افسسیان 2 - کتاب مقدس به زبان گیلکی - گویش شرقی

فیض همرأ بواسیطه ایمون

¹ شمه شیمئه خطائان و گونائان مئن بمرده بین،

² و یک زمت اوشون مئن زیندگی گودین، او زمت کی ای دونیای رائان مئن و هوا قدرت رئیس، یعنی ابلیس اجی ایطاعت گودین، هو روح اجی کی ایسه نی نافرمونی زاکون مئن عمل کونه.

³ امرام همه ته یک زمون ایشون مئن امئه جسم هوا و هوس مئن زیندگی گودیم، و امئه جسم خواسته ئان و فیکرونه بجا أردیم، و بقیه آدمون مورسون، بنا بر امئه ذات، خدا غضبه محکومابویم.

⁴ اما خدا رحم کی بی حد و حیسابه، خوشه پیله محبت واسی امره دوست داشت،

⁵ حتی او زمت که امئه خطائان مئن بمرده بیم، امره مسیح همرأ زینده واگوده - شمه فیض راه جی نجات بیاتین؛

⁶ و خدا امره مسيح همرا ویریسونئه و آسمونی جاجیگه ئان مئن مسیح عیسی هما بنیشونئه،

⁷ تا آینده زمت مئن، او خوشه بی حد و حیساب فیضه بواسیطه خوشه مهربونی نسبت به امه، مسیح عیسی مئن نوشون بدئه.

⁸ چونکی فیض همرا و بواسیطه ایمون نجات بیاتین - و ای خودتون اجی نئه، بلکی خدا پیشکش ایسه -

⁹ و ای، کارون نتیجه نئه، تا هیکس خوشه گولاز نوکونه.

¹⁰ چونکه امه خدا دسچاگودهَ‌یم، و مسیح عیسی مئن خلق بوبویم تا خورم کارون بوکونیم، او کارون کی خدا پیشتر آماده بوده تا اوشون مئن قدم ویگیریم.

یکته وابؤن مسیح مئن

¹¹ پس یاد بارین که یک زمت شمه غیریهودئنه «ختنه‌نوبؤ» دوخوندن، و خودشونه «ختنه‌بوبؤ» دونسن - در حالی که اوشون ختنه یکته جسمونی کاره که ادم دست اجی انجوم بیته -

¹² و یاد بارین که او زمون مسیح جی سیوا بین و ایسرائیل مردوم اجی حیساب نمأین و نسبت به عهدون وعده غریب بین، و نا امید و بی خدا ای دونیا مئن دبین.

¹³ ولی ایسه مسیح عیسی مئن، شمه که یک زمت دور بین، بواسیطه مسیح خون نزدیک بوبوین.

¹⁴ چونکی مسیح خودش امئه صلح و سلامته، او که امه هر دوتهَ، یعنی یهود و غیریهوده، یکته بوده و خوشه جسم مئن سیوایی دیواره کی دوشمنگیری باعیث بو فگردونئه،

¹⁵ رسم و رسومه کی شریعت احکوم مئن دبو باطیلاگوده، تا خوشه مئن عوض او دوته، یکته تازه آدم چاکونه، تا صلح و سلامتی برقرار بوکونه

¹⁶ و هر دوتهَ یکته تن مئن خدا همرأ أشتی بدئه، بواسیطه خوشه صلیب که اون سر دوشمنگیرئه بکوشته.

¹⁷ او بما و صلح و سلامتی خورم خبره شیمئبه کی دور دبین و اوشون ئبه که نزدیک ایسابون، اعلوم بوده.

¹⁸ چون بواسیطه او، امه دوته، یکته روح مئن آسمونی پئره دسترسی دانیم.

¹⁹ پس د شمه غریبه و بیگونه نین، بلکی مقدسين همرا همولایتی و خدا خونواده عضو ایسین؛

²⁰ شمه او عیمارت سر کی رسولون و پیغومبرون اون بنوره بون، بنا بوبوین کی مسیح عیسی خودش بنای اصلی سنگ ایسه.

²¹ مسیح مئن تموم ای بنا کس کسه تناشنه و یکته مقدس معبد خداوند مئن برپا بنه.

²² و شمرام کس کسون هما مسیح مئن بنا بنین تا یکته خونه ببین کی خدا بواسیطه خوشه روح اون مئن ایسنه.