کولسیان 4 - کتاب مقدس به زبان گیلکی - گویش شرقی

¹ أی أربابؤن، شیمئه نؤکرؤن همرأ عدل و اینصاف أجی کردکار بدأرین، چونکی دؤنین شمرأم یکته أرباب آسمؤن مئن دأنین.

² همیشک دعا مئن قایم ببین، شکر گودن أجی، دعا مئن واخوب ببین.

³ همزمؤن أمئبه هم دعا بوکونین، تا خدا کلؤم ئبه یکته در أمئبه واکونه تا بوتؤنیم مسیح رازه اعلؤم بوکونیم. رازی که اون خؤنی زیندؤن درم.

⁴ تا بوتؤنم اونه هوطؤ کی خؤرمه، واضح اعلؤم بوکونم.

⁵ او مردومؤن همرأ کی کلیسا یأجی بیرین درن، حکمت همأ کردکار بدأرین و هرته وقت أجی خؤرم ایستفاده بوکونین.

⁶ شیمئه گبؤن همیشک پورفیض و سنجیده ببون، تا بودؤنین که هرکسه چوطؤ آؤجا بدین.

آخرته سلامؤن

⁷ تیخیکوس شمره کامیل می حال أجی واخوبأکؤنه. او، عزیز برأر و وفادار خدمتکار و خداوند مئن می همرأ همخدمت ایسه.

⁸ اونه شیمئه ور سرأدئنم تا أمئه حال أجی واخوبأبین، تا شمره دیلگرم بوکونه.

⁹ او، اونیسيموس همرأ، أمئه وفادار و عزیز برأر کی خودتؤن أجی ایسه، شیمئه ورجه هنه. ایشؤن شمره هر چی جی کی ائره ایتفاق دکئنه واخوبأکؤنن.

¹⁰ آریستارخوس کی می همأ زیندؤن دره، شیمئبه سلام رسؤنئنه؛ هیطؤ نی مرقس، برنابا عموپسر، شیمئبه سلام دأنه کی قبلتر شمره اون باره سفارش بوده بوم که هر زمت شیمئه ورجه بأ، اونه گرمی همرأ تنأگیرین.

¹¹ و عیسی کی یوستوس نی دوخؤنده بنه، شیمئبه سلام رسؤنئنه. می همکارؤن مئنی، خدا پادشاهی کار ئبه، هچی ایشؤن ختنه بوبؤ مردأکؤنن و می تسلی باعیث بون.

¹² اپافراس کی خودتؤن أجی و مسیح عیسی نؤکر ایسه، شیمئبه سلام دأنه. او همیشک دعا مئن خدا یأجی خأنه کی شمه پیلله و خاطیرجمع آدمؤن مورسؤن قایم بیسين و خدا ایراده أجی کامیلا ایطاعت بوکونین.

¹³ مو شاهیدم که او شیمئبه و اوشؤن ئبه کی لائودیکیه و هیراپولیس مئن ایسأن، سخت زحمت بکشئه.

¹⁴ عزیز طبیب لوقا، و هیطؤ نی دیماس، شمره سلام رسؤنئنن.

¹⁵ أمئه برأرؤن و خأخؤرؤن لائودیکیه مئن و هیطؤ نی نیمفا و او کلیسا کی هی بانو خؤنه مئن برپا بنه، سلام برسؤنین.

¹⁶ و هیطؤ کی ای نؤمه شیمئه مئن بوخؤنده بوبؤ، لائودیکیه کلیسا مئن نی بوخؤنده ببون، و شمرأم می نؤمهَ کی لائودیکیه به بنویشتم بوخؤنین.

¹⁷ و آرخیپوسه بوگؤین: «واخوب ببأش تا او خدمته کی خداوند مئن تأ بسپارده بوبؤ، کامیل أنجؤم بدی.»

¹⁸ مو، پولس، ای سلامه می دست أجی نیویسنم. می زنجیلؤنه ای زیندؤن مئن یأد بأرین. فیض شیمئه همرأ دبون.