غلاطیأن 1 - کتاب مقدس به زبان گیلکی - گویش شرقی1 پولس أجی، او رسول که اون رسالت نه آدمؤن أجی و نه بواسیطه آدم، بلکی بواسیطه عیسی مسیح و پئر خدا ایسه که اونه بمرده ئان أجی ویریسؤنئه، 2 بانی همه ته برأرؤن أجی کی می همأ ایسأن، غلاطیه کلیسائان ئبه: 3 فیض و صلح و سلامتی خدا طرف أجی، امئه پئر، و خداوند عیسی مسیح شیمئبه بأ 4 کی خوشه جؤنه امئه گوناهؤن وأسی هدأ تا أمره خدا و امئه پئر ایراده همرأ، ای شر دؤرؤن أجی رهاواکونه. 5 جلال تا ابد اون ئبه دبون. آمین. یکته د انجیل ننأ 6 می مات واخوشته کی شمه هَندی زود اونئه کی شمره مسیح فیض همأ دوخؤنده ویلأگودین و یکته د انجیل سو رو وگردؤنین. 7 البته که یکته د انجیل ننأ، اما یک سرئن ایسأن کی شمره پریشؤناکؤنن و خأنن مسیح انجیل مئن دست ببرن. 8 اما حتی اگر أمه یا یکته فرشته آسمؤن أجی، جوز ای انجیل که أمه شمئبه اعلؤم بودیم موعظه بوکونه، لعنت ببون! 9 هوطؤ کی پیشتر بوتیم، ألؤن هندئه گونم: أگه یگ نفر یکته انجیل جوز اونی کی قبول بودین شیمئبه موعظه بوکونه، لعنت ببون! 10 یعنی ألؤن مو مردوم تأییده خأنم یا خدا تأییده؟ یا تقلا کأدرم مردومه راضی بوکونم؟ أگر هندئه مردومه راضی گودن دومبال دبوم، مسیح نؤکر نوبؤنأبوم. پولس خوشه خدمت أجی دفاع کؤنه 11 أی برأرؤن، خأنم بودؤنین ای انجیل کی مو اونه اعلؤم بودم، آدمی انجیل نئه، 12 چونکی مو اونه هیچ آدم أجی هَینتم، و هیکسم اونه مأ ناموته، بلکی عیسی مسیح اونه مئبه آشکارأگوده. 13 چون شمه می قدیم زیندگی تعریفه او زمت که یهودی بوم بشتؤسه دأنین، کی چوطؤ خدا کلیسا أذئت و آزار رسؤنئم و تقلا گودم اونه فگردؤنم. 14 و مو یهودگیری مئن خیلی می همسالؤن أجی جلؤتر شؤدبوم، می مردوم مئن و أمئه پئرؤن رسم و رسومات ئبه خیلی غیرت دأشتم. 15 ولی وقتی او کس خوشحالی کی مأ حتی می مأر شوکؤم مئن خوشه کار ئبه وقف بوده بو و بواسیطه خوشه فیض مأ دوخؤنده، این مئن دبو 16 کی خوشه ریکأکه می مئن آشکاراکونه تا اونه غیریهودئن مئن اعلؤم بوکونم، او مؤقع جسم و خون همرأ مشورت نودم، 17 و اورشلیم سمت نی، اوشؤن ورجه کی قبل مو رسول بون، نوشؤم؛ بلکه عربستؤن بوشؤم و بأزون هندئه دمشقه وگرسم. 18 بأزون سو سال پسی، اورشلیم بوشؤم تا کیفا بینم، و پؤنزه روز اون ورجه بیسأم. 19 اما بقیه رسولؤن أجی، جوز یعقوب، خداوند عیسی برأر، د هیکسه ندئم. 20 خدا حضور مئن شمره ایطمینؤن دئنم که او چی کی نیویسنم دورؤغ نئه. 21 بأزون سوریه و کیلیکیه منطقه بوشؤم. 22 او زمت ألئه یهودیه کلیسائان کی مسیح مئن دبون، می دیمه نشناختن. 23 اوشؤن هچی بشتؤسه‌بون، کی گونن، «او مردأی کی پیشتر أمره أذئت و آزار گود، ایسه هو ایمؤنه مؤعظه کأدره کی قبلا تقلا گود اونه نابوداکونه.» 24 و اوشؤن می خؤنی خدا جلال دأن. |
@ 2024 Korpu Company