اعمالٚ رسولأن 28 - کتاب مقدس به زبان گیلکی - گویش شرقی

جزیرۀ مالت

¹ وقتی سلامتی امره ساحلِ برسِئیم، بفَهمسیم او جزیره ایسم مالت ایسّه.

² جزیره آدمؤن اَمه بِه خیلی محبت بودَن و اَمره گرمی امره قبول بودَن. اوشؤن اَمه بِه آتش روشنَ گودَن، چون بارؤن بارسی و هوا سرد بو.

³ پولُس اَنِی هیمه جومَه گوده و وختی اونه آتش سر نَئدبو، آتش گرمایی وسه، یکته مار اونه میئنای بیرون بومَه و بچسبسه اونه دستِ.

⁴ جزیره آدمؤن وختی بدِئن که مار اونه دستای آؤزینه، همدیگرِ بوتَن: «بی شک ایی مردکای قاتیله که هر چند دریا جی نجات پیدا گوده، عدالت نوگزانه او زنده بمؤنی.»

⁵ امّا پولُس مار آتش میئن تؤوده و هیچ آسیبی ندِه.

⁶ مردم انتظار دأشتن اونه جؤن وَرَم بکونی یا اونکه یدفاری بَکای و بمیری. امّا بعدِ خیلی انتظار، وختی بدِئن هیچ آسیبی اونه نرسِه، اوشونه فکر عوض بو و بوتَن او یکته از خداأن ایسّه.

⁷ او نزدیکی زمینؤنی هَنّه بو که رئیس جزیره پوبلیوس شی بو. او اَمره خو خونه دعوت بوُده و سه روز به گرمی اَمرای پذیرایی بوُده.

⁸ اتفاقاً، پوبلیوس پئر ناخوش بو و تب اسهال داشت. پولُس اونه ورجه بوشو و دعا بُوده، اونه سر دست بَنه و اونه شفا بدَه.

⁹ بعدِ ایی اتفاق، بقیه ناخوشؤن که جزیره میئن ایسا بوئن، اَمَئن و شفا پیدا گودن.

¹⁰ اوشؤن، اَمره خیلی احتروم بنَئن، وختی خواستیم اوره جی بشیم، هر چی که نیاز دأشتیمِ اَمه بِه تهیه بدِئن کشتی دیرون بنن.

پولُس رومَ فرسه

¹¹ بعد اونکه سه ماه جزیره دیرون بیسأیم، او کشتی أمره که زمستؤنه جزیره میئن بومُنسبو، دریا بوشوئیم. او کشتی اسکندریه شی بو و علامت دوپیکر داشت.

¹² سیراکوزِ شار برسِیم، لنگر تؤودَیم و سه روز اوره بیسایم.

¹³ بازین أمه دریایی سفرِ ادامه بدایم و ریگیون شهرِ برسِیم. فردأیی، جنوب باد ویریسَه، پوتیولی شهر برسِیم.

¹⁴ اوره چند ته برأر پیدا گودیم که اَمه جی دعوت بودَن یه هفته ایشؤنِ أمره ببیم. سر آخر روم شهر برسیم.

¹⁵ اوره برأرؤن بشتؤسه بوئن که اَمه راه میئن ایسایم، تا آپیوس بازار و یکته دهات که ’سه میخانه‘ نام داشت بومَئن تا اَمه جی استقبال بکونن. پولُس ایشؤنه دئن أمره خدا شکر بوده و اینه دیل قرصَ بو.

¹⁶ وختی روم برسیم، پولُس اجازه بدَه بوبو تنهایی یکته سرباز أمره که اینه نیگهبون ببی، خو خونه میئن بیِسی.

¹⁷ سه روز بعد، پولُس یهود پیلترونِ خوشه ورجه دوخُنده. وختی جومَه بوئن ایشؤنه بوته:«ای برأرؤن، با اونکه مو کاری نوئده بوم که ضد می قوم یا اَمه پئرؤن رسم ورسوم ببی، مه اورشلیم میئن دستگیر بوئدن و رومی أن تحویل بَدئن.

¹⁸ اوشؤن می جی بازخواست بودن و تصمیم بیتن مه آزادَ کونن، چون می جی جرمی ندئن که مردن سزاوار ببی.

¹⁹ امّا چون یهودی أن اعتراض بوده بوئن، ناچار بوبوم امپراطور جی بخام رسیدگی بکونی، البته نه اونکه می قوم جی شکایت بُوده بوم.

²⁰ هینه وَسه خوأستم شمره بینم و شیمه أمره گب بزنم، چونکه یهود مردمه او اُمید وسه ایسّه که مه قول و زنجیر دوَسّه دئنن.»

²¹ اوشؤن جواب بدئن: «اَمه هیچ نؤمه ای یهودیه جی تی باره هَینتیم، و هیتّه از برأرؤنی که از اوره بومَئن، هیچ بد خبر یا بد گب تی باره نأردَن.

²² ولی خوائنیم تی نظرؤنِ بشتؤئیم، چون دؤنیم که مردم هر جا بر ضد ایی فرقه گب زِئدرن.»

²³ پس یه روز معین بودن و خیلی أن او جایی که پولُس زندگی گود بومَئن تا اونه بَینن. پولُس صوب تا شؤ، خدا پادشاهی باره توضیح بده و گب بزه و حقسعی بوُده تا موسی تورات و پیغمبرؤن کیتاب أمره، اوشون قانع بکونی که عیسی قبول بکونن.

²⁴ بعضی أن اونه گب قبول بودَن، ولی بقیه ایمون نأردن.

²⁵ پس هوطو که همدیگر أمره بگو مگو گودن، اورای بوشوئن. امّا قبلِ اونکه اورای بوشوئن، پولُس خو آخرین گب بزه و بوته: «روح القدس چنی درست شیمه پئرؤنِ أمره گب بزه، وقتی که توسط اِشَعیای پیغمبر بفرمأستِ:

²⁶ «”ایی قوم ورجه بشو و بگو، ’شیمه گوش أمره ایشتؤئنین، امّا هرگی نفَهمنین؛ شیمه چیشم أمره اینین، امّا هرگی شمه حالی نبنه.‘

²⁷ چون ایی قوم دیل سنگَ بؤ، ایشؤنِ گوشؤن سنگینا بؤ، و خوشؤنِ چیشمونِ دوَسته دئنن، نبی که خوشؤنِ چیشمونِ أمره بینَن، و خوشؤنِ گوشؤنِ أمره بشتؤئن، و خوشؤنِ دیلؤنِ میئن بفهمن و وگردن و مو ایشؤن شفا بدِئم.“

²⁸ «پس بودؤنین که خدا نجات غیر یهودی أن ورجه سرا دا بوبؤ، و اوشون گوش خانن گودن!»[

²⁹ بعدِ اینکه پولُس ای چیزونه بوته یهودی أن هوتو که بدجور همدیگر أمره بگو مگو کائدبون اوره اجی بشون.]

³⁰ پولُس دو سال تمام خوشه خوئه میئن که خودش اجاره بوئدبو بیسَه و هر کس اونه ورجه اَمَه، گرمی أمره قبول گود.

³¹ پولُس خدا پادشاهیِ اعلؤم گود و جرعت أمره و بدون اونکه کسی اینه جلو بگیری خداوند عیسی مسیح باره تعلیم داء.