غلاطیأن 2 - کتاب مقدس به زبان گیلکی - گویش شرقیاؤرشلیم شؤرا 1 چهارده سال بوگذشته وسی، یک دفأ د برنابا همأ اورشلیم بوشؤم و تیتوسم می همرأ ببردم. 2 می شؤن، یکته مکاشفه وأسی بو و او انجیله کی غیریهودئن مئن موعظه کأدبوم اوشؤنه همرأ در مئن بنأم؛ ألبته خلوتی، و فقطم اوشؤنئه کی مئه بانفوذ نظر بمأن بوتم، چون نگرؤن بوم کی نوکونه هچی بدؤ بدؤ کأدبی. 3 اما حتی تیتوس کی می همرأ ایسأبو، با ای که یونؤنی بو، اونه وأندأشتن کی ختنه ببون. 4 ای نیگرؤنی او دورؤغی برأرؤن وأسی بو کی جیرجیرکی أمئه مئن بمأن تا او آزادئه کی مسیح عیسی مئن دأنیم گب‌خبربری بوکونن و أمره بردگی به بگیرن. 5 ولی أمه هیچ اوشؤن تسلیم نوبؤیم تا انجیل حقیقت شیمئبه تمؤم و کمال محفوظ بومؤنه. 6 اما اوشؤن کی بانفوذ نظر أمأن - هرکی بون مئه فرقی ندأنه، چونکی خدا هچی هیکسه طرفداری نوکؤنه - اوشؤن هیچی مأ ایضافه نودن، 7 بلکی برعکس، اوشؤن بفأمسن کی انجیل خؤرم خبره اعلؤم گودن، غیریهودئن ئبه، مأ بسپارده بوبؤ، هوطؤ کی انجیل خؤرم خبره اعلؤم گودن، یهودئن ئبه، پطرسه بسپارده بوبؤ. 8 چون اونی کی بواسیطه پطرس عمل بوده تا یهودئن رسول ببون، می مئنم عمل بوده کی غیریهودئن رسول ببوم. 9 وقتی یعقوب و کیفا و یوحنا کی نظر أمأ کلیسا سیتین بون، او فیضه کی می نصیب بوبؤبو بدئن، من و برنابا همرأ دست رفاقت بدأن که أمه غیریهودئن ور بشیم و اوشؤن یهودئن ور. 10 اوشؤن فقط أمرأجی بخأسن کی ندارؤن فیکر ببیم، هو کاری کی مو خودمم اون خواهان بوم. پولس مخالفت، پطرس همرأ 11 اما هیطؤ کی کیفا بمأ انطاکیه، اون پیش بیسأم، چون اون حق بو. 12 چون قبل ای که اوشؤنی که یعقوب سرأدأبو فأرسن، غیریهودئن همأ همسفره بوبؤبو، ولی هیطؤ تا اوشؤن فأرسئن، یهودئن ترس أجی خو پا پس ویته و خوشه سیوا بوده.. 13 بقیه یهودئن نی ای ریاکاری مئن اون همپا بوبؤن، یکجور که حتی برنابا نی اوشؤن ای ریاکاری همأ گومراه بوبؤ. 14 ولی مو وقتی بدئم اوشؤن انجیل حقیقت راستی مئن قدم وینگینن، همه کس جلؤ کیفا بوتم: «أگر تو کی یهودی ایسی، غیریهودئن مورسؤن زیندگی کؤنی و نه یهودئن مورسؤن، چوطؤ ایسه کی غیریهودئنه وأدأنی کی یهودئن مورسؤن رفتار بوکونن؟» 15 أمه یهودی‌زادهَ‌یم و گوناهکار غیریهودی نیم، 16 أمه دؤنیم کی هیکس شریعت أعمال همرأ صالح نبنه، بلکی عیسی مسیحه ایمؤن دأشتن همرأ صالح بنه. پس أمه خودمؤنم مسیح عیسی ایمؤن بأردیم تا مسیح ایمؤن أجی صالح ببیم و نه شریعت أعمال أجی، چونکی هیکس شریعت أعمال أجی صالح نبنه. 17 ولی أگه این دومبال دبیم کی مسیح مئن صالح به حیساب بأیم، و معلوم ببون کی گوناهکاریم، یعنی مسیح گونای نؤکر ایسه؟ هیچ‌جوره! 18 چونکه أگر او چئه کی خودم فگردؤنئم، دومرته چاکونم، نشؤن دئنم کی خطاکارم. 19 چونکی مو بواسیطه شریعت و نسبت به شریعت بمردم تا نسبت به خدا زیندگی بوکونم. 20 مو مسيح همرأ صلیب سر مصلوبأبؤم، و ای د مو نئم کی زیندگی کؤنم، بلکی مسیحه کی می مئن زیندگی کأدره؛ و ای زیندگی که ألؤن جسم مئن کأدرم، خدا ریکه ایمؤن همرأ ایسه کی مأ دوست دأشت و خوشه جؤنه می وأسی هدأ. 21 مو خدا فیضه باطیلأنوکؤنم، چون أگه صالحی شریعت را یأجی بدست بمأبی، پس مسیح هچی بمرده. |
@ 2024 Korpu Company