کولسیان 3 - کتاب مقدس به زبان گیلکی - گویش شرقی

تازه زیندگی مسیح مئن

¹ پس أگر شمه مسیح همرأ زینده بوبؤین، او چئن دومبال دبین کی جؤر هننأ؛ اؤره کی مسیح، خدای راست دست ور نیشته.

² او چئن سر کی جؤر هننأ شیمئه فیکرؤنه بنین، نه او چئن سر کی زمین سه هننأ.

³ چونکی شمه بمردین و شیمئه زیندگی مسیح همرأ خدا مئن دخوته هننأ.

⁴ هر زمت مسيح کی شیمئه زیندگی ایسه، آشکار ببون، بأزون شمرأم اون همرأ جلال مئن آشکار بنین.

⁵ پس او چئه کی شیمئه وجود مئن زمینی ایسه، بکوشین، یعنی بی عیفتی، ناپاکی، هوا و هوس، بد خواسته ئان و طمع که هو بت‌پرستی ایسه.

⁶ هیشؤن وأسئه خدای غضب، نافرمؤنی ریکه ئان سر بمأ.

⁷ شمرأم قدیمؤن هی راهؤنه شوین، او زمت که اوشؤن مئن زیندگی گودین.

⁸ اما ایسه خأن ایشؤنه همهَ دیمه بنین: یعنی غیظ، غضب، بدخواهی، بندؤم و بد گبؤن کی شیمئه دهن أجی بیرین هنه.

⁹ کس کسؤنه دورؤغ نوگؤین، چونکه او قدیم آدمه اون کارؤن همرأ شیمئه تن أجی بکندین

¹⁰ و تازه آدم رخته دودین، که حقیقی معرفت مئن هر لحظه نؤ وابنه تا خوشه خالق مورسؤن ببون.

¹¹ ای تازه آدم مئن، نه یونؤنی یا یهودی، نه ختنه‌بوبؤ یا ختنه‌نوبؤ، نه بربر یا سکایی، نه نؤکر یا آزاد د معنی ندأنه، بلکی مسیح همه چیزه و همه مئن دره.

¹² پس خدا دؤجئه آدمؤن مورسؤن کی مقدس و عزیزن، دیلسوجی، مهربؤنی، فروتنی، ملایمت و صبر رخته دوکونین.

¹³ کس کسه تحمل بوکونین و أگر یکته، اؤکته أجی شکایتی دأنه، کس کسؤنه ببخشین. هوطؤ کی خداوند شمره ببخشئه، شمرأم خأ کس کسه ببخشین.

¹⁴ و ایشؤن همه سر، محبت رخته دوکونین که همه چئه کس کس همأ یکته تمؤم و کمال ایتحاد همرأ پیوند دئنه.

¹⁵ مسیح صلح و سلامتی شیمئه دیلؤن مئن حاکیم ببون، کی راس راسه یکته تن مئن دوخؤنده بوبؤین. شکرگزار ببین.

¹⁶ مسیح کلؤم، فراوؤنی همأ شیمئه مئن دبون؛ تمؤم حیکمت همرأ کس کسه پند و تعلیم بدین، مزامیر، سرودؤن و آوازؤن همرأ کی خدا روح أجی ایسه، شکر گودن همرأ شیمئه دیلؤن مئن خدا به بوخؤنین.

¹⁷ و هرکار کی کؤنین، گب زئن مئن یا کردار مئن، همهَ خداوند عیسی نؤم همرأ أنجؤم بدین، و بواسیطه او خدای پئره شکر بوکونین.

ایمؤندارؤن رابیطه

¹⁸ أی زنأکؤن، شیمئه مردأکؤن أجی ایطاعت بوکونین، هوجور کی خداوند شأن ایسه.

¹⁹ أی مردأکؤن، شیمئه زنأکؤنه دوست بدأرین و اوشؤن همرأ توندی نوکونین.

²⁰ أی زأکؤن، شیمئه پئر و مأره هرته کار مئن ایطاعت بوکونین، چونکی ای خداونده خوشحالاکؤنه.

²¹ أی پئرؤن، شيمئه زأکؤنه به غیظ نأرین، نبون کی دیلسردأبون.

²² أی نؤکرؤن، شيمئه زمینی أربابؤنه هر ته کار مئن ایطاعت بوکونین، نه هچی او زمت کی شمره نیأ کأدرن، هوطؤ او آدمؤن مورسؤن کی این دومبال درن کی مردومه راضی بوکونن، بلکی پاک دیل و خداوند ترس همرأ.

²³ هر کاری کی کأدرین، اونه یکجور جؤن و دیل همرأ أنجؤم بدین کی بخألئه خداوند ئبه کار کأدرین، نه مردوم ئبه.

²⁴ چونکی دؤنین شیمئه پاداش ایرثی ایسه کی خداوند أجی هگینین. شمه خداوند مسیحه خدمت کأدرین.

²⁵ چون هرکی بدی بوکونه، خوشه بد کار عوضه اینه و هیچ فرقی ننأ.