دوم تیموتائوس 4 - کتاب مقدس به زبان گیلکی - گویش شرقی

خدا کلؤمه اعلؤم گودن

¹ مو خدا و مسیح عیسی جلو، کی زینده ئان و بمرده ئان سر داوری کؤنه، و اون أمأن و پادشاهی وأسی، تأ سفارش کؤنم کی

² خدا کلؤمه اعلؤم بوکون و وقت و بی وقت آماده ببأش، زیاد صبر و کامیل تعلیم همأ، ایصلاح و تشر و تشویق بوکون.

³ چون زمؤنی رسنه کی مردوم درست تعلیمه تاب نأبئنن، بلکی معلیمؤنئه خوشؤن دؤر و ور جیمأکؤنن تا او چئه کی ایشؤن گوش خأنه بشتؤه و ایشؤن هوا و هوسؤن همرأ رچه، اوشؤن أجی بشتؤن؛

⁴ و اوشؤن حقیقته گوش گودن أجی رو وگردؤنئنن و داستؤنؤن سمت گومراه بنن.

⁵ ولی تو همه چی مئن واخوب ببأش؛ عذابؤنه تاب بأر؛ انجیل اعلؤم گودن کاره أنجؤم بدی و تی خدمته تمؤم و کمال به آخر برسؤن.

⁶ چونکی می خون، هی ایسه نی پیشکش شراب مورسؤن کألسه دره و د او زمت برسئه کی خأ ای دونیا یأجی بوشوم.

⁷ مو خؤرم جنگ مئن بجنگسم، می دؤره تمنأگودم و می ایمؤنه بدأشتم.

⁸ این پسی او صالحی تاج مئبه حاضیرأبؤ، او تاج کی خداوند، او عادیل داور، او روز مئن خأ مأ هدئه - نه هچی مأ، بلکه همهٔ اوشؤنئه که اون ظهور شؤقه دأشتن.

آخرته سفارشؤن

⁹ تقلا بوکون هرچی زودتر می ورجه بأی.

¹⁰ چونکی دیماس، ای دونیا دوست دأشتن وأسی، مأ دست ویته و تسالونیکی شهر بوشؤ. کریسکیس بوشؤ غلاطیه منطقه و تیتوس نی دلماتیه منطقه بوشؤ دأنه.

¹¹ هچی لوقا می همأ ایسأ. مرقسه ورأگیر تی همرأ بأر، چونکه او می خدمت ئبه خیلی بکار أنه.

¹² تیخیکوسه أفسس شهر سرأدأم.

¹³ تی أمأن زمت، می قبا کی تروآس مئن کارپوس ور جا بنأم، تی همأ بأر. کیتابؤن و علی الخصوص طومارؤنم تی همأ بأر.

¹⁴ میسگر اسکندر، مأ خیلی بدی بوده. خداوند اون کارؤن سزا دئنه.

¹⁵ تنم اون أجی دوری بوکون، چونکه أمئه پیغؤم همرأ سخت مخالف بو.

¹⁶ می أولته دفاع مئن، هیکس می پوشت در نمأ، بلکه همه ته مأ دست ویتن. نبون کی ای، اوشؤن حیساب بنأ ببون.

¹⁷ ولی خداوند می همرأ ایسأبو و مأ قوت هدأ تا او پیغؤم، بواسیطهٔ مو تمؤم و کمال اعلؤم ببون و همه ته غیریهودئن اونه بشتؤن. ایطؤری شیر دهن أجی دربوشؤم.

¹⁸ خداوند مأ هرته بد کار أجی رهایی دئنه و مأ سلامتی همرأ خوشه آسمؤنی پادشاهی ور أبئنه. جلال تا ابد و تا ابد اون شی ببون. آمین!

آخرته سلامؤن

¹⁹ پریسکیلا و آکیلا و اونیسیفوروس خؤنوادهَ سلام برسؤن.

²⁰ اراستوس، قرنتس شهر مئن بیسأ، و مو تروفیموسه کی ناخوش بو، میلیتوس شهر مئن بنأم.

²¹ تقلا بوکون تا قبل زمسسؤن فأرسی ائره. یوبولوس، پودنس، لینوس، کلودیا و همه ته برأرؤن تئه سلام دأنن.

²² خداوند تی روح همرأ ببون. خدا فیض شیمئه همرأ ببون.