اعمالٚ رسولأن 12 - کتاب مقدس به زبان گیلکی - گویش شرقییعقوبِ کوشتن 1 هوموقع، هیرودیس پادشاه بینا بوده بعضی از کلیسا آدمؤنِ اذیت و آزار رسونِئن. 2 هیرودیس دستور بده، یعقوب، یوحنا برأرِ شمشیر أمره بکوشتَن. 3 وختی بدِه که ایی قضیه یهودی أنِ خوش بومَه، پطرسم دستگیرَ گوده. ایی اتفاق عید فطیر موقع میئن دکته. 4 هیرودیس، بعد پطرسِ دستیگرَ گودن، اونه زندؤن تؤوده و چهارته دسته‌ء چار نفری سرباز اونه نگهبؤنی بِه بَنه. او خوأس که بعدِ عید پِسَخ، پطرسَ مردوم جلو محاكمه بکونی. 5 پس پطرسِ زندؤن میئن بداشتَن، ولی كلیسا، یسره پطرس وسه خدا درگاه دعا گود. 6 یه شؤ قبل ایی که هیرودیس خواست پطرسِ محاکمه بکونی، پطرس دوته زنجیر أمره دوَسه هنّه بو و دوته سرباز میئن خوته بو و نیگهبونؤنَم زندونِ در جلو کشیک دَئدبون. 7 یدفاری خداوندِ یکته فرشته ظاهیرَ بو و یکته نور زندؤن میئن فوتؤسه. او فرشته پطرسِ تکِ بزه و اونه بیدارَ گوده، بوته: «زود ویریس!» هو لحظه زنجیرؤن، پطرس دستؤنای بازَ بو و جیر بکته. 8 فرشته اونه بوته: «تی كمر دَوَد و تی چاروغ دكون.» پطرسم هی کار بوده. بازین فرشته اونه بوته: «تی عبا تی دور فیبیچ و می دومبالسر بیه.» 9 پطرس اونه دومبالسر زندونای بیرون بوشو. او باور نوده که اوچی که فرشته انجوم دَئدره، واقعیِ، بلكه فکر گود رویا دِئدره. 10 اوشؤن اول و دوم نیگهبونؤنَ جی بوگذشتن و آهنی دروازه برسئن که شهر طرف بازَ بو. دروازه خوشِ به ایشؤنِ جلو بازَ بؤ. اوشؤن بیرون بوشؤئن و هوطو که راه میئن شوئدبون، یدفاری فرشته غیبَ بو. 11 بازین پطرس به خودش بومَه و بوته: «الؤن دِه حتَم دئنم که خداوند خو فرشته سرادا و مَه هیرودیس چیکالَ جی و او تموم اذیت و آزاری که یهود مردوم اونه ریفاه ایسابون تا می سر بای، نجات بده.» 12 وختی پطرس اینه بفهمسه، بوشو مریم خونه که یوحنا معروف به مَرْقُس مئر بو. اوره خیلی أن جومَه بؤبؤئن و دعا كأدبون. 13 وختی پطرس خونه دَرِه بکوته، یکته کلفت، که اینه ایسم رودا بو، بومَه تا دَره بازَ کونی. 14 وختی او کلفت، پطرس صدا بشناختِ، ذوقَ جی، بدون اونکه دَرِ بازَ کونی، تاتأدی بوشو دیرون و خبر بده: «پطرس دَرِ پشت ایسا!» 15 اوشون او کلفتِ بوتَن: «تورَ بوی» اما وختی اونه اصرار بدِئن، بوتَن: «لابد اونه فرشته ایسّه.» 16 ولی، پطرس یسره در کوتنِئدبو. سرآخر، وختی درِ وأگودَن، اونه دِئن أمره ماتَ بوئن. 17 پطرس خو دست أمره ایشونِ اشاره بزه که تأم بزنن و اوشونِ تعریف بوده که چوطو خداوند اونه زندؤنای بیرون بأرده. و او بوته: «یعقوب و بقیه برأرؤنم، ایی جریونَ جی واخوبَ کونین.» بازین بوشو یکته جای دیگه. 18 وختی صوباین بومَه، سربازؤن میئن بلوا بوبؤ، چون نودونسَن پطروسِ سر چی بومَه. 19 هیرودیس دستور بده همه جا پطرس دومبال بگردن؛ و چونکه اونه نیاتن، نیگهبونونی که پطرس پاستن، بازخواست بوده و اوشونه کوشتن دستور هده. بازین پطرس یهودیه ولایت جی بوشو قیصریه شهر و چند وختی اوره بِیسه. هیرودیس موردَن 20 هیرودیس صور و صیدونِ شهرؤنِ مردومِ سر غیظ بوده بو. هینه وَسه او دوته شهرِ مردوم، همدیگر أمره اونه ورجه بوشوئن و ایجازه بخواستن تا هیرودیسِ بینَن. اوشؤن بْلاستوس، پادشاه خدمتکارِ راضی بودَن تا پادشاه أمره آشتی بکونن، چون اوشونِ غذا و مایحتاج، هیرودیس مملکتای تهیه بو. 21 او روزی که قرار بنابوئن، هیرودیس خو پادشاهی عبا دوده، خو تخت سر بنیشته و جماعت بِه سخنرانی بوده. 22 مردم داد زِئن: «ایی یکته از خدایؤنِ صدا ایسّه، نه یکته آدم صدا!» 23 هو لحظه یکته از خداوند فرشته، هیرودیسِ بزه، اینه وسه که خدا جلال نده بو. بازین كلمؤن اونه تنِ بوخوردَن و بمورده. 24 اما خدا كلام بیشتروبیشتر پیش شوئ و پخشَ بو. 25 بَرنابا و شائول خوشؤنِ مأموریتِ تمنَه گودَن، اورشلیمای وگرسَن و یوحنایی که معروف به مَرْقُس بو خوشؤنِ أمره بأردَن. |
@ 2024 Korpu Company