عبرأنیأن 3 - کتاب مقدس به زبان گیلکی - گویش شرقی

عیسی، موسی جی سرتره

¹ پس ای مقدس برارؤن، ای شمه که آسمؤنی دعوت میئن شریک ایسّین، شیمه چوشم عیسی سر دبی که او رسول و پیله کاهینه، که اونه ایمون دانیم و اونه اعتراف کونیم.

² که خو معین بوده کس ئبه وفادار بو، هوطو که موسی نی تموم خدا خونه میئن وفادار بو.

³ چون عیسی، موسی جی ویشتر جلال لایق بو- هوطؤ که خونه چاگوده کسِ حرمت، خودِ او خونه جی بیشتره.

⁴ چونکه هر خونه ای ینفر دست أمره چاگوده بنه، اما او که همه چئه چاکونه خدا ایسه.

⁵ ایسه موسی تمؤم خدا خونه میئن، یکته خدمتکار مورسؤن وفادار بو، تا او چیزون مئن که خا دومبالتر بوته ببی، گوایی بدی.

⁶ اما مسیح، یکته ریکه موسون خدا خؤنه سر وفاداره، و اون خونه أمه ایسّیم، اگه راس راسه أمه ایطمینون و ایفتخاره أمه امید مئن قایم بدأریم.

⁷ پس هوطو که روحِ القدُس گونه: «اگه ایمروز اونه صدا ایشتؤنین،

⁸ شیمه دیلؤنه سنگ نکونین، هوطو که سرکشی دؤرؤنِ میئن بودین، ایمتحونِ روز مئن، بیابونِ میئن،

⁹ اوره کی شیمه پئرون مه ایمتحون بودن، و چهل سال می کارؤنِ بدِئن،

¹⁰ هینه وسه او نسل سه غیظ بودم و بوتم:”ایشؤن همیشه خوشؤنِ دیلِ میئن گُمراه ایسّن، و می راه أنِ نشناختن؛“

¹¹ پس می غیظ میئن قسم بوخوردم اوشؤن می آسایش میئن راه پیدا نوکوئنَن»

¹² برارؤن، واخوب ببین نبی که شیمه میئنای کسی شرور و بی ایمؤن دیل بداری که خدای زنده جی شمره دوراکونی.

¹³ بلکه هر روز، تا وقتی که اونه گونین ’ایمروز‘، همدیگرِ اندرز بدین تا هیشکس شیمه میئنای گناه فریب وأسی، اون دیل سنگانبی.

¹⁴ چونکه امه مسیح میئن شریکَ بویم، اگر راس راسه او اطمینونه که اولسر جی داشتیم تا آخر قائیم بداریم.

¹⁵ هوطو که زبور کیتاب مئن بوته بوبُؤ: «ایمروز اگر اونه صدا ایشتؤنین، شیمه دیله سنگأنکونین، هوطوکه سرکشی دورؤنِ میئن بودین.»

¹⁶ چون اوشؤنی که بشتؤسَن ولی هنده سرکشی بودَن، کی بوئن؟ آیا همه اوشؤنی نوبوئن که موسی راهنمایی همره مصر جی بیرون بومان؟

¹⁷ و کوشؤن سر چهل سال غیظ بوده؟ مگر هوشونی نوبون که گوناه بودن و اوشؤنِ جسدؤن بیابؤنِ میئن بکته؟

¹⁸ و کوشؤنِ وأسی قسم بوخورده که اونه آسایش میئن راه پیدا نوکوئنن؟ مگر اوشون وسه نبو که نافرمونی بودن؟

¹⁹ پس اینیم که اوشؤن بی ایمؤنی وسه بو که نوتونسَن راه پیدا کونن.