دوم تسالونیکیان 3 - کتاب مقدس به زبان گیلکی - گویش شرقی

أمئبه دعا بوکونین

¹ سرأخره، أی برأرؤن، أمئبه دعا بوکونین تا خداوند کلؤم سریع پیش بوشون و اون احترؤمه بدأرن، هوجور کی شیمئه مئن ایطؤ بوبؤ،

² و تا شرور آدمؤن و گوناهکارؤن أجی رهاوابیم، چون همه ایمؤن ندأنن.

³ ولی خداوند وفاداره، او شمره پایدار کؤنه و او شریر جلؤ شمرأجی محافیظت کؤنه.

⁴ أمه خداوند مئن شمره ایطمینؤن دأنیم که او چئه کی شیمئبه حکم کؤنیم بجا أبئنین و أنجؤم دئنین.

⁵ خداوند شیمئه دیلؤنه خدا محبت و مسیح پایداری همرأ هیدایت بوکونه.

ایشتؤ، تنبل آدمؤن ئبه

⁶ أی برأرؤن، أمئه خداوند عیسی مسیح نؤم همأ شیمئبه حکم کؤنیم که هرته برأر أجی کی تنبلی کؤنه و عَین او چی که أمرأجی هیتین کردکار ندأنه، دوری بوکونین.

⁷ چونکی شمه خودتؤن دؤنین چوطؤ خأ أمرأجی سرمشق بگیرین. چون او زمت که أمه شیمئه همرأ ایسأبیم، تنبل نبیم

⁸ و هیکس نؤنه مفت نوخؤردیم، بلکی سختی و زحمت همأ شؤ و روز کار بودیم تا هیتته أز شمره سربار نبیم.

⁹ نه این وأسی کی ایطؤچی حق ندأنیم، بلکی تا أمرأجی یکته نمونه، سرمشق ئبه، شیمئبه بنیم.

¹⁰ چون حتی او زمت کی شیمئه همرأ ایسأبیم، اینه شیمئبه حکم بودیم که «أگه هرکی نخأنه کار بوکونه، نؤنم نوخؤره.»

¹¹ چون أمه ایشتؤنیم کی شیمئه مئنه بعضئن تنبلی کأدرن، هیچ کار نوکؤنن، بلکی فضولی کؤنن.

¹² ایسه خداوند عیسی مسیح نؤم مئن، ایجور کسؤنه حکم کؤنیم و اوشؤنه تشویق کؤنیم که آرؤم و قرار بگیرن و خوشؤن روزئه در بأرن.

¹³ ولی شمه أی برأرؤن، خوبی گودن أجی خسته نبین.

¹⁴ أگر یگ نفر او چیز أجی که أمه ای نؤمه مئن گونیم، ایطاعت نوکونه، اونه نوشؤن بوکونین و اون همأ شؤن أمأن نوکونین تا خجالت بکشه.

¹⁵ اما اونه دوشمن به حیساب نأرین، بلکی یکته برأر مورسؤن اونه ایشتؤ بزنین.

خیر دعا

¹⁶ ایسه، صلح و سلامتی خداوند، خودش هر زمت و هر وضع مئن شمره صلح و سلامتی هدئه. خداوند شمه همه ته همرأ ببون.

¹⁷ مو، پولس، می دست أجی ای سلامه نویسنم. ای، می همه ته نؤمهَ‌ن نشؤنهَ. مو ایطؤ نیویسنم.

¹⁸ أمئه خداوند عیسی مسیح فیض، شمه همه ته همرأ ببون.