اعمالٚ رسولأن 3 - کتاب مقدس به زبان گیلکی - گویش شرقی

یکته شَل مادرزاد شفا

¹ یه روز پطرس و یهودا ساعت سه بعدظهر که دعا وخت بو، معبد شوئدبون.

² هووخت، چندنفر، یکته مرداکِ که مادرزادی شَل بو، اَرده بوئن. اوشؤن اونه هر روز او معبدِ دروازه ورجه که ’قشنگ دروازه ‘ ایسم داشت، نَئن تا مردمَ جی که معبدِ میئن شوئدبون، صدقه هگیری.

³ هیطوکه او شلِ مردکای پطرس و یوحنا بدِه که خؤانَن معبد دیرون بوشؤن، اوشونای صدقه بخواسّه.

⁴ پطرس و یوحنا او شلِ مردکاکه چال بزِئن؛ پطرس او مردکاکه بوته: « اَمره بَین!»

⁵ بازین او شلِ مردکای اوشونه نیگاه گوده و منتظر بو یه چی اونه هدِئن.

⁶ ولی پطرس اونه بوته: «مو نه طلا دئنم و نه نقره دَئنَم، ولی از اوچی که دئنم تَه هَدِنَم! به ایسم عیسی مسیح ناصری ویریس و راه بشو!»

⁷ بازین پطرس او شلِ مردکاکه راستِ دستِ بیته و اونه ویریسؤنه. هو دم اونه پا و اونه زانوئن قوت بیته

⁸ و خو جا جی ویریسَه و خو پا سر بِیسه، راه دکته. بازین هوطو که واز واز کائدبو، خدا شكر کونؤن، ایشؤنِ أمره معبدِ دیرون بوشو.

⁹ همته مردم اونه هوطو که راه شوئدبو و خدا شكر کائدبو، بدِئن،

¹⁰ و بفهمسن ایی هو شلِ مردکاکه که پیشتر صدقه گیتن وَسه ’ قشنگ دروازه ‘ ورجه نیشت، و اوچی وَسه که اونه سر بومابو، مات بخوشته و قاقَ بوئن.

پِطرس گبؤن ایوانِ سلیمانِ میئن

¹¹ هو زمؤن که او مردکای پطرس و یوحنا أمره شوئدبو و اوشونای سیوا نبنه بو، مردم همته حیرونَ بو ’ایوان سلیمان‘ میئن، ایشونِ سو بودوؤسَن.

¹² وختی پطرس اینه بدِه، وگرسه جماعتِ بوته: «ای یهود مرداکؤن، چرِء ایی كار وَسه هنیچی حیرونَ بوین؟ چرِء اَمره چال بزین، انگار که أمه، خودمونه قوت و دینداری أمره، کاری بودیم که ای مردکه راه بشو

¹³ ابراهیم خدا و اسحاق خدا و یعقوبِ خدا، اَمه پئرؤن خدا، خو خدمتگزار عیسی جلال بده، هونی که شمه اونه تسلیمَ گودین و پیلاتُس فرماندارِ ورجه اونه حَشا گودین، گرچه پیلاتس تصمیم ایی بو که اونه آزادَ كونی.

¹⁴ ولی شمه او قدوس و صالح، حشا بودین و بخواستین یکته قاتیل بجای او، شیمه به آزادَ بی.

¹⁵ شمه اونیِ که زیندگی سرچشمه بو بکوشتین، اما خدا اونه مُرده‌أنِ میئنای زنده بوده و أمه اینه واسه ای چیونه شاهیدون ایسّیم

¹⁶ و عیسی ایسم، و ایمؤن به اونه ایسمِ أمره ایسه که ایی مردکای قوت هیته، ایی مردکای که اونه اینین و شناسنین. ایمؤنی که بواسطه اونه ایسم، ایی مَردکه شیمه همته جلو کامیل شفا بدَه.

¹⁷ «و الؤن ای برأرؤن، دؤنم که شمه و شیمه قوم پیلترونِ كار، نادونی جی بو.

¹⁸ ولی خدا هی کار أمره اوچیزی که تمؤم پیغمبرؤن زبونَ جی پیشگویی بوده بو انجوم برسونه که: اونه مسیح، عذاب کشنَه .

¹⁹ پس توبه بکونین و خدا سو وگردین تا شیمه گوناهؤن پکا بی

²⁰ تا او زمون برسی که خداوند حضور جی تازگی شیمه به بای، تا خدا، مسیح موعود که پیشتر شیمه بِه انتخاب بؤ بو، سرا دای، یعنی هو عیسی.

²¹ که آسمؤن بأیسی اونه قبول بوده بی تا روزونی که همه چیز طبق او چیزی که خدا از قدیم خوشه تموم مقدس پیغمبرؤنِ زبونَ جی بوته، به انجوم برسونی.

²² موسای پیغمبر بوته: ”خداوندْ خدا، شمه برارونِ میئن یکته پیغمبر می مورسون شیمه به سرا دِئنه و هرچی که او شمره گونه، باء گوش بدین.

²³ هر کس او پیغمبر گب گوش ندای، مردومِ میئنای هلاک بنه.“

²⁴ «همه‌ء پیغمبرؤنم، کی بعد سموئیل بومَئبوئن، یکصدا ایی روزؤنِ باره پیشگویی بودِه بوئن.

²⁵ و شمه پیغمبرؤن زأکؤنین و وارثِ او عهدی ایسیّن که خدا شیمه پئرؤنِ أمره دوَسّه. هو موقع که خدا ابراهیمِ بوته: ”به واسطه تی نسل تمؤم زمین مردومؤن برکت هگینن.“

²⁶ هوموقع که خدا خو خدمتگزار، عیسی انتخاب بوده، اول اونه شیمه ورجه سرا دا تا هرته از شمره بركت بدای، و ایی کار أمره شمره شیمه شرور راهؤنَ جی وگاردوئنه.»