دوم تیموتائوس 3 - کتاب مقدس به زبان گیلکی - گویش شرقی

آخرته روزؤن

¹ أما اینه بودؤن که آخرته روزؤن مئن، سخت روزیگاری در پیش دره.

² چونکی مردوم خودپرست، پولپرست، مغرور، متکبر، فحاش، نافرمؤنبر نسبت به خوشؤن پئر و مأر، ناشکر، ناپاک،

³ بی‌عاطفه، کینه ای، ایفترازن، بی بند و بار، وحشی، خوبی دوشمن،

⁴ خیانتکار، بی ملاحظه و غرور أجی بادبوده بنن، که عیاشئه خدا یأجی ویشته دوست دأنن.

⁵ ظاهیر مئن دیندارن، ولی اون قدرته حشا کؤنن. ایطؤچی کسؤن أجی دور بیس.

⁶ چونکی ایشؤن مئن کسؤنی ایسأن کی مردوم خؤنه مئن راه پیداکؤنن، کم عقل زناکؤنه أسیر چاکؤنن، کی خوشؤن گوناهؤن بار جیر هچمسن و جورواجور هوسؤن، اوشؤنه هر طرف هأکشنه؛

⁷ ای زناکؤن همیشک تعلیم گینن، أما هرگی حقیقته شناخته مننئن.

⁸ هوجور کی ینیس و یمبریس موسی همأ بیناگودن مخالفت گودن، ای مرداکؤنم حقیقت همرأ مخالفت کؤنن، کی ایشؤن فیکرؤن خرابه و ایشؤن ایمؤن ردّه.

⁹ أما ایشؤن هیچ جا فأنرسنن، چون ایشؤن نادؤنی همه ته مردوم ئبه آشکارأبنه؛ هوطؤ که او دو نفر نادؤنیم آشکارأبؤ.

همه ته مقدس بنویشته ئان خدای ایلهؤم ایسن

¹⁰ أما تو می تعلیم و کردکار و هدف و ایمؤن و صبر و محبت و طاقته، نزدیک أجی شاهید بی،

¹¹ و او رنج و أذئت و آزارئه که انطاکیه، قونیه و لستره شهرؤن مئن می سر بمأ و او رنج و أذئت و آزارئه کی تاب بأردم، ولی خداوند مأ اوشؤن همه أجی نجات بدأ.

¹² راس راسه اوشؤن کی خأنن مسیح عیسی مئن دینداری همأ زیندگی بوکونن، عذاب کشنن؛

¹³ ولی شرور آدمؤن و قاببازؤن بدی مئن بدترأبنن؛ گول زئنن و گول خؤنن.

¹⁴ أما تو او چی مئن کی باموتی و اونه ایمؤن بأردی قایم بیس، چره کی دؤنی اوشؤنه کو کسؤن أجی یاد بیته دأنی،

¹⁵ و چوطؤ زأکی جی مقدس بنویشته ئانه دؤنسی، کی تینه تأ حیکمت هدئه و بواسیطه او ایمؤن کی مسیح عیسی مئن دره، نجاته برسه.

¹⁶ همه ته مقدس بنویشته ئان خدای ایلهؤمن، و تعلیم و تؤبیخ و ایصلاح و تربیت وأسی صالحی مئن پورفایده‌َن،

¹⁷ تا خدای مردأی کامل ببون و هرته خؤرم کار ئبه آماده.