اعمالٚ رسولأن 16 - کتاب مقدس به زبان گیلکی - گویش شرقی

تیموتائوس، پولس و سیلاسِ همراه بنه

¹ پولُس دِرِبه و لستره شهرون بوشؤ. اوره یکته شاگرد به ایسم تیموتائس زندگی گود که اونه مئر یهودی و ایماندار بو، ولی اونه پئر یونانی بو.

² برأرؤن لِستْره و قونیه دیرون، اونه خوبیِ گوتن.

³ پولُس چون خوأس که تیموتائوس سفر دیرون اونه همراهی بكونی، یهودیانه واسه که او منطقه دیرون زندگی گودن، اونه ختنه بوده، چون که همه دونَسَن تیموتائوس پئر یونانی‌ ایسّه.

⁴ اوشؤن وختی ایی شهرَ جی یکته شهر دیگه شوئن، او قانونی که رسولؤن و شیخون، اورشلیم دیرون بوته بوئن، مردمِ به گوتن تا اوشونِ رعایت بکونَن.

⁵ پس، كلیساأن ایمؤن دیرون قوت بیتَن و هر روز ایشؤنِ تعداد زیادَ بو.

پولُسِ رویا، مقدونی مرداکه باره

⁶ بازین، اوشون فْریجیه و غَلاطیه سرتاسره منطقه بگرستن، چون روح‌القدس ایشؤنِ اجازه ندَه که آسیا میئن خدا كلامِ برسؤنن.

⁷ وختی میسیه منطقه دیرون برسئن، حق سعی بودن که بوشوئن بیطینیه ولایت، ولی عیسی روح ایشؤن اجازه ندا.

⁸ هینه وَسه، میسیه جی بوگذشتن و تْروآس شهر بوشؤئن.

⁹ بازین پولس شؤ وخت، رویا دیرون بدِه که یکته مقدونی مردکه اینه چشمون جلو ایسا و اونه التماس كوئنه که «مقدونیه بیأ و اَمره كمك بكون.»

¹⁰ وختی پولس ایی رویا بدِه، درجا مقدونیه طرف بوشوئیم، چون مطمئنَ بوئیم که خدا اَمره دوخُنده تا ایشؤنِ انجیل خوروم خبر بدیم.

لیدیه ایمؤن اَردَن

¹¹ پس، تْروآسَ جی كشتی أمره یكراست ساموتْراكی جزیره سو بوشویم، و فردایی نیاپولیس شهر برسِیم.

¹² از اوره فیلیپی سو را دکتیم که یکته شهرون بو، که رومیان اوره زندگی گودن و مقدونیه خاک دیرون هنه بو. چند روز او شهر دیرون بئیسایم.

¹³ مقدس شنبه روز، او شهرَ جی بیرون بوشویم و روخونه كنار برسیم، گومان گودیم که اوره دعا بِه، جایی هَنّه بی. بنیشتیم و زنأكؤنی أمره که جومَه بوبؤئن، گب بزیم.

¹⁴ اوشونه میئنای یکته خداپرست زناک که تیاترا شهر شی بو ایسا بو که اَمه گبؤنِ گوش دَئدبو. اونه ایسم لیدیه بو و ارغوانی پارچه فورت که خیلی گرون قیمت بو. خداوند اونه دل بازَ گوده تا پولُس پیغؤمِ گوش بکونی.

¹⁵ وختی لیدیه خو خانواده أمره غسل تعمید هیته، خیلی اصرار اَمره بوته:« اگه یقین دئنین که خداوندِ ایمؤن بأردم، بأین و می خونه بَیسین.» سرآخر تسلیم اونه خواسته بوبویم.

پولُس و سیلاس زندؤن دیرون

¹⁶ یبار أمه او جایی که دعا گودیم شو دبیم، که یکته کولفت بدِیم که غیبگویی روح داشت . او فالگیری أمره سود زیادی خوشه اربابؤنِ بِه رسؤنی.

¹⁷ او پولُس و امه دومبال راه أمه و داد زی: «ایی مَردأكؤن، خدای متعال خدمت گزارن و شمره نجات راه‌ِ اعلام کوئنن.»

¹⁸ او کولفت خیلی روزون ای کار گود. سرآخر پولُس صبر به سربومَه و وگرسه و او کولفت روح بوته: « عیسی مسیح ایسم أمره تَه دستور دِئنَم که ایی لاکؤکا جی بیرون بأی!» هو دم روح او لاکؤکا جی بیرون بومَه.

¹⁹ ولی او کولفت اربابؤن وختی بدِئن اونی که اون أمره کاسبی گودن برباد بوشؤ خوشون امید از دست بدان، پولُس و سیلاس بیتن و اوشونِ هکش دکش أمره شهر میدون دیرون، رئیسون ورجه ببردن.

²⁰ هو وخت ایشؤنِ قاضی أن ورجه بأردَن و بوتَن: «ایی مَردأكؤن یهودی‌أن و اَمه شهرِ میئن آشوب تؤئدادرَن.

²¹ اوشون رسمؤنیِ تبلیغ کوئنن که اوشون قبول گودن و به‌جا اَردَن امه رومی أنِ بِه جایز نیه.»

²² مردم پولس و سیلاس سر بکتن و اوشون أمره همدست بوبوئن. قاضی أنم دستور بدَئن که اوشون رختؤنِ بَكنن و چوب بزنَن.

²³ بعد اونکه ایشؤن خیلی چوب بزِن، اوشون زندؤن دیرون تؤدَئن، و زندونبؤن دستور بدئن که حیسابی ایشونه بپّای.

²⁴ زندانبؤن وختی ای دستور هیته اوشون زندون دیرون توده و اوشون پاهونه زنجیر أمره یکته کنده دوسته.

فیلیپیه زندؤنبؤن ایمون ابنه

²⁵ نصف شؤ، پولُس و سیلاس دعا کأدبون و سرود أمره خدا پرستش گودن و بقیه زندؤنی أنم ایشؤنِ گوش دئن

²⁶ که یدفاری یکته پیله زلزله بومَه، جوری که زندؤنِ پی أن لرزه دکته و زندؤن دَرؤن هو لحظه بازَبو و زندونیون زنجیرؤن همته بشکسن.

²⁷ زندؤنبؤن خواب ا جی ویرسهَ، و وختی زندؤن دَرؤنِ وأگوده بدِه شمشیر هکشه تا خوشِ بکوشی، چون فكر گود زندؤنی أن فرار بودَن.

²⁸ ولی پولُس پیلّه صدا أمره، بوته: «تَه آسیب نرسؤن چون که امه همه اِره ایسایم!»

²⁹ زندانبؤن فانوس بخواسّه و تأ تأدی زندؤن دیرون بوشو و درحالی که ترس ا جی پَرکَسِ دبو پولُس و سیلاس پا جیر بکته.

³⁰ بازین، ایشؤنه بیرون بأرده و بپرسه: « آقایؤن، چی بكونم تا نجات هگیرم؟»

³¹ اوشون جواب بدئن: « عیسی مسیح خداوند ایمؤن بأر که تو و تی خونه آدمؤن نجات پیدا کوئنین.»

³² پولس و سیلاس خداوندِ كلام ا جی، اونه به و تموم كسؤنی که اونه خونه دیرون ایسا بوئن، بوتَن.

³³ هووخت او شؤ، زندانبؤن اوشونِ بیرون بَرده، اوشونِ زخمؤنِ بوشوسّه، و درجا او و تموم اونه خونه آدمؤن غسل تعمید هیتن.

³⁴ زندانبؤن ایشؤنه خوشه خونه ببورده و ایشؤنه بِه سفره وارگنه. زندانبؤن و تموم اونه خونه آدمؤن بخاطر اونکه به خدا ایمؤن بأرده‌بوئن خیلی خوشحال بوئن.

³⁵ وختی روزَ بو، قاضی أن مأمورؤنی زندانبؤن ورجه سرادئن، بوتَن: «او مَردأكؤن آزادَ كون!»

³⁶ زندانبؤن پولُس ایی پیغؤم جی واخوبَ گودِه و بوته: «قاضی أن دستور بدئن که شمره آزاده کونَم. پس الؤن بیرون بأین و به‌سلامت بشین.»

³⁷ ولی پولُس اوشونه جواب بده: «امه که روم شهروند ایسیم و اَمره بدون محاكمه همّته‌ ورجه چوب بزئن و زندؤن تؤدَئن الؤن خوائنن مخفیؤنه آزاده كونن؟ نه، اصلاً! بلكه خوشؤن بأئن و اَمره اِرای بیرون بأرَن.»

³⁸ مأمورؤن اینه خبر قاضی أن بوتَن، و اوشؤن وختی بشتؤسَن که پولُس و سیلاس روم شهروند ایسّن، خیلی بترسِئن

³⁹ پس بومَئن و ایشؤنای معذرت بخواستَن و تا زندؤن بیرون ایشؤنه أمره بوشؤئن و خواهش بودَن که شهرَ جی بوشوئن.

⁴⁰ بعدِ اونکه پولس و سیلاس زندونَ جی بیرون بمئن، لیدیه خونه بوشؤن. اوره برارونِ بدِئن، ایشؤنِ تشویق بودَن. بازین اورای ترک بودن.