افسسیان 4 - کتاب مقدس به زبان گیلکی - گویش شرقی

یکته وابؤن مسیح تن مئن

¹ پس مو کی خداوند واسی زیندون مئن درم، تمنا دانم کی شیمئه کردکار، شایسته دعوتی کی شمراجی بوبو، ببون؛

² تموم فروتنی و ملایمت همرأ و صبر و محبت مئن کس کسه تحمل بوکونین.

³ حقسأی بوکونین تا او یکته وابؤنه کی خدا روح اجی ایسه، صلح و سلامتی مئن بدارین.

⁴ هوطو کی یکته تن هننأ و یکته روح- خدام او زمت کی شمره دعوت بوده یکته امید شمره هدأ-

⁵ یکته خداوند؛ یکته ایمون؛ یکته تعمید؛

⁶ یکته خدا و همه ته پئر، که همه کس اجی جؤرتر دره و همه کس مئن کار کونه و همه مئن دره.

⁷ اما هر ته از امره، مسیح بخشش اندی، فیض ببخشئه بوبو.

⁸ هین واسی مزمور کیتاب گونه: «او زمت که او عرش برین سو جؤر بوشو، یک لشکر اسیرونه خو دومبال ببرده و او پیشکشون مردومه هدأ.»

⁹ «جؤر بوشو» عیبارت چی معنی دئنه، جوز ای کی زمین پست‌ترین جاجیگه ئان سر نی جیر بمأبو؟

¹⁰ او کی جیر بمأ، هونه که همه آسمونون اجی جؤرتر بوشو، تا همه چئه خوشه حضور همرأ پوراکونه.

¹¹ و او بو که رسولونه هدا، پیغمبرون، مباشیرون، چوپونون و معلیمونه هدا،

¹² تا مقدسینه خدمت کار ئبه حاضیراکونن، مسیح تن بنا گودن ئبه،

¹³ تا او زمت که امه همه ته ایمون یکته ببون و امه همه ته شناخت، خدا ریکه اجی یکته ببون تا ایطو یکته کامیل اینسون هأندی پیلله ببیم تا مسیح پوری قامته فأرسیم.

¹⁴ پس د زاکون مورسون نبنیم تا دریاکولؤن اجی ایرأ اورأ تؤدأ ببیم و جورواجور تعالیم و آدمون چاچولبازی باد، او نقشه ئان مئن کی گومراهی به کشنن، امره ای طرف او طرف هأرؤنه.

¹⁵ بلکه حقیقته گوتن همرأ، محبت مئن، هر حیث اجی تا اون هَندی کی سر ایسه، یعنی مسیح، رشد کونیم.

¹⁶ اون مئنه کی تموم تن، هرته مفصل همأ که اونه ربط دأنه، کس کسه تنأشنه و ورأگینه، تا هر عضوی درست کار بوکونه تا تن رشد بوکونه و خوشه محبت مئن بناکونه.

تازه زیندگی

¹⁷ الون اینه گونم و خداوند مئن هندئه گونم کی شیمئه کردکار د نخأ او مردوم مورسون ببون کی خدا نشناسنن و خوشون بیخود فیکرون مئن کردکار دأنن.

¹⁸ اوشون عقل تاریکابو، و نادونی خؤنی که اوشون سنگدیلی نتیجه ایسه، خدا زیندگی جی دور دکته دأنن.

¹⁹ اوشون سنگدیلابون و خوشونه هرزگی دست بسپاردن، هوجور که طمع اجی خوشون دسته هرته ناپاکیِ زئنن.

²⁰ اما شمه مسیحه ایطو ناموتین،

²¹ البته اگر گمون بوکونیم اون باره بشتؤسین و عین او حقیقت کی عیسی مئن دره، تعلیم بیتین.

²² تا شیمئه قدیم زیندگی روشه، یعنی او قدیم اینسونه کی بواسیطه فریبنده خواسته ئان فاسید بو، تن اجی دراکونین.

²³ و روح مئن شیمئه فیکر نؤ وابون،

²⁴ و جدید اینسونه شیمئه تن دوکونین کی صالحی و حقیقتی قدوسیت مئن، خدا مورسون خلق بوبو.

²⁵ پس دورؤغ اجی دست ویگیرین و شیمئه همسایهَ راست گب بزنین، چره که امه همه ته، کس کس همأ یکته اعضا ایسیم.

²⁶ «برزخ ببین، ولی گوناه نوکونین»: نوگذأرین شیمئه روز سر بأ و شمه هنده غیظ مئن دبین،

²⁷ و ابلیسه مجال ندین.

²⁸ دوز د دوزی نوکونه، بلکی زحمت بکشه، و خوشه دستون أجی صداقت همأ کار بوکونه، تا بوتؤنه نیازمندونم یک چی هدئه.

²⁹ شیمئه دهنه هیچ بد گب ئبه وانکونین؛ بلکی شیمئه همه ته گبون، دیگرون بنا گودن ئبه کاراگیته ببون و يکته نیازه رفع بوکونه و بشتؤسه‌کسونه به فیض برسؤنه.

³⁰ خدا قدوس روحه که اون همرأ رهایی روز ئبه مُهر بوبوین، ناراحتانوکونین.

³¹ هرجور تلخی، خشم، غیظ، داد و بیداد، بهتؤن و هرجور بدخواهیه شمراجی دوراکونین.

³² کس کسون همرأ مهربؤن و دیلسوج ببین و هوطو کی خدا شمره مسیح مئن ببخشئه، شمرأم کس کسه ببخشین.