اعمالٚ رسولأن 20 - کتاب مقدس به زبان گیلکی - گویش شرقی

پولُس مقدونیه و یونان سفر کوئنه

¹ وختی بلوا تمام بوبو ، پولُس شاگردؤن خوشه ورجه دوخُنده و بعد اینکه ایشؤن تشویق بوئده، اوشونه أمره خداحافظی بوُده و مقدونیه سو رادکته.

² پولوس، او مناطقَ جی بوگذشته، ایمان دارون خو گبؤن أمره خیلی دیلگرمی بده، تا اینکه یونان برسه

³ پولوس سُه ماه اوره بِیسه. هوموقع که خواستی کشتی أمره سوریه بشی، یهودی أن اونه ضید توطئه بودن. پس تصمیم بیته تا مقدونیه راهَ جی وگردی.

⁴ پولوس همراه أن ایشون بوئن: سوپاتِر، پیرروس ریکه که بیریه شی بو، آریستارخوس و سِکونُدوس که تسالونیکی شی بوئن، گایوس وتیموتائوس که دِربِه شی بوئن، تیخیکوس و تروفیموس که آسیا شی بوئن.

⁵ اوشؤن اَمه جی پیشتر بوشؤئن و تروآس میئن اَمه ریفاه بَیسئن.

⁶ ولی اَمه بعد از عید فَطیر ، کشتی أمره فیلیپی شهر جی راه دکتیم و پنج روز بعد، تروآس دیرون اوشونه ورجه بوشویم و هفت روز اوره بِیسَئم.

یوتیخوسِ زنده بوئن

⁷ اوّلی روز هفته، نون پارَه گودنِ به جومَه بویم. پولُس مردم بِه گب زی، و چون تصمیم داشت فردأیی اورای بشی، اونه گب زئن تا نصف شؤ طول بکشه.

⁸ او تلارخونه میئن که جومَه بوبیم، گرد سوز چراغ زیاد هنه بو.

⁹ یکته جوان که اون اسم یوتیخوس بو پنجره کنار نیشته بو. هوطو که پولُس خوشه گب زئنه ادامه دادبو، او جوان کم کم یکته سنگین خؤ میئن بوشو و یدفاری طبقه سوّمای جیر بَکته و وقتی که اونه بیاتن بدئن که بمورده.

¹⁰ پولُس جیر بوشو، خوشِ او جوؤن مرداکِ سر تؤدَه و اونه کیشَیته و بوته: «واهیمه ندارین، او نَمَرده!»

¹¹ بازین پولس جؤر بوشو و نون پارَه بوده و بوخورده. او تا سحر گب زئنه اوشونه أمره دومباله بده، و بعد اورای بوشو.

¹² مردم او جوؤنِ زنده خونه ببوردن و خیلی تسلی هیتن.

¹³ ولی أمه سفر دیرون پیش از پولُس یکته کشتی سوارَ بویم، آسوس شهر سو راه دکتیم تا اوره طبق پولُس قرار، اونه کشتی میئن بأریم، چون پولُس خوأست تا اوره، خُشکی راهَ جی بشی.

¹⁴ وقتی پولُسِ آسوس شهر دیرون بدِیئم، اونه کشتی دیرون بأردیم و میتیلینی شهر سو بوشوییم.

¹⁵ اورای کشتی أمره راه دکتیم و فردأیی خیوس جزیره جلو برسیم. پس فردأیی ساموس جزیره بوشویم و روز بعد، میلیتوس شهر برسیم.

¹⁶ پولُس تصمیم داشت دریا راهَ جی اَفسُسِ کنارای بوگذری تا خوشه وخته آسیا ولایت میئن هدر ندی، چون عجله داشت که اگه ببی، پَنتیکاست روز میئن اورشلیم دیرون بِیسی.

پولُس اِفِسُس شیخونِ أمره خدافظی کوئنه

¹⁷ پولُس، میلیتوس جی یکته پیغوم افِسُس به سرا دا و کلیسا شیخونِ خو ورجه دوخُنده.

¹⁸ وختی اوشون بومَئن، پولُس ایشؤنِ بوته: «شمه خودتون، خبر دئنین هو اوّلی روزَ جی که آسیا میئن پا بَنَم، چوطو تمام می وخت شیمه به بنام.

¹⁹ چوطو اَرسو فودم و تمام فروتنی أمره خداوندِ خدمت گودم و او سختی أنی که یهودی أن توطئه واسه می سر بومَه، تحمل بُودم.

²⁰ هنده دؤنین که هرچی که ممکن بو شیمه به سود بدأره، هیچیِ دریغ نودَم، بلکه پیغؤمِ شمه بِه اعلوم بودَم، چی جمعِ دیرون و چی خونه به خونه شمه به تعلیم بدَئم.

²¹ هم یهودی أن و هم یونانی أنم شهادت بدم که باء توبه بکونن و خدا سو وگردن و اَمه خداوند عیسی مسیح ایمؤن بأرن.

²² «الؤن، خدا روحِ هدایت أمره اورشلیم شوئدرم و نودونم اوره چی می سر هنه؛

²³ جُز اونکه هر ته شهر میئن روح القدس هشدار دئنه که زندؤن و سختی می ریفاه ایسا.

²⁴ ولی مو، هم می جؤنِ هم می زندگی بی ارزش دوئنم. فقط اگه بتؤنم می دوره تمنه کونم و خدمتیِ که خداوند عیسی جی هیتَم، تا به آخر برسونَم، و خدا فیض و خدا خورم خبر به شهادت بدم.

²⁵ «الؤن دؤنم هیشکس از شمه که مو شیمه میئن بگرسم و خدا پادشاهیِ اعلام بُودم، دِه می روئه نَینین.

²⁶ پس امروز شمه شهادت دئنم که هیشکس خون می گردن نیه،

²⁷ چونکه مو در حق کسی کوتاهی نودم بلکه خدا پیغومه همته ذره، شمه به اعلام بودم.

²⁸ شمه حواس جمع ببی. مواظب تمام گله ای ببین که روح القدس شمه به انتخاب بوئده تا اوشونه بپاین. خدا کلیسا که اونه خوشه خون أمره بهه، شبانی بکونین.

²⁹ دؤنم بعدِ اینکه مو بوشوم، درّنده ورگؤن شیمه میئن هنن که گلّه به رحم نوکئنن.

³⁰ حتی شیمه میئنای کسؤنی ویریسنن و حقیقت عوضَ کوئنن تا شاگردؤن خوشونِ دومبال هکشن و از راه بدرَ کونن.

³¹ پس واخوب ببین و بخاطر بأرین که مو سه سال تمام، شبنده روز، می اَرسونِ أمره، یه لحظه هم شمه هشدار دئن اجی دست وینتم.

³² «الؤن شمره به خدا و اونه فیض بخشه کلام دست سپارنم که توئنه شمره بنا بکونی و همه کس میئن که تقدیس بوبوئن، ارث هدی.

³³ می چیشم هیشکسِ طلا و نقره و رخت میئن دنبو.

³⁴ شمه خودتون دؤنین که خودم می دست أمره، می احتیاجؤن و می همراه أن احتیاجؤنِ فراهم بُودم.

³⁵ مو از هر نظر شمره نیشون بدم که باء ایطو سخت کار بکونیم تا بتؤنیم ضعیفؤن دستِ بگیریم، و عیسی خداوند گبؤنِ به یاد بدأریم که چطو خودش بوته: ”هَدَئن، هیتَن جی بهتره.“‌» “‌

³⁶ پولوس وختی خو گبؤن تمنه گوده، زانو بزه و تمام اوشان أمره دوعا بوُده.

³⁷ همه خیلی ونگ بزِئن و اونه کیشَیتن، اونه موچی زئن.

³⁸ اوچی که بیشتر از همه اوشونه ناراحت گود، پولُس ایی گب بو که بوته:« دِه می روئه نینین.» بازین تا کشتی سو اونه بدرقه بودن.