاکه.

¹⁴ اما سنگین غذا پیله آدمؤن شئه، اوشون شی که خوشون قوه تشخیصه زیادی تمرین همره تربیت بودن تا بوتؤنن بد و خوبه تشخیص بدئن.