افسسیان 5 - کتاب مقدس به زبان گیلکی - گویش شرقیمحبت مئن کردکار بدأرین 1 پس هوطو عزیز زاکون مورسون، خدا جی سرمشق بگیرین. 2 و محبت مئن کردکار بدأرین، هوطو کی مسیح نی امره محبت بوده و خوشه جؤنه یکته قوربؤنی و یکته خوشبو پیشکش مورسون امئبه خدا تقدیم بوده. 3 اما شيمئه مئن بی‌عفتی و هرجور ناپاکی یا هوا و هوس اجی حتی نخأ گب دکئه، چونکی ایشون مقدسين ئبه شایسته نئه. 4 زشت گبون و هچی گب زئن و رکیک گبون شیمئه مئن دنبون کی شیمئه شأن نئه؛ اون جا سر خأن شکر بوکونین. 5 چون یقین بودؤنین هیچ بی‌عیفت یا ناپاک یا طمعکار آدم، که هو بت‌پرستون ایسن، خدا و مسیح پادشاهی مئن سهم نبئنن. 6 نوگذأرین هیکس شمره هچی گبون همرأ فیتأدئه، چونکی هی چیزون واسئه کی خدا غضب، اوشون سر هنه کی نافرمونی کونن. 7 پس اوشون همأ شریک نبین. 8 چونکی شمه یک زمونی تاریکی مئن ایسأبین، ولی ایسه خداوند مئن نور ایسین. پس نور زاکون مورسون کردکار بدأرین. 9 چونکی نور ثمره هرجور خؤرمی، راستی و درستی مئن پیدا بنه. 10 تقلا بوکونین بفهمین کی چی خداونده راضی کونه. 11 تاریکی بی‌ثمر کارون مئن شریک نبین، بلکه اوشونه برملا بوکونین. 12 چونکه او کارونی کی ایجور آدمون خلوت مئن کونن، حتی اونه زبؤن سر أردن نی شرم‌آوره. 13 اما وقتی که هرچی نور همرأ برملا ببون، آشکارابنه. 14 چونکه هرچی که آشکارابنه نوره. این واسئه بوته بوبو: «أی تو کی خوتی، ویریس، و بمرده ئان اجی زینده وابو، و مسیح خوشه نوره تی سر فتؤنئنه.» 15 پس خیلی موراقیب ببین کی چوجور کردکار دأنین، شیمئه کردکار دؤنا آدمون مورسؤن ببون، نه نادونون مورسون. 16 ای وقت قدره کی دأنین بودونین، چونکی ای روزون بد روزونی ایسن. 17 پس نادؤن نبین، بلکی بفهمین خداوند ایراده چیسه. 18 و شراب اجی مستأنبین، کی شمره بد کارون ور هکشنه؛ بلکی خدا روح اجی پورابین. 19 کس کسون همأ مزامیر و پرستشی سرودؤن و او آوازون همرأ کی خدا روح اجی ایسه بگو-بشتؤ بدأرین و تَه دیل اجی خداوند ئبه بوخؤنین و آهنگ چاکونین. 20 همیشک پئر خدا، امئه خداوند عیسی مسیح نؤم همرأ، همه چیز واسی شکر بوکونین. 21 مسیح حرمت ئبه، کس کسه ایطاعت بوکونین. 22 ای زنأکؤن، شیمئه مردأکؤنه ایطاعت بوکونین، هوطو کی خداونده ایطاعت کونین. 23 چونکی مردأی خوشه زنأک سر ایسه، هوجور کی مسیح کلیسا سره، یعنی خوشه تن، و اون خودش کلیسا نجات‌دهندهَ. 24 پس هوطو کی کلیسا مسیحه ایطاعت کونه، زناکونم خأ هرته کار مئن خوشون مرداکونه ایطاعت بوکونن. 25 ای مرداکون، شیمئه زناکونه دوست بدأرین، هوجور کی مسیح نی کلیسا دوست داشت و خوشه جؤنه اون ئبه هدأ، 26 تا اونه خدای کلؤم آؤ اجی بوشؤره و پکاکونه و ایطوری کلیسا تقدیس بوکونه، 27 تا کلیسا او شکوه همرأ کی دأنه خوشه ورجه بأره، بیدون هیچ لک و چین و چروک یا هرچی د، تا کلیسا مقدس و بی عیب ببون. 28 این وأسئه مرداکون هخأن خوشون زناکونه خوشون تن مورسون دوست بدأرن. او کی خو زنأکه دوست دأنه، خوشه دوست دأنه. 29 چونکی هرگی هیکس خوشه تن اجی نیفرت ندأنه، بلکه اونه غذا هدئنه و اونه داشتداری کونه، هوطو کی مسیحم کلیسا داشتداری کونه، 30 چونکه امه اون تن اعضا ایسیم. 31 «هین واسی مردأی خوشه پئر و مأر أجی سیوا بنه، خوشه زنأکه تنأشنه؛ و او دوتته، یکته تن بنن.» 32 ای راز، خیلی پیللهَ، و اینی کی مو گونم مسيح و کلیسا باره ایسه. 33 خلاصه ای که هرته از شمه نی خأ خوشه زنأکه خوشه مورسون دوست بدأره، و زنأک حواس خأ دبون کی خو مردأک حرمته بدأره. |
@ 2024 Korpu Company