سوم یوحنا 1 - کتاب مقدس به زبان گیلکی - گویش شرقی

¹ شیخَ جی، به عزیز گایوس که مو اونه ’حقیقت‘ میئن دوست دَئنم.

² ای عزیز، می دعا ایی ایسّه که همه چی شیمه به خوب پیش بشی و سلامت ببین و هیطورم تی جون، سلامتی میئن بمونه.

³ چون خیلی ذوق بودم، هو وقت که برارون بومان و گواهی بدن که تو حقیقت میئن زندگی کوئنی، راست راستِ که حقیقت میئن زندگی کوئنی.

⁴ هیچی مَه ایناجی بیشتر شادَ نوکوئنه که بشتوئَم، می زاکؤن ’حقیقت‘ میئن زندگی کوئنن.

⁵ ای عزیز، تو همته تی کارون میئن، برارؤن به، تی امونت داری نیشون دئنی، بخصوص ایشونه به که تی ورجه غریبه ایسّن.

⁶ ایشونم کلیسا میئن تی محبتِ به گوایی بدَئن؛ پس خوروم کار کوئنی، اگه ایشونِ هوطو که در شائن خدا ببی، سفر به راهی بوکونی.

⁷ چونکه ایشون او ایسمِ وسه سفر بودَن و غیر یهودی أنَ جی هیچ کمکی هینتَن.

⁸ پس أمه باء ایجور آدمونِ مورسونَ کمک بکوئنیم تا بتوئنیم ایشونِ أمرهَ حقیقتِ واسه همکار ببیم.

⁹ مو یه چی کلیسا به بنویشتم، ولی دیوتْرِفیس که دوست دئنه خوشه اول بنئه، امه اقتدار اهمیت ندَه.

¹⁰ پس اگه مو بائم، کارونی که او انجوم دئدره رسیدگی کوئنم، چرِا که غرضِ أمره، امی ضد گب زئنه و به ای هم قانع نبنه، امی برارونم قبول نکوئنه، و برارونی هم که خوائنن اوشون قبول بکونن، جلوی گینه و کلیسا جی بیرون تودئنه.

¹¹ ای عزیز، بدی تی سر مشخ نکن، بلکه خوبی جی سر مشخ بگیر؛ اون که خورم کار کوئنه خدا جی ایسه، اون که بَدِ کار کوئنه خدا نَدهِ.

¹² همته دیمیتریوس باره خورَمِ گوایی دئنن حتی خود حقیقت. اَمه هم ایطو گوایی دئنیم و دوئنی که أمه گوایی راست ایسه.

سرآخر

¹³ خیلی چیزون داشتم ته به بنویسم، اما نخوانم مرکب و قلم أمره ببی.

¹⁴ امید دائنم خیلی زود ته بَینم و رو در رو گب بزنیم.

¹⁵ سلامت ببی! رفیقون ته به سلام رسونبِئنن. تک تک رفیقونِ به ایسم سلام برسون.