دوم تسالونیکیان 2 - کتاب مقدس به زبان گیلکی - گویش شرقی

بی دین مردأی

¹ ایسه، أی برأرؤن، أمئه خداوند عیسی مسیح وگرسن باره و أمئه گردکله زئن باره اون ورجه، شمرأجی خواهش کؤنیم

² هیچی شیمئه فیکره خرابأنوکونه و هراسؤن نبین، چی بواسیطه یکته روح، چی یکته گب، چی یکته نؤمه کی بخألئه أمئه طرف أجی ایسه کی بوگؤ خداوند وگرسن روز برسئه.

³ نوگذأرین هیکس هیچ جوره شمره فیتأدئه. چونکه او روز نرسنه مگر ای که أول مردوم خدای ضید ویریسن و او بی‌دین مردأی که هلاکت ریکهَ، ظهور بوکونه.

⁴ او، هر چیز همرأ کی خدا دوخؤنده بنه یا پرستش بنه، مخالفت کؤنه و خوشه اوشؤن أجی جؤرتر دؤنه، تا اؤره کی خدای معبد مئن نیشینه و اعلؤم کؤنه کی خودش خدا ایسه.

⁵ یعنی شمره یاد دننئه او زمت کی شیمئه همرأ ایسأبوم ایشؤنه شمره گوتم؟

⁶ و شمه دؤنین که ألؤن چی اون جلؤ گیته دره، تا او خوشه وقت مؤقع بأ.

⁷ چونکی ای بی‌دینی راز، هی ألؤنم کار کأدره. هچی تا او زمت که اونی کی تا ایسه اون جلؤ گیته دره، أز بین بوشون.

⁸ بأزین او بی‌دین مردأی هنه، کی خداوند عیسی خوشه نفس دم أجی اونه هلاک کؤنه و خوشه پرشکوه أمأن همرأ، اونه نابودأکؤنه.

⁹ او بی‌دین مردأک أمأن، بواسیطه شیطؤن کار و تمؤم قوت و دورؤغی نشؤنه ئان و معجزات همرأ و عجایب چیزؤن همرأ کی گومراه کؤنه ایسه.

¹⁰ و هیطؤ نی تمؤم شرور حیله ئان همرأ، اوشؤن ئبه که هلاکت رای مئن ایسأن. چونکه اوشؤن نخأسن حقیقته دوست بدأرن تا نجات بیاجن.

¹¹ پس خدا اوشؤنه یکته سخت فریب مئن گیرفتارأکؤنه، اوجور که اوشؤن او چئه کی دورؤغه باور کؤنن،

¹² تا همه ته اوشؤنی که حقیقته باور نودن و هر چیز أجی کی نادرست ایسه کئف بودن، محکوم ببون.

قایم بیسین

¹³ أما أی برأرؤن کی خدا به عزیزین، أمه خأ همیشک خدا شیمئه وأسی شکر بوکونیم، چونکی خدا شمره نؤبر مورسؤن دؤجئه تا نجات بگیرین، بواسیطهٔ تقدیسی کی خدا روح أجی أنجؤم بنه و حقیقته ایمؤن دأشتن همرأ.

¹⁴ ایطؤ بو که او شمره بواسیطهٔ أمئه انجیل دوخؤنده تا أمئه خداوند عیسی مسیح جلال شیمئه نصیب ببون.

¹⁵ پس أی برأرؤن، قورص و قایم بیسین و او تعالیمیه که أمرأجی باموتین دچکین، چی أمئه گبؤن أجی و چی أمئه نؤمه همرأ.

¹⁶ ایسه أمئه خداوند عیسی مسیح خودش و أمئه پئر، خدا، که أمره دوست دأشت و بواسیطه فیض، أمره أبدی تسلی و خؤرم امید هدأ،

¹⁷ شیمئه دیلؤنه تسلی بدئه و هر خؤرم کار و گوفتار مئن، پابرجا بوکونه.