اعمالٚ رسولأن 25 - کتاب مقدس به زبان گیلکی - گویش شرقی

پولُسِ محاکمه، فِستوس ورجه

¹ سه روز بعدِ اینکه فِستوس خوشه ولایت میئن بوشو، قیصریه جی اورشلیم بوشو.

² اوره کاهنؤن سرون و یهودِ قومِ پیلترون اونه جلو حاضیرَ بوئن و خوشؤنِ شکایته پولُس ضید بوتن.

³ اوشؤن اصرار أمره فِستوس جی بخوأستن ایشؤن سر منّت بنای، پولُس اورشلیم سرا دای، چون اونه چرِ سر نیشتبون که اونه راه میئن بکوشن.

⁴ فِستوس جواب بده که :«پولُس قیصریه دیرون زندونی ایسه و مو خودمم خوائنم خیلی زود اوره بشوم.

⁵ فِستوس بوته: «پس اوشونی که شمه میئن پیله تر ایسّن، تینن می أمره بأئن تا اگه ایی مَردکه جی خطایی سر بزه، خوشؤنِ شکایته اونه ضد بوگوئن.»

⁶ بعدِ هشت تا ده روز فِستوس که اوشونه أمره بو، قیصریه وگرسه. و فردأیی، محکمه تشکیل بده و دستور بده پولُسِ بأرَن.

⁷ وقتی پولُس دیرون بومه، یهودی أنی که اورشلیمای بومابون، اونه دور گودن و اتهامات اونه بزِئن، امّا نوتونسَن اوشونه ثابت بکونن.

⁸ پولُس، خوشِ دفاع بوئده و بوته: «مو نه یهود شریعت ضد خطایی بوئدم و نه معبد ضد و نه امپراطور ضد.»

⁹ ولی فرمونده فِستوس که خوأست منّتی یهودی أنِ سر بَنای، پولُس بوته:«خوائنی اورشلیم بشی تا اوره ایی اتهامؤنِ وسه می ورجه محاکمه ببی؟»

¹⁰ پولُس جواب بده: «مو هی الؤن امپراطور محکمه دیرون ایسَم که بأء اونه دیرون محاکمه بوبم. شمه خودتون خوب دوئنین که مو هیچ خطایی نسبت به یهود انجؤم ندئم.

¹¹ اگه الؤن خطایی بُودم و یا کاری از مو سر بزه که موردن می حق ببی ، موردَنای واهیمه ندَئنم. امّا اگه اتهامؤنی که ایشون مه زئنن، بی خودی ببی، هیکس منئه مه اوشونه دست تحویل بدای. امپراطور جی دادخواهی کوئنم.»

¹² فِستوس بعدِ اینکه شورا آدمونِ أمره مشورت بوئده، بوته: «تو خواستی که تی قضیه امپراطور محکمه دیرون رسیدگی ببی؟ پس امپراطور جلو شنی!»

پولُس، آگریپاس ورجه

¹³ بعد اونکه چند روز بوگذشته، آگریپاس پادشاه و بِرنیکی، فِستوس خوشامد گوتن بِه قیصریه بومَئن.

¹⁴ اوشون چند روز اوره بیسَن، فِستوس پولُسِ ماجرا پادشاه أمره تعریف بوئده و بوته:«اِره یکته مردکای ایسا که فِلیکس اونه زندؤن دیرون بدأشته.

¹⁵ وقتی اورشلیم ایسابوئم، کاهنونِ سرون و یهود شیخون اتهاماتی اونه وارد بودن و اونه محکومیت بخواستَن.

¹⁶ « مو اوشونه جواب بدئم که رومی ان داب ندئنَن که یکته متهم تسلیم بکونن، مگه اونکه خو مخالفؤنِ أمره روبرو ببی و بتؤنی او اتهامؤن وسه که اینه زئنن، خوشای دفاع بکونی.

¹⁷ پس اوشون وختی اِره بومئن، معطل نودَم بلکه فردأیی، محکمه بَنم و دستور بدَم پولُس می ورجه بأرَن.

¹⁸ وختی که اونه شاکیان ویریسَئن تا گب بزنن، اونه به هیتّه او بدکارون جی که مو انتظار داشتم، متهمَ نودَن.

¹⁹ بلکه فقط یکی دوته مسئله سر خوشؤنِ دین باره و عیسی ایسم باره که بمورده و پولُس ادّعا کوئنه که زنده ایسّه، بگو مگو بوئدن.

²⁰ مو که نودونسَم چوطو بأء ایجور مسائل رسیدگی گودَن، اونای بپورسئم خوأنی که اورشلیم بشی تا اوره ایی اتهامؤنِ بِه محاکمه ببی.

²¹ ولی وقتی پولُس بخواسته تا هو وقت که اون قضیه امپراطور محکمه دیرون وارسی ببی زندون دیرون بیسه، دستور بدَم تا اونه بدأرن، تا روزی که بتونم اونه امپراطور ورجه سرا دئم.»

²² بازون آگریپاس فِستوسِ بوته:«دوست دئنَم خودم اونه گبؤنِ بیشتوئم.» فِستوس بوته :«فردِ ایشتؤنین.»

²³ پس، فردأیی، آگریپاس و بِرنیکی، پیله دَب دَبه و کب کبه ی أمره بومَئن و نظامی فرمانده أن و شهر سرشناس آدمؤن أمره محکمه سالن دیرون بومئن. فِستوس دستور بده، پولُسِ بأرن.

²⁴ فِستوس بوته: «ای آگریپاس پادشاه، و ای تموم مردمی که اِره ایساین! تمام مردومِ یهود، چی اورشلیم دیرون و چی اِره، ایی مرداکَ جی که اینین می ورجه شکایت بُودن و فریاد بزئن که نباید زنده بمؤنی.

²⁵ ولی مو بفهمسّم که او کاری نؤده که اونه سزا موردن ببی و چونکه او خودش خواست امپراطور محکمه دیرون بشی، پس مو تصمیم بیتم اونه روم سرا دِئم.

²⁶ ولی اون باره هیچی ندائنم که حتمی ببون تا امپراطور به بنویسم. اینه واسه اونه شیمه همته ورجه، مخصوصا شیمه ورجه، ای آگریپاس پادشاه باردم بلکه بعدِ بازخواست، یکچی نیویشتن بِه بیاجم.

²⁷ چون می عقل أمره جور در نئنه که یکته زندونیِ امپراطور ورجه سرا دئم، ولی ننویسم که اونه اتهامون چی ایسه.»