افسسیان 3 - کتاب مقدس به زبان گیلکی - گویش شرقی

انجیل راز آشکارأبنه

¹ این واسی مو، پولس، شمه غیریهودئن خؤنی مسیح عیسی زیندونی ایسم -

² بی گمون شمه ای جریون باره بشتؤسین کی خدا فیض نظارت شیمئه خدمت واسی مأ هدأ بوبو.

³ کی چوطو او راز مکاشفه همرأ مئبه آشکارأبو، هوطو کی مختصر شیمئبه بنویشتم،

⁴ و اون خوندن اجی تینین فهمسن کی مو چوطو مسیح رازه بفهمسم،

⁵ او راز کی قدیم نسلون مئن آدمون پسرون ئبه آشکار نوبوبو، اوطو که الون بواسیطه روح القدس، اون مقدس رسولون و پیغومبرون ئبه آشکار بوبو.

⁶ او راز اینه کی غیریهودئنم مسیح عیسی مئن و بواسیطه انجیل، هم ایرثن و هو تن اعضا ایسن و خدا وعده مئن شریکن.

⁷ مو مطابق خدا فیض پیشکش ای انجیل خدمتکار بوبوم کی بواسیطه اون قدرت عمل، مأ هدأ بوبو.

⁸ هرچند کی مو همه ته مقدسین مئن همه کس اجی کمترینم، ای فیض مأ هدأ بوبو کی مسیح ای بی حد و حیساب گنجونه غیریهودئنه اعلوم بوکونم،

⁹ و همه کسه نوشون بدئم کی خدای نقشه چوطو انجوم گینه، خدا که همه چئه خلق بوده، خوشه ای رازه قدیم اجی دخوته بداشته.

¹⁰ تا بواسیطه کلیسا، خدا جورواجور حیکمت، رئیسون و قدرتون، آسمونی جیگه ئان مئن آشکارابون.

¹¹ ای هو هدف بو کی خدا ازل اجی دأشت، کی خدا اونه امئه خداوند مسیح عیسی مئن انجوم بدأ.

¹² امه مسیح مئن بواسیطه ایمونی که اونه دانیم، تینیم جرأت و ایطمینون همرا خدا نزدیکابیم‌.

¹³ پس شمرجی خواهش کونم او رنجون واسی کی شیمئبه کشئدرم، دیلسردانبین، چره که اوشون شيمئه ایفتخار باعیثه.

دعا، روحؤنی قوت وأسی

¹⁴ این واسئه مو آسمؤنی پئر جلو زانو زئنم

¹⁵ که هرته خونواده آسمون مئن و زمین سر، اون اجی نوم گینن،

¹⁶ کی بنا به خوشه جلال دولتمندی شمره هدئه تا بواسیطه خدا روح شیمئه باطین مئن قوی ببین،

¹⁷ تا مسیح بواسیطه ایمون شیمئه دیلون مئن بنیشه و محبت مئن بنه بوکونین، پابرجا ببین،

¹⁸ تا قوت بدارین که همه ته مقدسین همرا، مسیح محبت درازا و پهنا و جلفی و بورزیئه بفهمین

¹⁹ و مسیح محبته کی بشر معرفت اجی جؤرتر هننأ، بشناسین - تا خدا کامیل پوری جی لبالب ببین.

²⁰ ایسه، جلال دبون او خدای ئبه کی تينه بواسیطه او قدرت که امئه مئن کار کونه، خیلی ویشتر از او چی که امه خیال بوکونیم یا بخأیم، عمل بوکونه.

²¹ کلیسای مئن و مسیح عیسی مئن، همه ته نسلون مئن، تا ابد خدا به جلال دبون! آمین.