اعمالٚ رسولأن 24 - کتاب مقدس به زبان گیلکی - گویش شرقی

پولُس محاکمه فِلیکْس ورجه

¹ پنج روز بعد، حنانیا، پیله کاهن، چند نفر از شیخون و یکته وکیل بایسم تِرتولُس أمره، قیصریه شهر بومان. اوشون خوشؤن شکایتِ پولس ضید، فرماندار ورجه ببوردن.

² وقتی که فرماندار پولُسِ احضار بوئده، تِرتولُس،پولُسِ فلیکس ورجه ایطو متحم بوئده بوته: «عالیجناب فلیکس، خیلی وقتِ که أمه شیمه سایه جیر، صلح و آرامش دئنیم و شیمه آینده نگری باعث بوبو کی ایی مردم وضع خوب تر ببی،

³ اَمه وظیفه دؤنیم هر جا و هر وخت، همیشه شیمه جی قدردؤنی بکونیم.

⁴ امّا اینه وسه که بیشتر از ایی شیمه وختِ نگیریم، خواهَش دئنیم اَمه به لُطف بکونین، انی اَمه گبون بشتوئین.

⁵ «اَمه بِه ثابت بُوبؤ که ایی مردکه، آدمی ایسّه که فتنه توئدنه و سرتاسر دنیا یهودی أن میئن آشوب بپا کوئنه. ای ادم ناصری فرقه سر دسته هم ایسه.

⁶ او حتی حقسعی بُوده که معبد بی حرمتَ کونی؛ اما اونه بیتیم و خوأستیم طبق أمه شریعت اونه محاکمه بکونیم

⁷ ولی لیسیاس فرمانده بومَه و اونه به زور اَمه دستای هیته،

⁸ و اونه شاکی أنِ دستور بده تا شیمه ورجه بَئن. الؤن، اگه شمه خودتون اونای بپورس دپورس بکونین، حقیقت اوچیه که أمه اونه متّهمَ گودیم، شیمه بِه آشکارَ بنه.»

⁹ یهودی أنم یکصدا تمام ای چیزون تأئید بودَن.

¹⁰ وختی فرماندار پولُسِ اشاره بُوده که گب بزنی، پولس ایطوری جواب بده: « دؤنم خیلی سال ایسّه که ایی قوم سر داوری کادرین؛ پس، شادی أمره، می جی دفاع کونم.

¹¹ شمه خودتون تینین بررسی بکونین و بفهمین که از زمانی که مو پرستش بِه اورشلیم بوشوم تا الون، دوازده روز بیشتر نوگذرنه،

¹² و ایی مدت میئن، هی کس مَه ندِه که یهودِ عبادتگاه میئن کسی أمره جرّ و بحث بکونم یا اونکه پرستشگاه أن میئن و یا شهر میئن، مردم تیرا کوئنم.

¹³ اوشؤن منئن اتهامؤنی که الون بر ضد مو زِئدرن، ثابت بکونن.

¹⁴ امّا اینه شیمه ورجه اعتراف کوئنم که طبق او طریقتی که اوشون اونه یکته فرقه دوئنن أمه پئرون خدا پرستش کوئنم و هر اونچه که تورات میئن و پیغمبرون کتاب میئن بنویشته بوبو اعتقاد دئنم.

¹⁵ و منم ایشؤنِ مرداکون مورسون خدا امید دئنم و اعتقاد دئنم او روزی که مرده أن زنده بنن ،خوب آدمون و بد آدمونِ به هم هنه.

¹⁶ هینه وَسه، همیشه حقسعی کوئنم تا خدا و مردم ورجه پاک وجدان أمره زندگی بکونم.

¹⁷ « الون مو بعدِ چند سال، اورشلیم شهر سو بوشوم تا می قوم به صدقه أنی ببرم و پیش کش بکونم.

¹⁸ هوتو که اینه انجوم دئده بوم مه هو موقعی که معبد دیرون یهودیانه تطهیر رسم رسومه بجا ارده دبوم بیأتن.نه مردم ایسابون و نه بلوا بو.

¹⁹ ولی اوره چند ته یهودی، آسیا ولایت جی ایسابون که اوشونم بأیستی اِره شیمه ورجه ایسابوئن تا اگه می ضد شکایتی دَئنن، بوگوئن.

²⁰ یا بوگذار ایشونی که اِره ایسَئن، بوگوئن که وختی مو شورا ورجه ایسا بوم، چی جرمی می جی بیأتن،

²¹ جز اونکه اوشؤن میئن بلند صدا أمره بوُتم: ” مرده أنِ زنده بوئنِ وسه ایسه که امروز شمه ورجه محاکمه بوئدرم.“‌»

²² ولی فرماندار فلیکس که طریقت خوب شناخت، او محاکمه بنه یه وختِ دیگه و بوته: «وختی فرماندار لیسیاس بأی، شیمه شکایتِ به تصمیم گینم.»

²³ بازین افسری که مسئول بوئه دستور بده تا پولُس بپّای، انی آزادی هده و مانع نبی که اونه رفیقون اونه نیازؤنِ برطرف بکونن.

²⁴ چند روز بعد، فِلیکس خو زنِ أمره دروسیلا که یهودی بو، بومَه و پولُس دومبال سرادا. اون پولوس گبؤنِ که عیسی مسیح ایمون باره بو گوش بده.

²⁵ وقتی پولُس، صالحی بوئن و پرهیزگاری و داوری آینده جی گب بزه، فِلیکس بترسه و بوته: « تا ایره ده بسِه! الون تینی بشی. یکته وخت دیگه میئن هنده ته دوخبِئنم.»

²⁶ با ای حال امید داشت، پولُس اونه رشوه هدای. هینه وَسه، چندین بار اونه احضار گود و اونه أمره گب زی.

²⁷ دو سال بعد، پورکیوس فِستوس، فِلیکس جانشین بوبؤ. ولی فِلیکس، اینه وسه که یهودی أن سر منّت بَنای، پولُس هوطو زندؤن میئن بدأشتِ.