کولسیان 1 - کتاب مقدس به زبان گیلکی - گویش شرقی

¹ پولس أجی کی خدا خواسته همرأ مسیح عیسی رسول ایسه، و أمئه برأر أجی، تیموتائوس،

² مقدسین و وفادار برأرؤن ئبه مسیح مئن، کی کولسی شهر مئن ایسأن: فیض و صلح و سلامتی خدا طرف أجی، أمئه پئر، شيمئبه بأ.

شکر گودن و دعا

³ أمه همیشک دعا وقت شیمئبه خدا، أمئه خداوند عیسی مسیح پئره شکر کؤنیم،

⁴ چونکی أمه شیمئه ایمؤن باره مسیح عیسی مئن و محبتی که همه ته مقدسین ئبه دأنین، بشتؤسیم.

⁵ کی ایشؤن او امید أجی سرچشمه گینه که آسمؤن مئن شیمئبه بدأشته بوبؤ. ای اومید کی قبلتر اون باره حقیقت کلؤم، یعنی انجیله بشتؤسین،

⁶ او انجیل کی شمره برسئه، هوطؤ کی سرتاسر دونیا مئنم برسئه، ثمر أبئنه و زیادابنه، هوطؤ کی شیمئه مئن نی، او روز أجی کی اونه بشتؤسین و خدای فیضه حقیقت مئن بفأمسین، عمل بوده.

⁷ هوطؤ کی شمه اونه اپافراس ورجه که أمئه عزیز همخدمته، باموتین. او کی مسیح وفادار خادیم ایسه، شیمئه طرف أجی

⁸ و او أمره شیمئه محبت أجی کی خدا روح مئن دره، واخوبأگوده.

⁹ هین وأسئه، أمرأم او روز أجی کی اینه بشتؤسیم، شیمئبه دعا گودن أجی دست وینتیم، و خدا جی خأنیم کی شمه اون ایراده شناختن أجی، هرته حکمت و روحؤنی فهم مئن، پورأبین،

¹⁰ تا شیمئه کردکار خداوند لایق ببون، و بوتؤنین اونه کامیلا خوشحالأکونین: هرته خؤرم کار مئن ثمر بأرین و خدا شناختن مئن رشد بوکونین

¹¹ و تمؤم قوت همرأ که اون پورجلال قدرت أجی هنه، قوت بگیرین تا ذؤق همرأ کاملا صبر و تحمل بدأرین،

¹² پئره شکر بوکونین کی شمره قابیل بودؤنسه که او میراث مئن کی مقدسین نور مئن دأنن، شریکأبین.

¹³ او أمره تاریکی قلمرو أجی رهایی بدأ و خوشه عزیز ریکه پادشاهی ور سرأدأ،

¹⁴ که اون مئن أمه رهایی دأنیم، یعنی أمئه گونائان بخشش.

مسیح کار و شخصیت

¹⁵ او، خدایی کی نشأنه دئن شکل ایسه، اولته زأک، تمؤم خلقت أجی جلؤتر و جؤرتر.

¹⁶ چون همه چی بواسیطه او خلق بوبؤ، آسمؤن مئن و زمین سر، او چیزؤنی کی شأنه دئن یا اوشؤنی کی دئه نشأنه، چی پادشاهی تختؤن یا قلمرؤن، رئیسؤن یا قدرتؤن، همه چی بواسیطه او و اون وأسی خلق بوبؤ.

¹⁷ او همه چیز أجی پیشتر دره و اون مئن همه ته چیزؤن کس کس همأ بدأشته بنه.

¹⁸ او، تن ئبه، یعنی کلیسا به، سر ایسه. او، شروع و اولته کسی ایسه کی بمرده ئان أجی زینده وابؤ تا همه چی مئن سر ببون.

¹⁹ چونکی تمؤم خدا خشنودی این مئن دبو که اون مئن بیسه،

²⁰ و بواسیطه او همه چئه خوشه همرأ أشتی بدئه، چی زمین سر، چی آسمؤن مئن خوشه خونه کألسن أجی، صلیب سر، أشتی بدأ.

²¹ شمرأم یک زمت خدای همرأ غریبه بین و شیمئه فیکر مئن اون دوشمن بین، و ای شیمئه شریرؤنه کارؤن مئن معلوم بؤنأبو.

²² ایسه او بواسیطه خوشه مرگ، خو جسمؤنی تن مئن شمره أشتی بدأ، تا شمره مقدس و بی عیب و بیدون هیچ سرکوفتی، خدا حضور بأره،

²³ أگه راس راسه شمه ایمؤن مئن قورص و پابرجا بیسین و او انجیل امید أجی جوم نوخؤرین، هو انجیل که آسمؤن جیر تمؤم خلقت ئبه اعلؤم بوبؤ، و مو، پولس، اون خادیم بوبؤم.

پولس خدمت کلیسا به

²⁴ ألؤن او زجرؤن أجی کی شیمئبه کشنم خوشحالم و اون تن وأسی کی کلیسا ایسه، او چئه کی مسیح عذابؤن مئن کمه، می جسم مئن تلافی کؤنم.

²⁵ کی طبق نظارت خدمت کی خدا مأ بسپارده، کلیسا خادیم بوبؤم، تا خدا کلؤمه کامیل شمره بشناسؤنم،

²⁶ یعنی او راز کی خیلی زمت نسلؤن أجی دخوته بومؤنسه بو، اما ایسه اون مقدسین ئبه آشکارأبؤ.

²⁷ خدا ایطؤ بخاسته تا اوشؤن ئبه بشناسؤنه کی ای راز غیریهودئن مئن چی پیلئکی جلال دأنه. او راز اینه کی مسیح شیمئه مئن، امید جلال ایسه.

²⁸ أمه اونه اعلؤم کؤنیم، و همه تهَ ایشتؤ زئنیم و همه کسه تمؤم حیکمت همأ تعلیم دئنیم، تا همه کسه مسیح مئن پیله آدمؤن مورسؤن خدای ورجه بأریم.

²⁹ هین وأسئه کی مو زحمت کشنم و تمؤم می قوت همرأ بواسیطه او کی می مئن قوت همرأ کار کؤنه، تقلا کؤنم.