اعمالٚ رسولأن 15 - کتاب مقدس به زبان گیلکی - گویش شرقی

اورشلیم شورا

¹ اما چند نفر یهودیه ولایت جی اَنطاكیه شهر بومَئن. اوشون برارونِ تعلیم دئن که: «اگه طبق موسی پیغمبر سنت ختنه نبین، منین نجات پیدا کونین.»

² بازین پولُس و بَرنابا خیلی اوشؤنِ أمره بحث و مخالفت بودَن، قرار بر ایی بوبؤ که او دو نفر چند ته ایماندارؤنِ أمره، اورشلیم شهر بوشؤئن و ایی مسئله‌ رسولؤن و شیخون أمره در میؤن بنِئن.

³ پس كلیسا ایشؤنه راهی بوده؛ وختی که اوشؤن، فینیقیه و سامره جی رده بوده بوئن، اینه باره که چوطو غیریهودی أن ایمؤن بأردن، گب زئن و همته برارؤنِ ایی خبر أمره خیلی خوشحالَ گودَن.

⁴ وختی اوشؤن اورشلیمِ برسئن، كلیسا و رسولؤن و شیخون ایشؤنای استقبال بودن. پولُس و بَرنابا هرچی که خدا بواسطه اوشؤن انجام بده‌بو، ایشؤنِ تعریف بودَن.

⁵ ولی بعضی از فَریسی أنِ فرقه عالمون که ایمؤن بأرده بون، ویریسَئن، بوتَن: «واجبِ که غیر یهودی أن ختنه بوبوئن و ایشونِ دستور بدین که موسی شریعتِ بدارن.»

⁶ بازین رسولؤن و شیخون جومَه بوئن تا ایی مسئله رسیدگی بکونن.

⁷ بعدِ خیلی بحث گودن، سرآخر پطرس ویریسَه و ایشؤنه بوته: «ای برأرؤن، شمه خودتون دوئنین که اولی روزؤن، خدا مَه شیمه میئنای انتخاب بوده تا غیریهودی أن می زبؤنه أمره انجیل پیغؤم بشتوئَن و ایمؤن بأرَن.

⁸ و خدایی که دیلای خبر دئنه، ایشونه گوایی بدَه و روح القدسِ ایشونِ ببخشه، هوطو که اَمره ببخشه بوبو.

⁹ خدا امه میئن و اوشؤن میئن هیچ فرقی نَنه، بلكه ایمؤن وسه، اوشونه دیلؤنِ پکا گوده.

¹⁰ پس الؤن چرِء خدا امتحون کوئنین و یکته پیشکابول شاگردونِ گردن نِئنین که نه اَمه تینسیم اونه هکشیم، نه اَمه پئرؤن؟

¹¹ ولی اَمه ایمؤن دئنیم که عیسی خداوند فیضِ أمره ایسّه که نجات پیدا گودیم، هوطو که اوشونم هیتَن.»

¹² بازین همته اوشونی که اوره جومَه بوبوئن، تام بزئن و پولُس و بَرنابا گبِ گوش بدئن. اوشؤن نیشونه و معجزاتی که خدا بواسطه اوشون، غیریهودی أنِ میئن انجوم بدأ بو، تعریف گودَن.

¹³ وختی ایشؤنِ گب تمنه بو، یعقوب بوته: «ای برأرؤن، می گبون گوش بدین!

¹⁴ شمعون بوته که چوطو خدا اولین بار غیریهودی أنِ لطف بوده، اوشون میئنای مردمی خوشِ ایسم به انتخاب بوده.

¹⁵ ایی درست هونی ایسّه که عاموسِ پیغمبرِ کیتابِ میئن بنویشته بوبؤ:

¹⁶ «”بعد ایی، وگردنم و داوودِ خیمه‌ دومرته چاکوئنم؛ اونِ ویرونه أن هنده آبادَ کوئنم، و اونه خو اولِ شکل مورسؤن چاکوئنم،

¹⁷ تا اوشونی که آدمؤن نسلَ جی باقی بومونَسن و تمؤم غیریهودی أن که می ایسم خوشؤنِ سر دَئنن، خداوند دومبال بگردن. خداوند گونه خداوندی که:

¹⁸ ایی چی أنِ از قدیم معلوم بوده.“

¹⁹ «پس می حکم اینه، اوشؤنی که غیر یهودی أن جی خدا سو وگردنن، زحمت نَدیم.

²⁰ ولی بأء یکته نؤمه میئن ایشؤنای بخوأیم بُتؤنِ به قربونی بوبو غذاأن، زنا، خفه بوبؤ حیوؤنؤنِ گوشت و خونَ جی دوری بکونن.

²¹ چون موسی از قدیم، هرته شهرِ میئن کسونیِ داشت که اونه به موعظه بکونن، هوطو که هرته مقدس شنبه دیرون اونه بنویشته أنِ یهودِ عبادتگاه أنِ میئن خوبِئنن.»

شورا نؤمه ایمؤندارؤنِ غیریهودی به

²² پس رسولؤن و شیخؤن تموم كلیسا أمره تصمیم بیتَن خوشؤن میئنای مرداکؤنی انتخاب بکونَن و اوشونِ پولُس و بَرنابا أمره اَنطاكیه شهر سرادِئن. پس یهودای معروف به بَرسابا و سیلاسِ که برارونِ میئن رهبر بو، انتخاب بودَن.

²³ بازین یکته نؤمه ایشؤنِ به سرا دئن، اونه میئن بنویشته بوبؤبو که: أمه رسولؤن و شیخونَ جی، که شیمه برأرؤن ایسّیم، به برارونِ غیریهودی که اَنطاكیه، سوریه و كیلیكیه میئن ایساین، سلام به شمه!

²⁴ اوراجی که بشتؤسیم كسؤنی اَمه میئن، بدون اییکه امه جَی دستوری بدارن، بومَئن و شمره خوشؤن گبؤنِ أمره ناراحتَ گودَن، و باعث بوبوئن که شیمه فیکر پریشونَ بی،

²⁵ هینه واسه امه یکدل ایطو صلاح بدیم که مرداکونی انتخاب بكونیم و اوشونه اَمه عزیزؤنِ أمره، بَرنابا و پولُس، شیمه ورجه سرا دیم،

²⁶ ایی مرداکونِ أمره که أمه خداوند عیسی مسیح ایسم وسه، خوشونِ جؤنِ خوشؤنِ دستِ میئن بنائن.

²⁷ پس یهودا و سیلاسِ شیمه ورجه سرا دایم تا خوشونِ گبون أمره، شمره ایی کارؤنَ جَی واخوبَ کونن.

²⁸ روح‌القدس و اَمه، ایطو صلاح بدیم که شیمه کول سر هیچ باری ننیم، بغیر ایشون که واجیب ایسّن

²⁹ بُتؤن به قربونی بوبو غذا، خون، خفه بوبؤ حیوؤنؤن گوشت و زنا جی دوری بکونین. اگه ایشؤنه جی دوری بکونین، کارِ خوبی بودین. سلامت ببین.»

³⁰ پس ایشؤن راه دکتن، اَنطاكیه شهر بوشؤئن و اوره كلیسا آدمؤنِ جومَه گودَن و نؤمه ‌ برسونِئن.

³¹ وختی اوشؤن نؤمه ‌ بوخؤندَن، او پیغومَ جی که باعث دیلگرمی بو، خوشحالَ بوئن.

³² یهودا و سیلاسم که پیغمبر بوئن، خیلی گبونِ أمره، برارونِ تشویق بودَن و قوت بدَئن.

³³ یهودا و سیلاس چنوخت اوره بیسَئن، و بازین برارون، ایشونِ بسلامت سرا دئن تا خوشؤنِ سراداکسونِ ورجه وگردن.

³⁴ اما پولس و بَرنابا انطاکیه میئن بیسَئن

³⁵ اوشون خیلی دیگر ایماندارؤن أمره، خداوند کلامِ تعلیم دَئن و اعلؤم گودَن.

پولُس و بَرنابا میئن اختلاف دکئنه

³⁶ چندوخت بعد پولُس، بَرنابا بوته: «او شهرؤنی که خداوندِ كلامِ اوشونِ میئن اعلؤم بودیم، وگردیم و برارونِ بَینیم تا بودوئنیم اوشون وضع و اوضاع چطو ایسه.»

³⁷ بَرنابا خوأست که یوحنای معروف به مَرْقُسم ایشؤنه أمره بأی،

³⁸ ولی پولُس صلاح نودونسه كسی که ایشؤنِ پامفیلیه میئن تنها بَنه‌ و خو همکاریِ ادامه نده‌، خو أمره ببوری.

³⁹ بَرنابا و پولُس میئن اختلاف اَنی زیادَ بو که همدیگرای سیوا بوبوئن. بَرنابا مَرْقُسِ ویته و دریا راهَ جی قبرس بوشو؛

⁴⁰ ولی پولُس، سیلاسِ ویته و برارون اونه، خداوندِ فیضِ أمره راهی بودَن.

⁴¹ پولُس وختی که سوریه و كیلیكیه راه جی ردَّ بودبؤ، كلیساأنِ قوت دَئ.