افسسیان 1 - کتاب مقدس به زبان گیلکی - گویش شرقی

¹ پولس اجی کی خدا خواسته همرا مسیح عیسی رسول ایسه، مقدسین ئبه که افسس شهر مئن ایسأن، اوشونی کی مسیح عیسی مئن وفادارن:

² فیض و صلح و سلامتی خدا طرف اجی، امئه پئر، و خداوند عیسی مسیح، شیمئبه بأ.

روحونی برکتون مسیح مئن

³ مووارک ببون خدا و امئه خداوند عیسی مسیح پئر، که امره مسيح مئن، هرته روحونی برکت همرا آسمونی جیگه ئان مئن برکت بدأ.

⁴ چون دونیا خلق گودن أجی پیشتر، امره مسیح مئن دؤجین بوده تا اون حضور مئن مقدس و بی عیب ببیم. محبت مئن

⁵ او بنا بر خوشه خواسته و ایراده، امره پيشتر خو فرزندخؤندگی به معین بوده تا بواسیطه عیسی مسیح، خدا پسرؤن ببیم؛

⁶ تا اون پورجلال فیض ستایش ببون، هو فیض که خوشه عزیز مئن، امره برکت هدأ.

⁷ امه مسیح مئن بواسیطه اون خون، رهایی دأنیم، کی ای هو خطائانِ بخشئن ایسه، که اونه خوشه بی حد و حیساب فیض هَندی،

⁸ هر حیکمت مئن و هر کامل فهم مئن، فت فراوون امره ببخشئه.

⁹ او خوشه ایراده رازه امره بشناسونئه، بنا بر خوشه خواسته کی مسیح مئن آشکار بوده،

¹⁰ خدا نقشه ای بو که هیطو که اون وقت برسئه همه چئه، چی آسمون مئن و چی زمین سر، کس کس همأ مسیح مئن گرداگیره.

¹¹ امه اون مئن وارثون بوبویم، چون بنا بر اون خواسته که همه چئه مطابق خوشه ایراده انجوم دئنه، پیشتر اینتخاب بوبوبیم.

¹² تا امه که اولته کسونی بیم کی مسيحه اومید داشتیم، اون جلاله ستایش بوکونیم.

¹³ شمرأم اون مئن، او زمت که حقیقت کلومه، کی شیمئه هو نجات انجیله بشتؤسین و اونه ایمون باردین، روح القدس موعود همأ مُهر بوبوین،

¹⁴ که امئه ارث بیعونهَ تا او زمت که اونه کاملا به دست بأریم، تا خدا جلال ستایش ببون.

دعا و شکر گودن

¹⁵ هین واسئه هیطو کی منم شیمئه ایمون تعریفه عیسای خداوند ئبه و شیمئه محبته همه ته مقدسين ئبه بشتؤسم،

¹⁶ شمره شکر گودنه دس وینتم، شمره که همیشک می دوعائان مئن یاد أبئنم

¹⁷ تا امئه خداوند عیسی مسيح خدا، او پورجلال پئر، حیکمت و مکاشفه روحه شمره هدئه تا اونه بشناسین،

¹⁸ تا شیمئه دیل چوشمون روشنابون، تا او اومیدی کی خدا شمره اون واسی دوخونده بشناسین و خدا او بی حد و حیساب و پورجلال میراثه مقدسین مئن بفهمین

¹⁹ و اون بی حد و حیساب قوت اجی نسبت به امه کی ایمون دانیم، واخوب ببین. ای قوت، خدا پورزور قدرت اجی کی کار کأدره هنه

²⁰ که اونه مسیح مئن کاراگیته، او زمت که اونه بمرده ئان اجی ویریسونئه و آسمونی جاجیگه ئان مئن، خو راست دست ور بنیشونئه،

²¹ هرته ریاست و ایقتدار و قوت و فرمونروایی جی جؤرتر، و هرته نؤم اجی جؤرتر، نه هچی ای دوره مئن، بلکه آینده دورون مئنم هیطو.

²² و او همه چئه مسیح پا جیر بنأ و معین بوده که کلیسای ئبه همه چی مئن سر ببون،

²³ او کلیسا که اون تنه، و اون پوری همه چئه همه چی مئن پوراکونه.