اعمالٚ رسولأن 4 - کتاب مقدس به زبان گیلکی - گویش شرقی

پطرس و یوحنا، یهود شورای ورجه

¹ پطرس و یوحنا حلِه مردم أمره گب زِئدبون که كاهنؤن و معبد نگهبانؤنِ فرمانده‌ِ و صَدّوقی فرقه عالمون برسِئن.

² اوشؤن اینه وسه که رسولون مردومِ آموتن و اعلوم گودن که عیسی مرده أنَ جی زنده بوبؤ، خیلی برزخ بوئن.

³ پس ایشؤنِ بیتن و چون غروب دمی بو تا فردایی اوشونِ زندؤنِ میئن بداشتَن.

⁴ اما خیلی‌ از اوشؤن که ایی کلام بشتؤسبون، ایمؤن بأردن و مرداکؤن تعداد حدود پنج هزار نفر بوبؤبو.

⁵ فردایی، قوم پیلترون و شیخؤن و توراتِ معلمون، اورشلیم شهر میئن جومَه بوئن.

⁶ ایی مجلس میئن، حَنّا پیله كاهین و قیافا و یوحنا و اسكندر و تموم پیله کاهینِ خانواده ایسأبؤن.

⁷ اوشؤن پطرس و یوحنا هو وسط بداشتن، ایشؤنای بپورسِئن: « شمه به چی قدرت و ایسمی ایی كاره بودین؟»

⁸ بازین پطرس روح‌القدس جی پورا بؤ، اوشونه بوته: «ای قوم پیلترون و شیخؤن،

⁹ اگه امروز ایی خوروم کار وسه که ایی شلِ مردکه به بودیم، اَمرای بازخواس کادرین، و پورسِئدرین که او چوطو شفا هیته،

¹⁰ پس شمه همته و تموم یهود مردم بودؤنین که عیسی مسیح ناصری‌ ایسمِ أمره ایسه که ایی مردکه شیمه جلو سالم سرپا ایسَه، به ایسم هونی که شمه اونه صلیب سر هکشِیئن اما خدا اونه مُرده‌أن جی زنده بوده.

¹¹ ای عیسی هو سنگی ایسّه که شمه بناّأن اونه رّدَ گودین و الؤن مهمترین سنگ بنا بوبؤ.

¹² بغیر او هیشكس دیرون نجات نَنه، چون هیچ ایسمی آسمؤن جیر، آدمؤن هدء نوُبو تا اوناجی نجات پیدا كونیم.»

¹³ وختی که اوشون پطرس و یوحنا جرأتِ بدِئن و بفهمسَن که بیسوادن و معمولی آدمونی ایسّن، ایشؤن مات بخوشته و بفهمسن که عیسی أمره بوئن.

¹⁴ ولی چون او شلِ مردکای که شفا بیاته‌بو پطرس و یوحنا ورجه ایسا بو، نوتونسَن هیچی اشون ضد بوگوئن.

¹⁵ ولی دستور بدَئن که اوشون، مجلسای بیرون بوشؤئن و خوشؤن أمره به گب بنیشتَن.

¹⁶ اوشون همدیگر امره بوتَن: «ایی دو نفر أمره چی بکونیم؟ چون اورشلیم همته مردوم دؤنَن که یکته معجزه‌ ایشؤن دست أمره انجوم بُوبؤ و أمه منِیئم اونه مونكر ببیم.

¹⁷ ولی هینه وسه که ایی اتفاق بیشتر از ایی مردوم میئن چو دنکای، بئین ایشونِ اخطار بدیم که دِه هیشكس أمره، عیسی ایسم باره گب نزنن.»

¹⁸ بازین ایشؤن، یبارده پطرس و یوحنا دوخُوندن و اوشونه غدقن بودن که هرگی عیسی ایسمِ أمره گب نزنید و تعلیم ندَید.

¹⁹ اما پطرس و یوحنا اوشونِ جواب بدئن: «شمه خودتون داوری بکونین، کویکتِه، خدا نظر میئن درست ایسّه، شمرای اطاعت گودن یا خدای اطاعت گودن؟

²⁰ چون امه منّیم اوچیِ که بدیم و بشتؤسیم، نوگُویم.»

²¹ شورا آدمون بعد اینکه پطرس و یوحنا خیلی تهدید بودَن، اوشونِ ویلَه گودن چون هیچ راهی اوشونه مجازات گودنِ به نیاتّن، چره که مردم همته، خدا اوچی وسه که اتفاق دکته بو، ستایش گودَن.

²² چون او شلِ مرداکای که معجزه أمره شفا بیاته بو، چهل سال بیشتر داشت.

ایماندارؤنِ دُعا، پطرس و یوحنا وسه

²³ پطرس و یوحنا بعدِ اونکه آزادَ بوُئن خوشؤنِ ریفقؤن ورجه وگرسن و اوچیِ که كاهنؤن سرؤن و شیخؤن اوشونِ بوته بوئن، تعریف بودَن.

²⁴ هیطو که ایماندارون اینه بشتؤسَن، یکصدا خدا حضور میئن دعا بودَن، بوتَن: «ای خداوندی که همه چیون سر حاکم ایسّی، ای خدایی که آسمؤن و زمین و دریا و هر اونچی که اوشؤن میئن هنّه، خلق بودی،

²⁵ تو خودت بواسطه روح‌القدس اَمه پئر زبؤنای، تی خدمتگزار داوودِ پادشاه، بوتی: «”چی وَسه قومؤن شورش کوئنن و مردمؤن هَچی توطیئه کوئنن؟

²⁶ زمینِ پادشاأن همدستَ بنن و حاكمؤن جومَه بنن، خداوند ضید و اونه مسیح ضید.

²⁷ راست راستِ که هی شهر میئن، هیرودیسِ حاکیم و پُنتیوس پیلاتُس غیر یهودی أن و یهودی أن أمره، ضدِ تی مقدس خدمتگزار عیسی که تو اونه مسح بودی، همدستَ بؤئن،

²⁸ تا اوچی که تی دست و تی اراده پیشتر تعیین بوده‌بو، انجوم بدِئن.

²⁹ الؤن، ای خداوند، ایشؤنِ تهدیدؤنِ بَین و تی خدمتکارونِ لطف بکون تا تمام جرأت أمره تی كلامِ بوگوئن،

³⁰ و تی دستم شفا هدئن بِه درازَ كون و تی مقدس خدمتگزار، عیسی ایسم أمره، نیشونه أن و معجزات انجوم بدی.»

³¹ بعدِ ایشؤنِ دعا گودَن، او جایی که اوشؤن اوره جومَه بوبوئن بلرزسه و همته روح‌القدس جی پورا بوئن، خدا كلامِ جرأت أمره گوتن.

ایماندارؤنِ خوشون مال و مینال دیرون شریک بوئن

³² همه ایماندارؤن، یكدیل و یكجؤن بوئن و هیشكس خو مال و مینالِ خوشی نودونَس بلكه همه چی میئن همدیگرِ أمره شریك بوئن.

³³ رسولؤن پیله قوت أمره عیسای خداوندِ زنده بوئن باره گوایی دَئن و خدا پیله فیض همته سر قرار بیته بو.

³⁴ اوشؤن میئن هیشكس محتاج نبو، چون هرکس که یکته زمین یا یکته خونه داشت، فورت و اونه پولِ

³⁵ رسولؤنِ ورجه نَئ تا هرکس احتیاج قد همه کسِ میئن سَهم ببی.

³⁶ یوسفم که لاوی قبیله جی و قبرس شی بو و رسولؤن اونه بَرنابا یعنی ’تشویق ریکه‘ لقب هده بون،

³⁷ زمینیِ که داشت، بفورته و اونه پولِ بأرده، رسولؤنِ ورجه بَنه.