اعمالٚ رسولأن 5 - کتاب مقدس به زبان گیلکی - گویش شرقی

حَنانیا و سَفیره

¹ اما یکته مردکه که اینِ ایسم حَنانیا بو خو زناکِ أمره که سَفیره ایسم داشت، یه تیکه زمینِ بفورتبون،

² حنانیا اَنی زمینِ پولِ با اونکه اینه زناک دؤنس، جا بدا و بقیه بأرده، رسولؤنِ جلو بَنه.

³ اما پطرس اونه بوته: «ای حَنانیا، چرِء بوگذاشتی شیطؤن تی دیلِ ایطؤ پورا كونی که روح‌القدسِ دروغ بوگوی و اَنی زمینِ پولِ ته به بدأری؟

⁴ مگه قبلِ فورتن تی‌شی نبو؟ و بعد فورتنم اونه پول تی ورجه نَناءبو؟ چی تَه واداشته تی دیلِ میئن ایطو فکر بکونی؟ تو نه آدمه، بلكه خدا دورُؤغ بوتی!»

⁵ وختیکه حَنانیا ایی گبؤنِ بشتؤسه، زمین سر بکته و بمورده! همته كسؤنی که اینه بشتؤسَنِ میئن یکته پیله ترس دکته.

⁶ بازین جووؤنؤن جلو بومَئن و حنانیا كفن فیبیتَن و بیرون ببوردن، دفنَ گودَن.

⁷ بعد سُه ساعت، اونه زنأک که ایی اتفاقَ جی خبر نداشت، بومَه.

⁸ پطرس اونای بپورسه: «مَه بگو که زمینِ هی قیمت بفورتین؟» سَفیره جواب بده: «بله، هی قیمت.»

⁹ پطرس اونه بوته: «چرِء همدیگر أمره ساخت و پاخت بودین تا خداوند روح امتحون بکونین؟ اوشؤنی که تی مردأکِ دفنَ گودَن هی الؤن دَر سَر ایسَئن و تنم بیرون بِئنَن.»

¹⁰ هو دم، سَفیره‌ پطرس پاأنِ جیر بکته و بمورده. جووؤنؤن دیرون بومَئن، اونم بموردَه بیاتّن. پس سفیرَه بیرون ببوردن و خو مَرد ورجه دفنَ گودَن.

¹¹ بزین یکته پیله ترس تمؤم كلیساأن و تمؤم اوشؤنی که اینه بشتؤسَنِ بیته.

رسولؤنِ معجزه أن و نیشونه أن

¹² رسولؤن همش نیشونه أن و خیلی معجزه أن مردومِ میئن انجوم دَئن و ایماندارؤن همته‌ یكدل ایوانِ سلیمانِ میئن جومَه بوئن.

¹³ ولی بقیه مردوم هیشكس نیارس اوشونه جمع میئن اضافه ببی، هرچند که مردوم همته، ایشؤنِ احترؤمَ داشتن.

¹⁴ خیلی از مرداکؤن و زنأكؤن خداوندِ ایمؤن بأردَن و ایشونِ جمعِ میئن اضافه بوبوئن

¹⁵ تا جایی که حتی ناخوشؤنِ، شهر میدؤنؤنِ سر اَردَن و اوشونِ تختؤن و دوشکون سر خوسنِئن تا وختی پطرس اورای ردا بنه، لااَقل اونه سایه بعضی‌ از اوشؤن سر دکای و شفا هگیرن.

¹⁶ مردمم دسته دسته اورشلیم اطرافِ شهرؤنِ جی اَمَئن و ناخوشؤن و اوشؤنی که پلیدِ ارواح گرفتار بوئنم اَردَن، و همته شفا گیتَن.

رسولون، زندونی بوبوئن و بعد آزادَ بوئن

¹⁷ اما پیله كاهین و تموم کسونی که اونه أمره بوئن یعنی صَدّوقی فرقه عالمون، حسادَتَ جی دست به كار بوبوئن

¹⁸ و رسولؤنِ بیتَن و او زندونی که همجوره آدم اونه میئن ایسابو، تودَئن.

¹⁹ ولی شؤ میئن، خداوندِ یکته فرشته زندؤن دَرؤنِ باز گوده و ایشؤنِ بیرون بأرده

²⁰ و بوته: «بشین معبد میئن بَیسین و تموم ایی پیغؤمی که زیندگی بخشنه مردمِ به بوگوین.»

²¹ پس صوبه دم بنا بر اوچیزی که ایشؤنِ بوته بوبؤبو معبد بوشؤن و بینا بودن مردم آموتَن. وختی پیله كاهن و اوشونی که اینه همره بوئن بمان، تموم شورا آدمون و تموم یهودِ مردومِ شیخون دوخؤندَن و چندنفر سرادئن تا رسولؤنِ زندؤنِ جی بأرَن.

²² اما وختی مأمورؤن بومئن، رسولؤن زندون میئن نیاتن، پس اوشؤن وگرسن خبر باردن که

²³ «أمه زندؤن درؤن بدیم که کاملا قفل بو و نگهبانؤنَم دَرؤنِ جلو ایسابؤن. ولی وختی دَرؤنِ واگودیم هیشكسِ زندؤنِ میئن نیاتیم.»

²⁴ وختیکه معبد نگهبونؤنِ فرمانده و كاهنؤن سرؤن، ایی خبر بشتوسَن، ماتَ بوئن، و فكرَ شؤئن كه « ایی كار عاقبت چی بنه؟»

²⁵ هی میئنه ینفر بومَه و اوشونِ خبر بده، بوته: « بینین اوشونِ که زندؤن تؤده بین، الؤن معبد میئن ایسَئن و مردمِ تعلیم دَئدرن.»

²⁶ پس معبدِ نگهبانؤن فرمؤنده، مأمورؤنِ أمره بوشؤئن و رسولؤنِ بأردَن، اما زور أمره نه، چون ترسِئن مردم ایشؤنِ سنگسار بکونن.

²⁷ وختی رسولؤنِ بأردَن، ایشؤنِ شورا جلو پا بداشتَن. هووخت پیله كاهین ایشؤنای بپورسه و بوته:

²⁸ «أمه شمره سخت قدغن بودبیم که دِه ایی ایسم أمره مردومِ تعلیم ندَین، با ایی حال شمه اورشلیمِ شهرِ شیمه تعلیم جی پورا گودین و خوائنین ایی مرداکِ خونِ تؤدین اَمه گردن.»

²⁹ ولی پطرس و بقیه رسولؤن جواب بدَئن: «أمه باء خدا جی اطاعت بکونیم نه آدمِ جی.

³⁰ اَمه پئرؤنِ خدا، عیسی مُرده‌أنِ جی زنده بوده، هو عیسی که شمه صلیب جؤر هکشِین، بکوشتین،

³¹ و خدا اونه خو راست دست ور جؤر ببورده، رهبر و نجات دهنده بوده و فرصت بده تا یهودِ مردوم توبه بکونن و اوشونِ گناأن ببخشه ببی.

³² و امه ایی چیزونِ شاهدیم، هوطو که روح‌القدسم شاهید ایسه، هو روحی که خدا اونه اوشونیه که اونا جی ایطاعت کوئنن هده.»

³³ وختی شورا آدمون ایی گبؤنِ بشتؤسَن اَنیچی برزخَ بؤئن که خواسّن ایشؤنه بکوشَن.

³⁴ اما ینفر فریسی أن فرقه عالمونَ جی که اینه ایسم گامالائیل بو،که شریعت معلم بو و همه اینه احتروم نَئن، مجلس میئن ویریسَه و دستور بده تا رسولؤنِ اَنی بیرون ببرن.

³⁵ بازین اوشؤنی که اوره ایسابؤنِ بوته: «ای یهودی أن، مواظب ببین ایی مرداکونِ أمره چی خوائنین بکونین.

³⁶ چونکه چند وخت پیشؤن، یکته مردکای که اینه ایسم تِئوداس بو ویریسَه و ادعا گود که خوشِ كسی‌ایسه، و حدود چهار صد نفرم خو دور جومَه گوده. ولی اونه بکوشتن و اونه دومباله رؤئنم همه پخش و پلا بوبوئن.

³⁷ بعدِ او، یهودای جلیلی‌ سرشماری وخت شورش بودِه و یه دستَه خو دومبال هکشه. اما اونم هلاکَ بو و اونه دومباله رؤئن پخش و پلا بوبوُئن.

³⁸ پس ایی قضیه باره هم شمره سفارش دِئنم که ایی آدمؤنای دست ویگیرین و اوشونه به خوشون حال بنین. چون اگر ایشون قصد و نیت آدمَ جی ببی، هیچ جا نرسنن.

³⁹ اما اگه خدا جی ببی، منِیئن اوشونه جلو بگیرین، حتی ممکنه که هو موقع خدا ضد جنگ بکونید!»

⁴⁰ پس اوشون گامالائیلِ نصیحت گوش بودَن و رسولؤنِ دوخوندَن و شلّاق بزِئن و قدغن بودَن که دِه عیسی ایسم باره گب نزنن، بازین اجازه بدَئن که رسولؤن بوشؤئن.

⁴¹ پس رسولؤن شورا جی ذوق أمره بیرون بوشؤئن، چون لایق ایی بوبؤئن که عیسی ایسم وسه بی حرمتی بینَن.

⁴² و اوشون هرروز چی معبد میئن و چی خونه أن میئن، تعلیم دئن و خوروم خبرَ هدئن که عیسی هو مسیح موعود ایسّه، دست وینتَن.