غلاطیأن 6 - کتاب مقدس به زبان گیلکی - گویش شرقی

کس کس بارؤنه کولأگیرین

¹ أی برأرؤن، أگه یگ نفر خطا بوکونه، شمه کی خدای روحه دأنین خأ اونه ملایم روح همرأ راست رای ور وگردؤنین. هیطؤ نی خودتم واخوب ببأش کی وسوسه مئن دنکی.

² کس کس بارؤنه کولأگیرین، و ایطؤری مسیح شریعته أنجؤم دئنین.

³ چون أگر یگ نفر خوشه کسی حیساب بأره کی نئه، خوشه گول زئدره.

⁴ ولی هرکی خأ خوشه کاره أزمیت بگیره. او مؤقع اون گولاز دلیل فقط خودشه، نه اون همسایه.

⁵ چونکه هرکس خأ خوشه باره ببره.

⁶ او کی خدای کلؤم أجی تعلیم گینه، خأ تمؤم خؤرمچئنه اون همأ که اونه آموجنه شریک ببون.

⁷ گول نوخؤرین، خدا نشأنه دسپرأگیتن. چون اینسؤن هرچی کأرنه، هونه خأن ببینه.

⁸ چون هرکس کی خوشه جسم وأسی کأرنه، خوشه جسم أجی نی فساد بینه؛ اما اونی کی خدا روح وأسی کأرنه، خدا روح أجی ابدی زیندگی بینه.

⁹ پس خوبی گودن أجی دیلسرد نبیم، چونکه أگه کاره دست وینگیریم، مناسب فصل مئن محصوله خأ ببینیم.

¹⁰ پس تا وقت دأنیم همه کسه خوبی بوکونیم، مخصوصا اوشؤنه کی مسیحه ایمؤن دأنن.

آخرته ایشتؤؤن

¹¹ بینین چوجوره پیله حروف همرأ خودم دست أجی شيمئبه نیویسنم!

¹² اوشؤنی کی خأنن وانمود گودن همرأ خوشؤنه خوب نوشؤن بدئن، شمره وأدأنن کی ختنه ببین، هچی این وأسئه کی مسیح صلیب خؤنی عذاب نکشن.

¹³ چون حتی اوشؤنی کی ختنه بنن شریعته بجا نأبئنن، بلکی خأنن شمه ختنه ببین تا شیمئه جسم مئن گولاز بوکونن.

¹⁴ اما نبون کی مو هرگیز یک چئه گولاز بوکونم جوز امئه خداوند عیسی مسیح صلیبه، کی بواسیطه او، دونیا مئبه مصلوب بوبؤ و مو دونیا به.

¹⁵ چونکی نه ختنه بؤن چیزی ایسه و نه ختنه نوبؤن؛ او چی کی اهمیت دأنه، تازه خلقته.

¹⁶ همهٔ اوشؤن ئبه کی ای قانون همأ رفتار کؤنن، و خدا ایسرائیل ئبه، صلح و سلامتی و رحمت دبون.

¹⁷ بأزین هیکس مأ عذاب ندئنه، چونکی داغؤنی می تن سه دأنم کی نوشؤن دئنه مو عیسی نؤکر ایسم.

¹⁸ أی برأرؤن، أمئه خداوند عیسی مسیح فیض، شیمئه روح همرأ ببون! آمین!