عبرأنیأن 2 - کتاب مقدس به زبان گیلکی - گویش شرقی

ایشتؤ، نجات جی غافیلأبؤن باره

¹ پس أمه حواس خا ویشتر اوچی سر که بشتوسیم بومونه، نبی که اونای منحرفَ بیم.

² چون این واسی که پیغؤمی که بواسطه فرشته أن اعلوم بوبؤ ثابیت بوبؤ که قابل اطمینونه، و هر تقصیر و نااطاعتی به حق جزا گیت،

³ پس أمه اگر ایجور پیله نجات جی غافیل ببیم، چوطو اون جزا جی دربشیم؟ ایی نجات اول بواسیطه خداوند اعلام بوبؤ و بازون بواسیطه اوشونی که اونه بشتوسَن أمه به ثابت بوبؤ،

⁴ هوطو که خدا هم جورواجور نیشونه ئان و عجایب غرایب معجزه أن و روح القُدس عطائان که عین خو اراده دئنه، او نجات ئبه شهادت دأ.

عیسی خوشِ خو برارونِ مورسون چاکوئنه

⁵ چون خدا او آینده دنیا که اونای گب زئنیم، فرشته ان فرمونبر نوده.

⁶ یکته جا، زبور کیتاب مئن، بوته ببو: «اینسون چیسه که تو اونه فکرِ بکونی، یا اینسون پسر، که اونه اهمیت بدی؟

⁷ تو اونه أننی زمت، فرشته أن جی پست تر چاگودی، جلال و افتخار تاجه اونه سر بنای،

⁸ و همه چی اونه پاأنِ جیر بنای و اون فرمونبر چاگودی.» ایسه که خدا همه چیه اون فرمونبر چاگوده، چیزی باقی ننَه که اونه فرمونبر نبی. الون، هلِه نَینیم که همه چی اونه فرمون جیر ببی.

⁹ اما امه اونه که اَنی زمت جیرتر فرشته ان جی قرار بِیته اینیم، یعنی عیسی، که مرگ عذاب واسی، جلال و ایفتخار تاج اون سر بنه بوبؤ، تا بواسیطه خدا فیض، همکس وسه موردنِ مزه واچیشی.

¹⁰ چون ای درست و بجا بو که خدا، که همه چی اون ئبه و بواسطه او وجود دئنه، این وسه که خیلی ریکاکونِ به جلال برسؤنی، خأسی اوشون نجات بانیِ رنج و عذاب راه مئن کاملَ کونی.

¹¹ چون اونیکه تقدیس کونه و اوشونی که تقدیس بنن، همه یکته سرچشمه دأنن. چونکه اونه عار نأنه که اوشونِ برار دوخؤئنی.

¹² هوطو که زبور کیتاب گونه: «تی ایسمه می برارؤن ئبه اعلؤم کوئنم؛ و جماعت میئن تی ستایشه خوئنم.»

¹³ و هنده اشعیای پیغمبر کتاب مئن گونه: «مو اونه توکل کوئنَم،» و هنده گونه: بین، من و زاکونی که خدا مه هَده،

¹⁴ پس اورای که زاکون، جسم و خون مئن شریکن، او خودشم ای چیزون مئن شریکابو تا مرگ راه مئن، اونیه که مرگ قدرته دأنه، یعنی ابلیس، نابوداکونی،

¹⁵ و همه اوشؤنیِ که مرگ ترسَ جی تموم خوشون عمره اسیری بکشئن، آزادَ کونی،

¹⁶ چون معلومه که او فرشته أنه یاری نوکونه، بلکه ابراهیمِ نسلِ یاری دئنه.

¹⁷ هینه وسه، لازیم بو او از هر نظر خو برارؤنِ مورسؤن ببی تا بتونی پیله کاهن مقؤم میئن وفادار و بخشنده و خدا خدمتکار ببون تا مردوم گوناهونِ به کفاره بکونی.

¹⁸ چونکه او خودوش وقتی که امتحون بوبؤ، عذاب بکشه و تینه اوشؤنیِ که امتحون بنن کمک بکونی.