غلاطیأن 3 - کتاب مقدس به زبان گیلکی - گویش شرقیصالح بؤن ایمؤن همرأ 1 أی نادؤن غلاطیان، کی شمره جادو بوده؟ عیسی مسیح مردن أندی آشکار شمره بوته بوبؤ کی بخألئه خودتؤن چوشمؤن جلؤ مصلوبأبؤ. 2 هچی خأ اینه شمرأجی بودؤنم: شریعت أعمال همرأ خدا روحه هیتین یا با ایمؤن به او چی کی بشتؤسین؟ 3 آیا هنی چی نادؤنین کی روح همرأ سرأگیتین و ایسه خأنین جسم همأ کامیل ببین؟ 4 مگر همه او عذابؤنه هچی تاب بأردین؟ مگر ای کی راس راسی هچی زحمت بکشین! 5 او کی خدای روحه شمره هدئنه و شیمئه مئن معجزات کؤنه، ای کاره شریعت أعمال همأ کؤنه یا با ایمؤن به او چی کی بشتؤسین؟ 6 هوطؤ کی ابراهیم «خدا ایمؤن بأرده و ای، اون ئبه صالحی به حیساب بمأ.» 7 پس اینین اوشؤنی کی ایمؤن دأنن ابراهیم زأکؤنن. 8 و مقدس بنویشته ئان پیشتر بدئه کی خدا غیریهودئنه ایمؤن سر صالح به حیساب بأرده، هین وأسی، ای خؤرم خبره ابراهیمه اعلؤم بوده و بوته «همه ته میلّتؤن زمین سر بواسیطه تو برکت گینن.» 9 پس اوشؤنی کی ایمؤنه تکیه کؤنن، ابراهیم همرأ، ایمؤن مردأی، برکت گینن. 10 چون تمؤم اوشؤنی کی خأنن شریعت أعماله أنجؤم بدئن، همه‌ته‌یی لعنت جیر درن، چره کی تؤرات کیتاب مئن بنویشته بوبؤ: «لعنت ببون هرکس کی شریعت کیتاب همه ته بنویشته چئنه پایبند نبون و اوشؤنه بجا نأره.» 11 ایسه معلومه کی هیکس شریعت وأسی خدای ورجه صالح به حیساب نأنه، چون «صالح آدم، ایمؤن همرأ زیندگی کؤنه.» 12 اما شریعت ایمؤن أجی نئه، بلکه «یک کس کی ایشؤنه أنجؤم دئنه، اوشؤن مئن زیندگی کؤنه.» 13 مسیح أمئه جا سر لعنت بوبؤ و ایطؤری أمره شریعت لعنت جیر أجی آزادأگوده، چونکی تؤرات مئن بنویشته بوبؤ که «هرکی دار بزئه ببون ملعونه.» 14 او ایطؤ بوده تا ابراهیم برکت مسیح عیسی مئن، غیریهودئن نصیب ببون، و تا أمه او روحه کی وعده بدأ بوبؤبو، ایمؤن راه جی هگیریم. خدا وعده و شریعت 15 أی برأرؤن، بدأرین روزؤنه زیندگی جی یکته نقل شیمئبه بأرم. هیکس مننئه یکته عهده که آدمی رسمی بوده‌بی، باطیلأکونه یا یک چی اونه بچربؤنه. 16 ایسه، وعده ئان، ابراهیم و اون نسله هدأ بوبؤ. نوگونه «و نسلؤنه،» یکجور کی بخألئه راجع به خیلئن ببون، بلکی گونه «تی نسله،» کی منظور مسیح ایسه. 17 می گب اینه: شریعت کی چهارصد و سی سال بعد بمأ، او عهدئه کی خدا پیشتر دبسته‌بو باطیل نوکؤنه، یکجور کی وعده هیچ ببون. 18 چون أگه ایرث، شریعت أجی ببون، د وعده أجی نئه؛ اما خدا اونه وعده را یأجی ابراهیمه هدأ. 19 پس شریعت أجی منظور چی بو؟ شریعت، تقصیرات وأسی ایضافه بوبؤ، اونم هچی تا او زمت که او «نسل» که او وعده ایشاره گود، بأ. شریعت بواسیطه فرشته ئان و یکته واسیطه‌گر دست أجی برقرار بوبؤ. 20 ایسه، هیچ واسیطه‌گری هچی یک طرف نماینده نئه، اما خدا یکته ایسه. 21 پس مگر شریعت خدای وعده ئان ضیده؟ هیچ‌جوره! چون أگر یکته شریعت هدأ بوبؤبی کی تینس زیندگی هدئه، پس راس راسه صالحی نی شریعت راه جی بدست أمأ. 22 اما مقدس بنویشته ئان اعلؤم بوده که همه ته گوناه مئن أسیرن، تا او وعده کی عیسی مسیحه ایمؤن دأشتن راه جی ایسه، اوشؤنئه کی ایمؤن بأردن هدأ ببون. 23 أمه قبل ای کی ایمؤن بأ، شریعت تسلط جير اسیر بیم و تا ایمؤن آشکارأبؤن، زیندؤن مئن بدأشته بوبؤیم. 24 پس شریعت أمئه سرپرست بوبؤ تا او زمت کی مسيح بأ و ایمؤن همرأ صالح به حیساب بمأیم. 25 اما ألؤن کی ایمؤن بمأ، د او سرپرست دست جیر نیسأیم. خدا زاکؤن 26 چونکی مسیح عیسی مئن، شمه همه ته بواسیطه ایمؤن، خدا ریکأکؤنین. 27 چره کی شمه همه ته کی مسیح مئن تعمید بیتین، مسیحه شیمئه تن دودین. 28 د نه یهودی معنی دأنه نه یونؤنی، نه نؤکر نه آزاد، نه مردأی نه زنأی، چونکی شمه همه ته مسیح عیسی مئن یکتهَ‌ین. 29 و أگر شمه مسیح شی ایسین، پس ابراهیم نسلین و وعده سر، واریثؤن نی ایسین. |
@ 2024 Korpu Company