غلاطیأن 5 - کتاب مقدس به زبان گیلکی - گویش شرقیمسیح أمره آزادأگوده 1 آزادی وأسی بو کی مسیح أمره آزاداگوده. پس قایم بیسین و دومرته نؤکری پیشکاووله شیمئه گردن تؤندین. 2 بینین! مو، پولس، شمره گونم که أگر ختنه ببین، مسیح شیمئبه هیچ فایده ندأنه. 3 و مو هندئه شهادت دئنم که هرکس ختنه ببون موظف ایسه تمؤم شریعته بدأره. 4 شمه کی خأنین بواسیطه شریعت صالح به حیساب بأین، مسیح أجی سیوا بوبؤین و فیض أجی دور دکتین. 5 چونکه أمه بواسیطه خدا روح، ایمؤن همأ او صالحی رافا ایسأیم که أمئه اومیده. 6 چونکی مسیح عیسی مئن نه ختنه بؤن اهمیت دأنه نه ختنه نوبؤن، بلکی مهم او ایمؤنه کی بواسیطه محبت کار کؤنه. 7 خوب دؤسه‌دبین. کی شیمئه جلؤ بیته تا حقیقته ایطاعت نوکونین؟ 8 ای کی شمه ایطؤ قانع بوبؤین، اون أجی کی شمره دوخؤنده، نئه. 9 «أننی خمیرمایه، تمؤم خمیره ورز أبئنه.» 10 مو خداوند مئن شمره ایطمینؤن دأنم کی شمه یکته د نظره قبول نوکؤنین. و او کی شمره پریشؤنأکؤنه، هرکی ببون، خوشه سزا اینه. 11 اما ای برأرؤن، أگر مو هندئه ختنه گودنه مؤعظه کأدبی، چره د أذئت و آزار دئم؟ پس أگه ایطؤ بوده بی، د صلیب پیغؤم هیکسه بر نوخؤردنأبو. 12 کاش اوشؤنی کی شمره پریشؤن کؤنن، خوشؤنه أخته بوده بی! 13 چون أی برأرؤن، شمه آزادی به دوخؤنده بوبؤین، فقط شیمئه ای آزادی جی یکته فرصت مورسؤن، جسم ئبه، ایستفاده نوکونین، بلکی محبت همرأ، کس کسه خدمت بوکونین. 14 چونکی همهٔ شریعت یکته حکم مئن خلاصه بنه کی «تی همسایهَ خودت مورسؤن دوست بدأر.» 15 ولی أگه کس کسه بگزین و فبرین، مواظب ببین کی کس کس دست أجی نابودأنبین. زیندگی خدا روح همرأ 16 اما مو گونم خدا روح همرأ کردکار بدأرین کی جسم خواسته ئانه بجا نأبئنین. 17 چونکی جسم خواسته ئان، خدا روح ضیده و خدا روح خواسته ئان، جسم ضیده؛ چون ای دوته کس کس ضیدن، یکجور کی د مننین هرچی کی خأنین بوکونین. 18 ولی اگر خدا روح همأ هیدایت ببین، د شریعت جیر نیسأین. 19 ایسه جسم اعمال معلومن: بی‌عفتی، ناپاکی، هرزگی؛ 20 بت‌پرستی و جادوگری؛ دوشمنی، جنگ و دعوا، حسودی، غیظ؛ زیاده‌خواهی، تفرقه، دسته دسته گودن، 21 حسودی؛ مستی، عیاشی و ایشؤن مورسؤنچئن. هوطؤ کی قبلتر شمره ایشتؤ بزئم، هندئه گونم که اوشؤنی که ایجور کارؤن کؤنن، خدا پادشاهیئه به ایرث نبئنن. 22 اما خدای روح ثمره، محبت، شادی، صلح و سلامتی، صبر، مهربؤنی، خوبی، وفاداری، 23 ملایمت و نفس جلؤ گیتن ایسه. هیچ شریعتی ایشؤن ضید نئه. 24 اوشؤن کی مسيح عیسی شئن، جسمه، اونِ هوا و هوس و خواسته ئان همرأ، صلیب سر هکشئه دأنن. 25 أگه خدا روح همرأ زیندگی کؤنیم، خدا روح همرأ نی کردکار بدأریم. 26 هچی مغرور نبیم تا کس کس غیظه در بأریم و کس کس همرأ حسودی نوکونیم. |
@ 2024 Korpu Company