افسسیان 6 - کتاب مقدس به زبان گیلکی - گویش شرقی

پئر و مار و زاکون

¹ ای زاکؤن، شیمئه پئر مأر اجی خداوند مئن ایطاعت بوکونین، چونکی دوروست کار هینه.

² «تی پئر و مأر احترؤمه بدأر»، کی ای اولته حکمه کی وعده همرأ ایسه:

³ «تا خوشبخت ببی و زمین سر طولؤنی عمر بدأری.»

⁴ ای پئرون، شیمئه زاکونه برزخانوکونین، بلکه اوشونه خداوند تعلیم و تربیت همرأ پیلله وأکونین.

نوکرون و اربابون

⁵ ای نوکرؤن، شیمئه زمینی اربابؤنه ترس و لرز همأ، و دیل و جون همرأ ایطاعت بوکونین، هوجور کی اینگار مسیحه ایطاعت کأدرین.

⁶ و اینم نه هچی او زمت کی شمره نیگا کأدرن، اوشون مورسون کی این دومبال درن که آدمونه راضی بوکونن، بلکی مسیح نوکرون مورسؤن کی خدا ایرادهَ دیل و جون همرأ انجوم دئنن.

⁷ خورم نیت همأ خدمت بوکونین، اوجور کی بخألئه خداونده خدمت کأدرین نه اینسونه،

⁸ دونین که هرکس خورم کار بوکونه، اون جوابه خداوند أجی گینه، چی نوکر ببون چی آزاد.

⁹ ای اربابون، شیمئه نوکرون همرأ هیجور کردکار بدأرین، و اوشون پاترس دأن اجی دست ویگیرین، چون دونین اونی که هم اوشون اربابه و هم شیمئه ارباب، آسمون مئن ایسأ، و او هیکس مئن فرق ننئنه.

خدا تموم و کمال اسلحه

¹⁰ بأزین ای کی، خداوند مئن، و او قوت مئن که اون قدرت اجی أنه، قوی ببین.

¹¹ خدای اسلحهَ تموم و کمال دوکونین تا بوتونین ابلیس چاچولبازئن پیش بیسین.

¹² امئه جنگ جسم و خون همأ، یعنی آدمی همأ نئه، بلکه امه رئیسون ضید، قدرتون ضید، و او تاریکی نیروؤن ضید که ای دونیا سه حاکیمن، شریر روحؤنی لشگرؤن ضید که آسمونی جاجیگه ئان مئن درن، جنگنیم.

¹³ پس خدا اسلحهَ تموم و کمال دوکونین، تا شرّ روز مئن بوتونین قایم بیسین، و بوتونین بعد ای که همه چی انجوم بیته، پابرجا بیسین.

¹⁴ پس قایم بیسین، اوجور که حقیقت غیشه دبستین و شیمئه صالحی زرهَ دودین،

¹⁵ صلح و سلامتی انجیله یکته چاروق جور وأزنین، اوجور کی بخألئه اون اعلؤم گودن ئبه آماده ایسین.

¹⁶ هر وضع مئن ایمؤن سپره ویگیرین، تا بوتؤنین اون همرأ او شریر همه ته آتشی تیرونه دکوشؤنین.

¹⁷ نجات کولاخوده شیمئه سر بنین و روح شمشیره که هو خدا کلؤمه، دسأگیرین.

¹⁸ و همیشک، هرجور دعا و خواهش همرأ، خدا روح مئن دعا بوکونین. هین واسی بیدار و واخوب ببین و ایستقامت همرأ همیشک همه ته مقدسین ئبه دعا بوکونین.

¹⁹ و مئبه هم دعا بوکونین تا هر زمت کی گب زئن ئبه دهن واکونم، او قدرت کلؤم مأ هدأ ببون تا انجیل رازه دیل و جرأت همرأ اعلؤم بوکونم،

²⁰ هو انجیل که اون سفیر ایسم، هرچند زنجیل مئن! دعا بوکونین که اونه جرأت همرأ، اوجور که اون شأنه، اعلوم بوکونم.

سراخر

²¹ این واسی کی می احوال اجی واخوب ببین و بودؤنین کی چی کأدرم، تیخیکوس، که عزیز برأر و وفادار خدمتکار ایسه خداوند مئن، همه چئه شمره گونه.

²² مو اونه این واسی شیمئه ورجه سرأدئنم تا امئه احوال اجی واخوبابین، و تا او شمره دیلگرم بوکونه.

²³ برأرؤن ئبه پئر خدا طرف اجی و خداوند عیسی مسیح طرف اجی، صلح و سلامتی و محبت با ایمؤن دبون.

²⁴ اون فیض تموم اوشون همرأ که امئه خداوند عیسی مسيحه او محبت همأ که از بین نشنه دوست دأنن.