اعمالٚ رسولأن 1 - کتاب مقدس به زبان گیلکی - گویش شرقی

عيسی شوئن آسمؤنِ سو

¹ ای تِئوفیلوس، مو می اولی کیتابِ، همه او کارؤنِ بنویشتم که عیسی اوشؤنِ انجؤم دَئن و تعلیم دَئنِ بینا بوده

² تا او روز که بواسطه روح‌القدس خو رسولؤنِ که انتخاب بوده بو دستورؤنی هدأ و بازین آسمون سو جؤر ببورده بوبؤ.

³ عیسی بعد اونکه عذاب بکشِه، خوشِ رسولؤن بِه آشكارَ گوده و خیلی چیزؤن أمره ثابت بودِه که زنده بوبؤ. عیسی چهل روز اوشونِ بِه آشکارَ بوء و خدا پادشاهی باره رسولؤنِ أمره گب زی.

⁴ یه بار که عیسی رسولؤن أمره ایسابو اوشونِ دستور بدا که: «اورشلیم شهرای نشن، بلكه او وعده ریفا که آسمونی پئر بدابو بیسن، و بوته: هوطو که می جی بشتؤسین؛

⁵ تعمید دهنده یحیی آؤ أمره غسل تعمید داء، ولی چند روز بعد شمه روح‌القدسِ أمره تعمید گینین.»

⁶ وختی که رسولؤن جومَه بؤبوئن، عیسی جی بپورسِئن: «خداوندا، ایی زمؤنِ میئنِ که خوأنی پادشاهیِ به اسرائیل وگاردونی؟»

⁷ عیسی اوشونِ جواب بده: «شیمه بِه نومَه که آسمونی پِئر او وختونی و فصلون که خوشِ قدرت أمره تعیین بودَه، بودونین؛

⁸ ولی وختی که روح‌القدس شیمه به نازل ببی، قوت گینین، اورشلیم شهرمیئن و همه یهودیه‌ ولایت و سامره و دونیا دور دکته ترین جاأن میئن می گواهون بنین.»

⁹ عیسی ایی گبؤنِ بزه پس، هوطو که رسولؤن، نگاه کادبؤن، آسمون سو جؤر ببورده بوبؤ و یکته ابر عیسی ویته، اوشونه چیشمونِ جلو غیبه گوده.

¹⁰ هوتو که عیسی شوئدبو و رسولؤن آسمونِ چال بزه بون، یدفاری دوته مرداک که سفید عبا دوده بوئن ایشؤنِ ورجه بیسَئن

¹¹ و بوتَن: «ای جلیلی مرداکؤن، چرِء أره ایساین و آسمؤن چال بزین؟ هی عیسی که شیمه میئنای آسمؤن جور ببورده بوبؤ، هیطوری که بدِیئن آسمؤن بوشو، هنده وگردنه.»

مَتّیاس عوض یهودا انتخاب بنه

¹² بازین رسولؤن زیتونِ كوه جی، شهر اورشلیم وگرسن. او كوه یکته مقدس شنبه روز قد، یعنی حدود یک کیلومتر اورشلیمَ جی فاصله داشت که مقدس شنبه روز دیرون فقط هی قد ایجازه داشتن.

¹³ وختی اورشلیم شهر برسِئن، او تَلارخونه جور بوشؤئن که اوره ایشونِ اقامتگاه بو. اوشؤنی که اوره ایسا بوئن: پطرس و یوحنا، یعقوب و آندریاس، فیلپُس و توما، بَرتولْما و مَتّی، یعقوب حَلْفا ریکه و شمعون وطن پرست و یهودا یعقوب ریکه بوئن.

¹⁴ ایشون همته، زنأكؤن أمره و مریم عیسی مَئرَ و اونه برأرؤن أمره، یكدل تمؤم خوشؤنِ وختِ دعا به نَئن.

¹⁵ یکته از او روزؤن پطرس، برارونِ میئن که همته حدود صد و بیست نفر بوئن، سرپا بِیسه

¹⁶ و بوته: «ای برأرؤن، مقدس بنویشته أن پیشگویی باء حقیقت پیدا گوده بی. او بنویشته أنِ میئن خیلی وخت پیش روح‌القدس، داوود زبون أمره یهودا باره پیشگویی بودِه بو. او کسی باره که عیسی دستگیر کننده أن راهنما بو.

¹⁷ او یکته از امه به حساب اَمئه و ایی خدمت میئن سهم داشت.»

¹⁸ یهودا او مزدِ، که خو شرارتِ واسه هیته بو یه تیکه زمین بیه و اؤره خو دیمِ أمره گلِ سر بکته و واترکسه و اونه رک و روده بیرون بکالسه.

¹⁹ تموم اوشونی که اورشلیم میئن ایسابوئن، همته ایی ایتفاقَ جی واخوبَ بوئن و خوشؤنِ زبؤن میئن او محل ’حَقِلْ دَما‘، یعنی زمین خون ایسم بنَئن.

²⁰ « چونکه مزامیر كیتاب میئن بنویشته بوبُو: «”اونِ خونه هوطو ویلَه گوده بنه و دِه هیشكس اونه دیرون نیسَنه،“ و: «”اونِ مقامِ و منصبِ یه نفر ده هگینه.“

²¹ پس بأ ینفر از او مرداکونی که تموم او زمونی که عیسای خداوند، امه میئن شوئن و اَمَئنِ گود، أمه جمع میئن ایسابو

²² یعنی از وقتی که یحیی تعمید بده تا او روز که عیسی از اَمه میئن به آسمون، جؤر ببورده بوبؤ، یکنفر از ای مرداکون، باء أمه أمره عیسی زنده بوئنِ شاهید ببی.»

²³ اوشون دونفرِ جلو بئردن: یوسفِ که بَرسابا گوتن و اونه یوسوتوسَم دوخوندَن، و مَتّیاس.

²⁴ بازین اوشؤن ایطوری دعا بودَن که: «خداوندا، تو همکسِ دیلونَ جی خبر دَئنی. تو خودت، أمره نیشون بدی که کویکته از ایی دو نفر انتخاب بودی

²⁵ تا ایی خدمت رسالتِ هگیری، خدمتی که یهودا اونه پس بزه و او جایی بوشو که هوره شی بو.»

²⁶ بازین قورعه تؤدَئن و مَتّیاس ایسم بیرون بومَه. هیطو بوبو که او یازده‌ته رسول گروهِ میئن اضافه بوبؤ.