اعمالٚ رسولأن 10 - کتاب مقدس به زبان گیلکی - گویش شرقی

پطرس و کُرنِلیوس

¹ قیصریه شهر میئن یکته رومی افسر ایسا بو، که کُرنِلیوس ایسم داشت، او یکته از رومی گردان فرمانده‌أن، معروف به ’ایتالیایی گردان‘ بو.

² كُرنِلیوس یکته دیندار مرداک بو، او و اونه خانواده همته‌ خدا ترس بوئن. كُرنِلیوس دست و دیلبازی أمره فقیرونِ صدقه هده و همیشه خدا حضور دیرون دعا گود.

³ یکته روز دوروبرِ ساعت سه بعدظهر، رویا میئن واضح بده که یکته از خداوند فرشته اونه ورجه بومَه و بوته: «كُرنِلیوس!»

⁴ كُرنِلیوس ترس أمره اونه چال بزه و جواب بده: «چیسه، آقا!» فرشته اونه بوته: «تی دعاأن و صدقه‌أن یکته یادگاری هدیه مورسون خدا ورجه برسه.

⁵ الؤن چندنفرِ یافا شهر سرادی تا شمعون، شناس به پطرسِ اِره بأرن.

⁶ او یکته دباغ ورجه که شمعون ایسم دئنه مهمون ایسه، که اونه خونه دریا ورجه هنّه.»

⁷ وختی او فرشته‌ای که اونه أمره گب زئده بو اونه ورجای بوشو، كُرنِلیوس دو ته خو خدمتکارون و یکته از خوشه وفادار سربازِ، خوشه سربازونِ میئنای، که اونه خدمت کائدبون دوخُنده،

⁸ كُرنِلیوس تمومِ قضیه ایشؤنِ بوته و اوشونِ یافا شهر سرا دا.

⁹ فردایی، ظهر وخت، وختی راه میئن ایسابؤن و شهرِ نزدیكَ بودبوئن، پطرس، خونه پشت بؤم بوشو تا دعا بکونی.

¹⁰ پطرس وشته بوبو و خوأس یچی بوخوری. ولی وختی غذا چکادبؤئن، پتروس خَلسه میئن بوشؤ.

¹¹ هو وخت میئن بدِه که آسمؤنون باز بؤ و یه چی پیله سفره مورسون که چار گوشای آئوزین ایسّه، زمینِ طرف جیر اَمَئدره

¹² و همه جور چارپاأن و خزنده‌أن و پرنده‌أن جی پوراگوده ایسّه.

¹³ هو وخت یکته صدا اونه برسه که: «پطرس، ویریس، سیرَ بین و بوخور!»

¹⁴ پطرس بوته: «هرگی نبنه خداوندا، چون مو هرگی حرام یا نجس چیز نوخوردم.»

¹⁵ دومی بار صدا بومَه که «اوچی که خدا پکا گوده، تو نجس نودوئن!»

¹⁶ ایی رویا سُه بار تکرار بوبؤ و بازین سفره درجا آسمؤن سو، جؤر ببورده بوبؤ.

¹⁷ هو حال میئن که پطرس ماتَ بو او رویا معنیِ فکر کادبؤ، كُرنِلیوسِ سراداکؤن، شمعونِ خونه‌ دومبال بگشتن و اونه خونه دَر جلو برسئن.

¹⁸ اوشؤن بلند صدا أمره بپورسِئن: «شمعون معروف به پطرس اِره مهمون ایسه؟»

¹⁹ هوطو که پطرس او رویا که بده فكر كادبو، خدا روح اونه بوته: «بَین، سُه نفر تی دومبال گردنن.

²⁰ ویریس و جیر بشو و شك نكون که اوشونِ أمره بشی، چونکه مو اوشونه سرادَئم.»

²¹ پطرس جیر بوشو و اوشونه بوته: «مو هونَم که اونه دومبال گردنین. شمه چی وَسه بومَاین؟»

²² اوشون بوتَن: «رومی فرمونده كُرنِلیوس اَمره سرا دا. او یکته خداترس و درستکار مرداک ایسّه و یهودی أن همته اونه جی خورومی تعریف کوئنن. او یکته مقدس فرشته جی دستور هیته که أمه تی دومبال سرادی و تَه خو خونه دعوت بکونی، تی گبؤنِ بشتؤئی.»

²³ پس پطرس اوشونه ببورده خونه تا اونه مهمؤن بوبؤئن. پطرس فردایی ویریسَه و اوشونه أمره راه دکته. یسری برأرؤن که یافا شهرِ شی بوئن هم اونه أمره بوشوئن.

²⁴ فردایی برسئن قیصریه‌ شهرِ. كُرنِلیوس که خوشه فامیلؤن و ریفقؤنِ نزدیکم جومَه گوده بو اوشؤن أَمَئن ریفا ایسابو تا بَئن.

²⁵ وختی پطرس بومَه خونه، كُرنِلیوس اونه پیشواز بوشو و اونه پِا جیر بکته اونه پرستش بوده.

²⁶ اما پطرس اونه ویریسؤنه و بوته: «ویریس؛ منم یکته آدمم.»

²⁷ بازین هوطو که اونه أمره گب زئدبو، خونه دیرون بوشؤ و بده که خیلی آدم اوره جومَه بوئن.

²⁸ پطرس اوشونه بوته: «شمه خودتون دؤنین که یهودی أن بِه شرأن جایز نیه که دیگر قومون أمره دمخور بوبوئن یا اوشونِ خونه بوشوئن. اما خدا مه نیشون بده که هیشكسِ نجس یا ناپاک نوگوئم.

²⁹ پس وختی می دومبال سراداین، بی چون و چرا بومئم. الؤن بوگوین، چی وَسه می دومبال سراداین؟»

³⁰ كُرنِلیوس جواب بده: «چهار روز پیش هی وخت، دوروبرِ ساعت سه بعدظهر، می خونه میئن دعا کائدبوم که ناخبر یکته مردکه که نورؤنی رخت دوده بو می جلو بِیسَه

³¹ و بوته: ”كُرنِلیوس، تی دعا قبول بوبُو و تی صدقه‌أن خدا حضور میئن به یاد بومَه.

³² الون چندنفرِ یافا شهر سرادی تا شمعونِ معروف به پطرسِ، اِره بأرَن. او شمعونِ دباغِ ورجه که اونه خونه دریا ورجه ایسّه مهمونه.“

³³ پس درجا تی دومبال سرادئم و تنم لطف بودی و بمای. الؤن امه همه‌ خدا حضور میئن حاضریم تا هرچی که خدا تَه بفرمأسّه، بشتوئیم.»

³⁴ بازین پطرس ایطو، بینا به گب زئن بوده: «الؤن بفهمسم که راست راستِ خدا مردم میئن هیچ فرقی ننِئنه؛

³⁵ بلكه هرته قومای، هر کس که خدا جی بترسی و اوچی که درست ایسه انجوم بدی، خدا اونه قبول کوئنه.

³⁶ خدا طبقِ خو کلام که یهودِ مردومِ بِه سرادا، صلح و سلامتی و خوروم خبرِ بواسطه عیسی مسیح که همه نفرِ خداوند ایسّه اعلام بوده.

³⁷ شمه خودتون همته دؤنین که ایی جریون چوطو بعدِ او تعمیدی که یحیی اونه بِه موعظه گود، جلیل ولایت میئن شروع بوبؤ و سراسر یهودیه ولایت میئن پخشَ بؤ،

³⁸ و خدا چوطو عیسای ناصریِ روح‌القدس و قوت أمره مسح بوده، هوطو که همه جا گرس و خوروم كارؤن گود و همه اوشؤنی که ابلیس ظلم جیر ایسابوئن شفا دا، اینه وسه که خدا اونه أمره بو.

³⁹ «و امه تموم او کارؤنِ گواهون ایسیم که او یهودِ ولایت و اورشلیم شهرِ میئن انجام بدا. اوشؤن اونه دار سر هکشِئن، بکوشتن.

⁴⁰ اما خدا اونه سومی روز دیرون زنده بوده و آشكار گوده،

⁴¹ اما نه همّته مردومِ بِه، بلكه فقط أمه بِه که خدا خودوش انتخاب بودِه بو تا گواهون ببیم، اَمه که بعد اونه زنده بوئن مُرده‌أنِ جی، اونه أمره بوخوردیم و وودوشتیم.

⁴² او اَمره دستور بده تا ایی حقیقت مردوم به اعلوم بکونیم و گوایی بدیم که خدا اونه معیّن بوده تا زنده‌أن و مُرده‌أن داور ببی.

⁴³ همته پیغمبرؤن عیسی باره گوایی دِئنن که هر که اونه ایمؤن بأره، به واسطه اونه ایسم، اونه گوناأن ببخشه بنه.»

⁴⁴ حله پطرس گب زِئدبو که روح‌القدس اوشؤن همّته سر که ایی پیغؤم ایشتؤسِدبؤن قرار بیته.

⁴⁵ او ایماندارؤنی که ختنه گودنِ رسمِ داشتن یعنی اوشؤنی که اصالتاً یهودی بوئن و پطرس أمره بومَه بوئن، وختی بدِئن روح‌القدس حتی غیر یهودی أنِ به هم بومَه، حیرونَ بوئن.

⁴⁶ چون بشتؤسَن که ایشون به زبؤنای دیگه گب زِئدرن و خدا جلال دئدرن. هووخت پطرس بوته:

⁴⁷ «الؤن که ایشون، روح‌القدسِ عینِ اَمه مورسون هَیتَن، كی تینه اوشونه جلوئه بگیری که آؤ میئن غسل تعمید هنگیرن؟»

⁴⁸ پس دستور بده تا ایشؤنِ، به ایسم عیسی مسیح تعمید بدِئن. هووخت پطرسای بخواستَن چند روز ایشؤنِ أمره بِیسی.