اعمالٚ رسولأن 23 - کتاب مقدس به زبان گیلکی - گویش شرقی

¹ پولُس، شورا اعضا چیشمِ چال بزه و بوته: «برأرؤن، مو تا امروز می وجدون راحت بو و خدا حضور میئن زندگی بُودم.»

² وقتی اینه بوته، پیله کاهن، حَنانیا، اوشونیِ که پولُس کنار ایسا بوئن، دستور بده تا اونه دَهنِ سر بزنن.

³ بازون پولُس اونه بوته: «خدا تَه زئنه، ای سفیدَ بو دیوار! تو او تخت رو نیشتی تا عین شریعت مَه محاکمه بکونی، حله اونکه برخلاف شریعت، دستور دئنی مَه بزنن؟»

⁴ اوشونی که پولُسِ ورجه ایسا بوئن، بوتَن: « توخدا پیله کاهن توهین کوئنی؟»

⁵ پولُس بوته: «ای برأرؤن، نودونسَم پیله کاهنِ؛ چون تورات دیرون بنویشته بوبو که: ”تی مردم رهبرِ بد نگو.“

⁶ بزین پولُس که دؤنس بعضی از اوشؤن صدّوقی فرقه عالمون و بعضی فریسی فرقه عالمون ایسن، پیله صدا أمره شورا میئن بوته: «ای برأرؤن، مو فریسی و فریسی زاده ایسّم، و اینه وسه که مرده أن زنده بوئن امید دئنم مه محاکمه کاء درین.»

⁷ وختی پولُس اینه بوته، فَریسی أن و صَدوّقی أن میئن بگو مگو بوبؤ و جماعت دو دسته بوبوئن،

⁸ چونکه صَدّوقی أن گونن، نه مرده أن زنده بوئن وجود دئنه، نه فرشته و نه روح، امّا فَریسی أن ایشونِ همه اعتقاد دئنَن.

⁹ بزون خیلی سروصدا بپا بوبؤ! بعضی از تورات معلمون که فریسی بوئن، ویریسَئن و اعتراض بودن و بوتَن: « ایی مردکاکِ دیرون هیچ خطایی نَینیم. از کوره معلومه که یکته روح یا فرشته اونه أمره گب نزه بی.»

¹⁰ دعوا انی زیاده بو که فرمونده بتَرسه نکونه پولُسِ تیکه پرَه بکونن. پس سربازؤنِ دستور بده جیر بوشوئن و اونه اوشونِ دستای بیرون بأرَن، قلعه میِئن ببورن.

¹¹ هو شؤ، خداوند پولُس کنار بِیسه و بوته: «تی دیل قورص ببی! هوطو که اورشلیم میئن مه به شهادت بدای، روم میئنَم باء شهادت بدی.»

توطئه پولُس کوشتن به

¹² وقتی صبح بوبو، یهودی أن همدیگر أمره توطئه دچِئن، قسّم بوخوردن تا پولُسِ نکوشن، نه هیچی بوخورَن و نه هیچی وودوشَن.

¹³ بیشتر از چهل نفر ایی توطئه میئن دست دأشتَن.

¹⁴ اوشؤن، سرونِ کاهنؤن و شیخون ورجه بوشؤئن و بوتَن: «امه قسّم بوخوردیم که تا پولُس نوکوشیم، هیچی نوخوریم.

¹⁵ پس الؤن شمه و شورا آدمؤن، رومی فرمؤنده جی بخوأین تا اونه شیمه ورجه بأره، به ایی بهؤنه که خوانین دقیقتر اونه باره بررسی بکونین. أمه آماده ایسیّم قبل اونکه او ایره برسی اونه بوکوشیم.»

¹⁶ پولُس خوأخورزه ایی توطئه جی واخوبَ بو و قلعه میئن بوشو، پولُسِ بوته.

¹⁷ پولُس یکته از افسرؤنِ دوخُنده و بوته: «ایی جوؤنِ، فرمؤنده ورجه ببور، چونکه خوائنه یکچی اونه بگوی.»

¹⁸ افسر اونه فرمؤنده ورجه ببورده و اونه بوته:«پولُسِ زندؤنی، مه دوخُنده و می جی بخواسّه ایی جوؤنِ شیمه ورجه بأرم؛ خوائنه شمره یه چی بوگوی.»

¹⁹ فرمؤنده جوؤن مردکاکِ دست بیته، اونه یکته کنار هکشه و خلوتی بپورسه:«خوأئنی مه چی بوگوی؟»

²⁰ پولس خوأخورزه بوته: «یهودی أن دست به یکی بودَن تا شمرای بخوائن که فردا پولُسِ شورا میئن بأرین، به ایی بهؤنه که خوائنن دقیقتر اونه باره بررسی بکونن.

²¹ ولی نوگذار ته به ای کار قانع بکونن، چونکه بیشتر از چهل نفر اونه چرِ سر نیشتَن. اوشؤن قسّم بوخوردن که تا اونه نکوشن، نه هیچی بوخورَن و نه هیچی وودوشَن. الؤن آمادَئن، و فقط منتظرن که شمه اوشونه درخواست قبول بکونین.»

²² پس فرمؤنده، جوؤنِ سرا دء و اونه قدغن بوده، بوته:«هیچ کسِ نگو که ایی چیزون خبر مه بدای.»

پولُسِ قیصریه بِئنَن

²³ پس فرمونده دو ته از خو افسرؤنِ دوخُنده و اوشونه دستور بدَه: «دویست ته پیاده سرباز، هفتاد ته سواره نظام و دویست ته نیزه دار آماده بکونین تا، امشو ساعت نه، قیصریه شهر بوشوئن.

²⁴ پولُسِ بِه هم یکته اسب فراهم بکونین و اونه صحیح و سالم، فِلیکْسِ فرماندارِ تحویل بدین.»

²⁵ یکته نؤمه فرماندارِ به بنویشته:

²⁶ «از کلودیوس لیسیاس به عالیجناب فِلیکْسِ فرماندار: سلام بر شمه،

²⁷ یهودی أن ایی مرداکِ بیتَن، تصمیم دأشتَن اونه بکوشَن، امّا مو می سربازؤن أمره بوشوئم و اونه نجات بدَئم، چون بشتؤسه بوم روم شهروند ایسّه.

²⁸ مو خوأستم بفهمم چی وَسه اونه متّهمَ کوئنن، پس اونه ایشؤنه شورا ورجه ببوردم.

²⁹ بفهمسّم که اونه اتهامون خوشؤنِ شریعتِ وسه ایسه و جرمی نوئده که اونه سزا موردن یا زندؤن ببی.

³⁰ بازین چون واخوبَ بوم که اونه ضد توطئه بُودن، درجا اونه شیمه ورجه سرادئم. اونه شاکی انم دستور بدم تا شکایتی که اونه جی دأئننِ، شیمه ورجه بأرَن.»

³¹ پس ایطو بو که، سربازؤن طبق دستور، شبونه پولُسِ خوشؤنِ أمره، آنتیپاتْریس شهر ببوردَن.

³² فردایی او روز، پیاده سربازون قلعه سو وگرسن و فقط سواره سربازون پولُس همراهی بوئدن.

³³ وختی که سواره سربازون قیصریه شهر برسن، او نؤمه هَدَئن فرماندارِ و پولُسِ اونه ورجه بأردَن.

³⁴ فرماندار نؤمه بوخونده و پولُسَ جی بپورسه کو ولایت ا جی بماء. وقتی بفهمسه که کیلیکیه شی ایسّه،

³⁵ اونه بوته: «مو وختی تی شاکی أن اِره برسئن، تی گبؤن گوش دئنم.» بازین دستور بده تا پولُسِ هیرودیسِ کاخ دیرون بدارن و اونه بپائن.