اعمالٚ رسولأن 6 - کتاب مقدس به زبان گیلکی - گویش شرقی

هفت نفر خدمتِ به انتخاب بنن

¹ او روزون که شاگردؤن تعداد خیلی ببو بو، یهودی أنِ یونانی زبؤن، یهودی أنِ عبرانی زبؤن جی گلِگی بودن چونکه ایشؤنِ بیوه زنأكؤن نیدبو گیتن و روزؤنه غذا سهمی، ایشونِ نرسه.

² او دوازده‌ته رسول، همته شاگردؤنِ دوخوندَن و بوتَن: «درست نیه که أمه، مردم غذا هدئن واسی خدا كلام موعظه گودنَ جی غافل ببیم .

³ پس ای برأرؤن، شمه میئنای هفت‌ته خوش‌نوم که روح و حکمتَ جی پورا گوده بوبوئن دوجین بکونین تا اوشونه ایی كار سر بنایم

⁴ ولی خودمؤنِ دعا و خدا کلامِ خدمت گودن به وقف کوئنیم.»

⁵ ایی گبی که رسولؤن بوتن همته خوش بمَه. اوشون استیفانِ که یکته مرداکی بو پر از ایمؤن و روح‌القدس انتخاب بوئدن، و هیطورم فیلپُس، پْروخُروس، نیكانُور، تیمون، پارمِناس و نیکولائوس، که انطاكیه میئن یهودی بوبؤبوئنِ انتخاب بودن.

⁶ ایی مرداكؤنِ رسولؤنِ ورجه ببوردن و رسولؤن دعا بودن، و اوشونِ سر دست بنئن و ایی خدمتِ سر بنائن.

⁷ پس خدا كلام، پخشَ بوئده بو و شاگردؤنِ تعداد اورشلیم میئن خیلی بیشترَ بو و خیلی از كاهنؤن هم ایمؤن بأردَن.

استیفان گیتَن

⁸ استیفان، فیض و قوت جی پور بو و پیله معجزات و نیشونه أن، مردوم میئن انجوم دَه.

⁹ بازین چند نفر یکته عبادتگاه آدمون جی که شناس به ’ آزادَ بوئؤأنِ عبادتگاه‘ بو، ایستفان أمره بحث بودَن. اوشون قیرَوانِ یهودی أن و اسكندریه و كیلیكیه و آسیا شی بوئن.

¹⁰ ولی اوشون منیستن او حكمت و خدا روح جلو که استیفان به واسیطه او گب زی، بیسن.

¹¹ پس اوشون چند نفرِ خلوتی تیرا گودن تا بگون: «امه بشتؤسیم که استیفان، موسای پیغمبر و خدای، كُفر گوت.»

¹² اوشؤن مردم و شیخؤن و توراتِ معلمؤنِ استیفان ضید پورا گودن، و استیفان سر فترکسن و اونه بیتن و شورا ورجه ببوردن.

¹³ اوشون چند‌ته دروغی شاهیدِ بأردَن که گوتن: «ایی آدم یسره ضید ایی مقدس جیگا و شریعت گب زئدره.

¹⁴ چون امه خودمؤن بشتؤسیم که گوت، ایی عیسای ناصری ایی جیگا فگاردونبِئنه و رسم و رسومی که موسی اَمَره هدَه عوض کوئنه.»

¹⁵ هی موقع، تموم اوشؤنی که شورا میئن ایسابؤن و استیفانِ چال بزه بوئن، بدِئن، که استیفانِ دیم یکته فرشته دیمِ مورسون بوبؤ بو.