اعمالٚ رسولأن 8 - کتاب مقدس به زبان گیلکی - گویش شرقی

سولُس، کلیسا اذیت کوئنه

¹ سولُس استیفان كوشتَنِ أمره موافق بو. بعد او روز، یکته پیله آزار و اذیت، اورشلیم كلیسا ضید شروع بوبؤ، اوجور که بغیر رسولؤن، تمومِ ایماندارؤن، یهودیه ولایت و سامره سامون، پخش و پلا بوبوئن.

² چندته خداشناس مردکه، استیفانِ جنازه، دفنَ گودَن و اونه‌ به یکته پیله عزا داری بیتن.

³ اما سولُس بدجور کلیسا سر فترکَس و خونه به خونه گشت زنأكؤن و مردَاكؤنِ بیرون هکشی و زندؤنِ میئن تؤدَه.

فیلیپُس سامره دیرون عیسی باره تعلیم دَ

⁴ او ایماندارونی که اذیت آزارِ وسه پخشَ بوبؤئن، هرجا که شوئن، خدا كلام خوروم خبرِ اعلوم گودَن.

⁵ فیلپُسم بوشو یکته از سامره شهرؤن و اوره، مردومِ مسیحِ باره تعلیم دَ.

⁶ وختی که جماعت زیادی، فیلیپُسِ گبؤنِ بشتؤسَن و نشونه أنی که او انجوم دَ بدئن، همته‌ با دقت اوچیزی که گوت گوش بدَئن؛

⁷ چون پلید روحؤن نعره‌كونؤن خیلی‌أنَ جی که اوشؤنِ گرفتار بوئن، بیرون اَمَئن و خیلی فلجؤن و شلؤنم شفا هَیتن.

⁸ هینه وَسه او شهر، شادی جی پورا بو.

شمعون جادوگر ایمون اَبِئنه

⁹ و اما او شهر میئن یکته مردکای زندگی گود که اونه ایسم شمعون بو که سامره مردمِ پیشتر، خو جادوگری أمره ماتَ گوده بو و ادعا گود که خوشِ یکته پیله کسی ایسّه.

¹⁰ همه‌ كوشتاکون و پیلّه أن ، اونه گبونِ گوش دَئن و گوتن: «ایی مردکای او خدا قدرت ایسه که اونه ’پیلّه قدرت‘ گونن.»

¹¹ مردوم اونه گبونِ گوش دَئن، چون خیلی زمت بو که خو جادوگری أمره، اوشونه ماتِ گوده بو.

¹² ولی وختی مردوم، فیلیپُسِ خوروم خبرِ أمره که خدا پادشاهی و عیسی مسیح ایسمِ باره بو ایمون بأردَه بوئن، همته‌َ، چی مرداک و چی زناک، غسلِ تعمید هیتَن.

¹³ حتی شمعونم ایمون بأرده و بعد تعمید هیتَن همیشه فیلیپُس أمره بو وشمعون او پیله نیشونه أن و معجزه أنَ دئن أمره که فیلیپس انجام دَء، خیلی حیرونَ بو.

¹⁴ وختی رسولؤن اورشلیم شهر دیرون باخبر بوبون که سامری أن، خدا كلامِ قبول بودن، پطرس و یوحنا اوشونه ورجه سرادائن.

¹⁵ او دونفر سامره بومَئن، سامره مردومِ بِه دعا بودن تا روح‌القدس هگیرَن،

¹⁶ چون حلِه روح القدس هیتّه ایشون به نازیل نوبؤ بو، بلكه فقط به ایسم عیسای خداوند تعمید بیته بون و بس.

¹⁷ بزون پطرس و یوحنا خوشؤنِ دستؤنِ اوشونه سر بنئن و اوشون، روح‌القدس هیتَن.

¹⁸ هووخت شمعون بدِه که رسولؤن، خوشونِ دست مردومِ سر نَئنن و مردوم خدا روحِ هگینن، اَنی پول بارده و

¹⁹ رسولؤنِ بوته: «ایی قدرتِ مَنم هدین تا هركس سر دست بَنئم، روح القدس هگیری.»

²⁰ ولی پطرس اونه بوته: «تی نقره تی أمره نابود بی! چون فكر بودی شئنه پول أمره خدا هدیه هِئن!

²¹ تو ایی خدمت میئن هیچ سهم و قسمتی ندَئنی، چون تی دیل خدا أمره روراست نیه.

²² پس تی ایی شرارت جی توبه بكون و خداوندَ جی بخوأ تا شاید، ایی فیكری که تی دیلِ میئن دَئنیِ ببخشی؛

²³ چونكه دِئدرم تلخی و گناه تَه اسیرَ گوده.»

²⁴ شمعون بوته: «شمه مِه به خدا ورجه دعا بکونین تا اوچی که بوتین می سَر نأی.»

²⁵ بعد ایکه پطرس و یوحنا گوایی بدَئن و خداوند كلام اعلوم بودن، اورشلیم شهر وگَرسَن و خیلی از سامره دهاتون میئن انجیل خوروم خبرِ برسونِئن.

فیلیپُس و درباری خواجه

²⁶ یکته از خداوند فرشته فیلیپُس بوته: «ویریس و جنوب سو بشو، او راه که اورشلیم اجی غزه سو شنه.» ایی راه بیابونی ایسه.

²⁷ فیلیپُس ویریسَه و راه دکته. راه میئن یکته خواجه مرداک بدِه که حبشه شی بو. او یکته از’کَنداکِه‘ حبشه ملکه دربار پیله ترون بو و حبشه ملکه خزانه اونه دس هنه بو. او خواجه مرداک ،خدا پرستش به اورشلیم شهر بومه بو.

²⁸ الون وگرسده بو و خوشه ارابه سر نیشته بو و اِشَعْیای پیغمبر کیتابِ خونده دبو.

²⁹ هووخت خداروح، فیلیپُس بوته: «نزدیك بشو و او ارابهَ برس.»

³⁰ پس فیلیپُس ارابه طرف بُدوؤسه و بشتؤسه که درباری خواجه اِشَعْیای پیغمبر كتاب خوندره. اونه بوته: «اوچیِ که خوندری، فهمنی؟»

³¹ او خواجه بوته: «چوطو تینم بفهمم؟ اگه ینفر مَه راهنمایی نكونی.» پس فیلیپُسای منت بوده ارابه سوارَ بی و اونه ورجه بنیشی.

³² او قسمتی که خواجه مقدس نیویشته أن جی خونده بو، ایی بو که: «درست، یکته گوسفند مورسون که اونه بوردرن سیرَ بینَن، و یکته برّه مورسون که خوشِ پشم چینؤن ورجه تام بزه، هوطو خو دهنِ وازَه نوکوئنه.

³³ اونه حقارت وقت، عیدالت اونای هیته بوبو؛ كی تینه اون نسلِ باره گب بزنی؟ چونکه اونه زندگی زمینِ سرای ببئه بوبؤ.»

³⁴ خواجه فیلیپُس بوته: «مینت کوئنم مَه بگو که پیغمبر اِره کی جی گب زِئنه، خوشای یا ینفر دیگرای؟»

³⁵ بازین فیلیپُس بینا بودِه گب زِئن و هو قسمت مقدس كتاب جی شروع بودِه و خب خبر که عیسی باره بو خواجه بوته.

³⁶ هوطؤ که راه میئن شوئدبون، یکته جا که آؤ داشتِ برسئن. خواجه بوته: «بَین، اینم آؤ! الون چی تینه می جلوئه بگیره که غسل تعمید هنگیرم؟»

³⁷ [فیلیپُس بوته: «اگر تمؤم تی دیلِ أمره ایمؤن بأردی، ده هیچی تی جلوئه گیته منئه.» خواجه بوته: «ایمؤن دَئنم که عیسی مسیح، خدا ریکه ایسّه.»]

³⁸ خواجه دستور بده ارابه‌ بدأرن، و فیلیپُس و خواجه، هر دوته آؤ میئن بوشؤئن و فیلیپُس، خواجه غسل تعمید بده.

³⁹ هیطو که آؤَ جی بیرون بومَئن، ناخبر خداوند روح ، فیلیپُس بیته و ببورده و خواجه دِه اونه ندِه، ذوق أمره خو راه دومباله بدَه.

⁴⁰ ولی فیلیپُس، خوشِ اَشدود منطقه میئن بدِه. او همته او شهرؤن منطقه میئن گرس و انجیل خوروم خبرِ رسونی تا قیصریه شهرِ برسِه.